Makani 41: Inzoka Yamukuba
HENA ilibonya kuba inzoka ini eeyo izambaidwe acisamu? Peepe. Inzoka eeyi njamukuba. Jehova wakaambila Musa kwiibikka acisamu kutegwa bantu kabailanga akuzumanana kupona. Pele nzoka zimwi zili ansi ninzoka nconzyo. Zyabaluma bantu akubapa kuciswa. Hena ulicizyi ncocili boobo?
Nkaambo kakuti bana Isilayeli baamba twaambo tutali kabotu kuli Jehova akuli Musa. Batongooka ategwa: ‘Ino ncinzi ncowakatuzwisyila mu Ijipiti akuti tuzyi kufwide munkanda muno? Taku cakulya naaba meenda. Twalimvwa kulya mana.’
Pele mana ncilyo cibotu. Kwiinda mumaleele Jehova wakabapa mana. Alimwi kwiinda mumaleele wakabapa ameenda. Pele bantu tabalumbi Leza mbwaali kubabamba. Aboobo Jehova watumya nzoka eezyi zikali kapati kusubula bana Isilayeli. Nzoka zyabaluma eelyo banji bafwa.
Kumane bantu baboola kuli Musa bati: ‘Twabisya nkaambo twaamba twaambo tutali kabotu kuli Jehova akuli nduwe. Lino paila kuli Jehova kuti agusye nzoka eezyi.’
Aboobo Musa wabapailila bantu. Eelyo Jehova waambila Musa kupanga inzoka eeyi yamukuba. Wamwaambila kuti aibikke acisamu kutegwa kufwumbwa walumwa kailanga. Musa wacita mbweena Leza mbwaamulailila. Bantu bakali kulumwa, bakali kwiilanga inzoka yamukuba alimwi bakali kupona.
Kuli ciiyo ncotukonzya kwiiya kuli ceeci. Toonse munzila iimwi tuli mbuli bana Isilayeli bakalumwa nzoka eezyo. Toonse tulafwa! Langa buyo munyika ulabona kwaamba kuti bantu balacembala, balaciswa akufwa. Eeci cili boobu akaambo kakuti musankwa amukaintu bakutaanguna Adamu a Eva bakamuzangila Jehova, aboobo toonse tuli bana babo. Pele Jehova wabamba nzila kutegwa katupona kukabe akutamani.
Jehova wakatuma Mwana wakwe Jesu Kristo anyika. Jesu wakabikkwa acisamu cakupenzyezya nkaambo bantu banji bakali kuyeeya kuti wakali mubi. Pele Jehova wakatuma Jesu kuzyi kutufwutula. Ikuti twamusyoma, twamuccilila, tulakonzya kuba abuumi butamani. Pele tulaiya aakale zinji zyamakani aaya.
Myeelwe 21:4-9; Johane 3:14, 15.
Mibuzyo
- Ncinzi acifwanikiso cizambaidwe acisamu, alimwi nkaambo nzi Jehova ncaakaambila Musa kwiibikka aawa?
- Mbuti bantu mbobatalumbi kuzintu zyoonse Leza nzyaabacitila?
- Ncinzi bantu ncobaambila Musa kuti acite Jehova naatumya nzoka zikali zyakubasubula?
- Nkaambo nzi Jehova ncaambila Musa kupanga inzoka yamukuba?
- Nciiyo nzi ncotukonzya kwiiya kumakani aaya?
Mibuzyo aimwi
- Bala Myeelwe 21:4-9.
Nkucenjezyegwa kuli buti swebo nkotujisi twalanga bana Isilayeli mbobakatongooka Jehova mbwaakali kubalanganya? (My. 21:5, 6; Balo. 2:4)
Kwamyaanda yamyaka yakaccilila, ino mbuti bana Isilayeli mbobakaibelesya inzoka yamukuba, alimwi nintaamu nzi Mwami Hezekiya njaakabweza? (My. 21:9; 2 Bam. 18:1-4)
- Bala Johane 3:14, 15.
Mbuti kubikkwa kwanzoka yamukuba acisamu mbocitondezya kujaigwa kwa Jesu Kristo? (Gal. 3:13; 1 Pita 2:24)
