Makani 49: Zuba Lyaima
BONA Josyuwa. Ulati: ‘Ozuba, ima!’ Alyalo zuba lyaima. Lyaima a 12 koloko buzuba boonse. Jehova ngoopa kuti liime. Pele atubone Josyuwa ncayandila kuti zuba kalicimunika.
Ibami bali bosanwe bakkala mu Kenani nibakatalika kulwana bana Gibiyoni, bana Gibiyoni bakatuma muntu kuli Josyuwa kuti abagwasye. Wakati: ‘Fwambaana boola! Tuvwune! Boonse bami bakkala mumasi aamalundu baboola kuzyi kulwana babelesi bako.’
Cakutasowa ciindi, Josyuwa abasikalumamba bakwe boonse baunka. Masiku oonse baleenda. Basike kuli Gibiyoni, basikalumamba babami bali bosanwe bayoowa akutalika kuccija. Kumane Jehova waleta mvwula mpati yacikulamabwe, yalo yakajaya basikalumamba banji ikwiinda bakajaigwa abasikalumamba ba Josyuwa.
Josyuwa wakabona kuti zuba lilaafwiifwi kubbila. Kulasiya alimwi bunji bwabasikalumamba babami babi bali bosanwe inga baccija. Nkakaambo kaambo Josyuwa ncaapailila kuli Jehova kuti: ‘Ozuba, ima!’ Eelyo zuba mboliya buzumanana kumunika, bana Isilayeli bakonzya kumanizya akuzunda munkondo.
Mbanji bami babi mu Kenani basulide bantu ba Leza. Josyuwa abasikalumamba bakwe cabatolela myaka iitandila kucisambomwe ikuzunda bami bali 31 munyika eeyo. Nibamana kuzunda, Josyuwa wayaabanya nyika ya Kenani kubantu bakaipengede.
Kwiinde myaka, Josyuwa wafwa kajisi myaka iili 110. Josyuwa abeenzyinyina nobakacili kucipona, bantu bakali kumumvwida Jehova. Pele Josyuwa afwe buyo abeenzyinyina, bantu batalika kucita zintu zibi akunjila mumapenzi. Eeci nceciindi ncobayandisya lugwasyo lwa Leza.
Josyuwa 10:6-15; 12:7-24; 14:1-5; Babetesi 2:8-13.
Mibuzyo
- Ncinzi acifwanikiso Josyuwa ncaamba, alimwi nkaambo nzi?
- Mbuti Jehova mbwaamugwasya Josyuwa abasikalumamba bakwe?
- Mbami bongaye Josyuwa mbaazunda, alimwi camutolela ciindi cilamfwu buti kubazunda?
- Nkaambo nzi Josyuwa ncaayaabanya nyika ya Kenani?
- Wakajisi myaka yongaye Josyuwa naakafwa, alimwi kumane ncinzi cacitika kubantu?
Mibuzyo aimwi
- Bala Josyuwa 10:6-15.
Ikuzyiba kuti Jehova wakapa kuti izuba amwezi zyiime kwiimina bana Isilayeli, ino tujisi lusyomo nzi mazuba aano? (Jos. 10:8, 10, 12, 13; Int. 18:3; Tus. 18:10)
- Bala Josyuwa 12:7-24.
Ino mubwini ngwani wakapa kuti bami bali 31 bazundwe mu Kenani, alimwi nkaambo nzi eeci ncociyandika kuli ndiswe mazuba aano? (Jos. 12:7; 24:11-13; Dt. 31:8; Lk. 21:9, 25-28)
- Bala Josyuwa 14:1-5.
Mbuti mboya kaabanisyigwa nyika kumusyobo wabana Isilayeli, alimwi ino eeci citondezya nzi kumakani aalukono mu Paladaiso? (Jos. 14:2; Is. 65:21; Ezk. 47:21-23; 1 Kor. 14:33)
- Bala Babetesi 2:8-13.
Mbuli Josyuwa mu Isilayeli, ino ngwani sunu uuli kumpela kulwana basiluleyo? (Bab. 2:8, 10, 11; Mt. 24:45-47; 2 Tes. 2:3-6; Tit. 1:7-9; Ciy. 1:1; 2:1, 2)
