Makani 40: Musa Waluuma Bbwe
KWAINDA myaka iili 10, 20, 30, 39 bana Isilayeli bacili munkanda. Pele kwamyaka yoonse eeyi Jehova ulabalanganya bantu bakwe. Ulabasanina amana. Ulabasololela masyikati kwiinda mukubelesya cikumbi, eelyo masiku ubelesya cikoto camulilo. Kwamyaka yoonse eeyi zisani zyabo tazyiyauki alimwi taku nibazimba maulu akuba azilonda.
Lino, uno mwezi wakutaanguna wamwaka wa 40 kuzwa nibakazwa ku Ijipiti. Bana Isilayeli alimwi bayaka zidumba ku Kadesi. Aawa mpampawo mpobakabede basikutwela bali 12 nibakatumidwe kwaakubona nyika ya Kenani kakwiindide myaka iitandila ku 40. Miliyamu mucizyi wa Musa wafwa ku Kadesi. Mbuli lyoonse kuli mapenzi mubusena buno.
Bantu babula meenda. Aboobo bamutongookela Musa bati: ‘Nicakainda kubota ikuti nitwakafwa buyo. Nkaambo nzi ncowakatuzwisyila mu Ijipiti akutuleta kokuno kutako acisyango cikomena? Taku maila, taku nkuyu, taku masaansa naaba mapomegileneti. Alimwi taku ameenda aakunywa.’
Musa a Aloni baunke kwaakupaila kucikombelo, Jehova waambila Musa kuti: ‘Bunganya bantu. Eelyo kumpela lyabantu boonse, ambila bbwe lili waalya. Meenda manji aya kuzwa mulindilyo aakunywa bantu, ŋombe azimwi zivwubwa zyoonse.’
Aboobo Musa wabunganya bantu wati: ‘Amuswiilile nywebo nimutajisi lusyomo muli Leza! Hena Aloni andime tumupe meenda mubbwe eeli?’ Kumane Musa waluuma bbwe ankoli yakwe ziindi zyobilo, eelyo meenda atalika kupoomoka. Kwazwa meenda manji bantu ngobakonzya kunywa aŋombe zyabo zyoonse.
Pele Jehova wamukalalila Musa a Aloni. Hena ulikazyi kaambo? Nkaambo kakuti Musa a Aloni bakaamba kuti balabapa meenda kuzwa mubbwe. Pele mubwini ngu Jehova wakapa kuti meenda azwe. Akaambo kakuti Musa a Aloni tiibakaamba camasimpe kumakani aameenda, Jehova wati ulabapa cisubulo. Wati: ‘Tamukabanjizyi bantu bangu mu Kenani.’
Kumane bana Isilayeli balonga ku Kadesi. Mumazuba masyoonto basika ku Cilundu ca Holi. Aano atala lyacilundu Aloni wafwa. Wafwa naakkwanya myaka iili 123. Bana Isilayeli bausa kapati, alimwi kwamazuba aali 30 bantu boonse balamulila Aloni. Eliyaza mwana wakwe musankwa waba ngomupaizi mupati uuccilila wabana Isilayeli.
Myeelwe 20:1-13, 22-29; Deuteronomo 29:5.
Mibuzyo
- Mbuti Jehova mbwaakabalanganya bana Isilayeli kabali munkanda?
- Ncinzi bana Isilayeli ncibakali kutongooka nibakayaka a Kadesi?
- Mbuti Jehova mbwaakabapa meenda bantu alimwi azivwubwa zyabo?
- Ngwani muntu ooyu acifwanikiso uulitondeka, alimwi nkaambo nzi ncacitila boobu?
- Nkaambo nzi Jehova ncaamukalalila Musa a Aloni, alimwi mbuti mbwaabasubula?
- Ncinzi cacitika a Cilundu ca Holi, alimwi ngwani waba mupaizi mupati wabana Isilayeli?
Mibuzyo aimwi
- Bala Myeelwe 20:1-13, 22-29 a Deuteronomo 29:5.
Ncinzi ncotwiiya twalanga Jehova mbwaakabalanganya bana Isilayeli munkanda? (Dt. 29:5; Mt. 6:31; Heb. 13:5; Jak. 1:17)
Mbuti Jehova mbwaakakubona kulubizya nkwaakacita Musa a Aloni kwakutamulemeka kuli Isilayeli? (My. 20:12; 1 Kor. 10:12; Ciy. 4:11)
Ncinzi ncotukonzya kwiiya Musa mbwaakacita kululayo ndwaakapegwa kuli Jehova? (My. 12:3; 20:12, 27, 28; Dt. 32:4; Heb. 12:7-11)
Andiza Inga Mwaakkomanina Ayaaya
NGAZI YAMULINDIZI
