Makani 48: Bana Gibiyoni Basongo
BUNJI bwaminzi yamu Kenani yatalika kulibambila kulwana bana Isilayeli. Bayeeya kuti inga babazunda. Pele bantu bakkala munsi lyamunzi wa Gibiyoni tabasyomi oobo pe. Basyoma kuti Leza ugwasya bana Isilayeli, aboobo tabayandi kulwana a Leza. Aboobo, hena ulicizyi ncobacita bana Gibiyoni?
Balicengeezya mbuli kuti bakkala kulamfwu. Basankwa bamwi basama tuzwaapila ampato zifwide. Babikka zibbutu zyamasaka aafwide ambongolo zyabo, akubweza zinkwa zyakaindi alimwi ziyumu. Bamane baunka kuli Josyuwa bati: ‘Twazwa kubusena kulamfwu kapati, nkaambo twakamvwa mpuwo ya Leza wanu mupati, Jehova. Twakamvwa zintu zyoonse nzyaakamucitila mu Ijipiti. Aboobo basololi besu batwaambila kubweza cakulya kulibambila lweendo kuboola kokuno kuzyi kwaamba kuti: “Tuli balanda banu. Amutusyomezye kuti tamukatulwani.” Kamubona buyo zisani zyesu mbozyamana kuzazauka azinkwa mbozyayuma akaambo kamusinzo mulamfwu.’
Josyuwa abasololi bamwi basyoma nzyobaamba bana Gibiyoni. Aboobo babasyomezya kuti tabako kubalwana. Pele kwiinde mazuba otatwe, bazyiba kuti bana Gibiyoni bakkala aafwiifwi.
Josyuwa wabuzya kuti: ‘Nkaambo nzi ncomwakaamba kuti twakazwa kulamfwu?’
Bana Gibiyoni bavwiila bati: ‘Twakacita oobo nkaambo twakaambilwa kuti Leza wanu Jehova wakasyomezya kumupa nyika yoonse eeyi ya Kenani. Aboobo twakali yoowede kuti mulatujaya.’ Pele bana Isilayeli basyomeka kucisyomezyo cabo, eelyo tiibabajaya bana Gibiyoni. Muciindi caboobo, baba babelesi babo.
Mwami waku Jelusalemu wakalala nkaambo bana Gibiyoni babamba cilongwe abana Isilayeli. Aboobo waambila bami bone kuti: ‘Amuboole mundigwasye kulwana bana Gibiyoni.’ Eeco ncencico ncobacita bami aaba bali bosanwe. Hena ncamaano ncibakacita bana Gibiyoni kubamba cilongwe abana Isilayeli calo capa kuti bami aaba baboole kubalwana? Tulabona.
Josyuwa 9:1-27; 10:1-5.
Mibuzyo
- Mbuti bana Gibiyoni mbobaindenyi abana Kenani bali muminzi iili afwiifwi?
- Mbuli mbokutondezyedwe acifwanikiso, ncinzi bana Gibiyoni ncibacita, alimwi nkaambo nzi?
- Ncisyomezyo nzi Josyuwa abasololi bana Isilayeli ncobabasyomezya bana Gibiyoni, alimwi ncinzi ncibakazyiba nikwakainda mazuba otatwe?
- Ncinzi cakacitika bami bamwi bamuminzi iimwi nibakamvwa kuti bana Gibiyoni babamba cilongwe abana Isilayeli?
Mibuzyo aimwi
- Bala Josyuwa 9:1:27.
Mbwaanga Jehova wakalailila cisi cabana Isilayeli “kunyonyoona bantu boonse banyika,” ino mbube nzi butondezyegwa twalanga mbwaatakabanyonyoona bana Gibiyoni? (Jos. 9:22, 24; Mt. 9:13; Inc. 10:34, 35; 2 Pita 3:19)
Kwiinda mukusyomeka kucisyomezyo cakwe kubana Gibiyoni, mbuti Josyuwa mbwaakapa cikozyanyo cibotu ku Banakristo basunu? (Jos. 9:18, 19; Mt. 5:37; Ef. 4:25)
- Bala Josyuwa 10:1-5.
Mbuti sunu nkamu mpati mboili mbuli bana Gibiyoni, aboobo ino ngwani uubakanzide? (Jos. 10:4; Zek. 8:23; Mt. 25:35-40; Ciy. 12:17)
