Makani 51: Lute a Naomi
MU BBAIBBELE ulajana bbuku liitwa kuti Lute. Ncibalo icijisi makani aamukwasyi wakapona ciindi bana Isilayeli nibakalijisi babetesi. Lute mwana musimbi uuzwa munyika ya Mowabu; tali wamukwasyi wa Leza wabana Isilayeli pe. Pele Lute naakaiya akuzyiba Jehova Leza mwini-mwini, wakatalika kumuyanda kapati. Naomi mucembele wakagwasya Lute kwiiya zya Jehova.
Naomi mukaintu muna Isilayeli. Walo amunyokwabo abana basankwa bobilo bakalongela kunyika ya Mowabu cakulya nicakaceya mu Isilayeli. Ibuzuba bumwi, munyokwabo wa Naomi wakafwa. Kumane bana ba Naomi bakakwata basimbi bana Mowabu bobilo, Lute a Olipa. Pele kwiinde myaka iitandila ku 10, bana ba Naomi bobilo bakafwa. Elo kaka Naomi abamukabana bakausa kapati! Ino ncinzi lino Naomi ncaakali kukonzya kucita?
Buzuba bumwi Naomi wakayeeya kubweza lweendo lulamfwu kujokela kuli bamukowa wakwe. Lute a Olipa bayanda kuti kabakkala limwi, aboobo bamuccilila. Basakane-sakane buyo, Naomi wabalanga kumeso bamukabana akubaambila kuti: ‘Amujokele kumunzi aumwi akakkale kuli banyina.’
Naomi wabamyonta bamukabana, walaya. Aciindi aawa batalika kulila nkaambo balabayanda kapati banyinazyala ba Naomi. Bati: ‘Peepe! Tulaunka limwi kuli bamukowa wanu.’ Pele Naomi wavwiila wati, pe, nobana bangu amujokele. Nkaambo nzi ncomuyanda kuunka andime?’ Aboobo Olipa watalika kweenda kujokela kumunzi. Pele walo Lute mbwaakali kwiima munzila.
Naomi wamulanga, kumane wati: ‘Olipa wajokela. Anduwe jokela mweende limwi kumunzi.’ Pele Lute waingula kuti: ‘Mutandisinikizyi kumusiya! Amundileke nduunke andinywe. Kufwumbwa nkomuya ndilaunka, kufwumbwa nkomuya kukkala ndiya kukkala. Bantu banu baya kuba bantu bangu, alimwi Leza wanu uya kuba Leza wangu. Nkomuya kufwida nkondiya kufwida, alimwi nkondiya kuzikkilwa.’ Lute mbwaakaambila boobu, Naomi wacileka kumusinikizya kujokela kumunzi.
Limwi bamakaintu aaba bobilo basika ku Isilayeli. Okuno ku Isilayeli bakkala. Cakutasowa ciindi, Lute watalika kubeleka mumyuunda, nkaambo nciindi cakutebula maila. Musankwa wazina lya Bbowazi wamulekela Lute kutebula mumyuunda yakwe. Hena ulibazyi bakali banyina Bbowazi? Bakali ba Lahabu bamumunzi wa Jeliko.
Buzuba bumwi Bbowazi wakaambila Lute kuti: ‘Ndakaambilwa makani oonse ngowakacitila banyokozyala ba Naomi. Ndakamvwa mbowakasiya bazyali bako acisi cakwanu ambookaboola kukkala kubantu mbootakazyi. Jehova akuleleke!
Lute waingula wati: ‘Wandifwida luzyalo mwami. Ndaumbulizyigwa amajwi aako mabotu ngoamba kuli ndime.’ Bbowazi ulamuyanda Lute kapati, tiicakatola ciindi bakakwatana. Elo kaka eeci camukonda Naomi! Pele Naomi wainda kukondwa Bbowazi a Lute nibaba amwana musankwa wakutaanguna wazina lya Obbedi. Kumpela Obbedi waba kaapanyina wa Davida walo ngotulaaiye kabotu kumpela.
Bbuku lya Bbaibbele lya Lute.
Mibuzyo
- Mbuti Naomi mbwaakazyi kukkala munyika ya Mowabu?
- Ino Lute a Olipa mbabaani?
- Mbuti Lute a Olipa aumwi mbwaakacita Naomi naakabaambila kujokela kumunzi nkobazwa?
- Ino Bbowazi ngwani, alimwi mbuti mbwaamugwasya Lute a Naomi?
- Ino mwana ngobakazyala ba Bbowazi a Lute wakali ni, alimwi nkaambo nzi ncotweelede kumuyeeya?
Mibuzyo aimwi
- Bala Lute 1:1-17, BT.
Majwi nzi mabotu aaluyando lwini-lwini Lute ngaakaamba? (Lute 1:16, 17)
Mbuti kubomba kwa Lute mbokutondezyegwa kuli ba “mbelele zimwi” kubananike bali anyika mazuba aano? (Joh. 10:16; Zek. 8:23)
- Bala Lute 2:1-23.
Mbuti sunu Lute mbwapa cikozyanyo cibotu kuli bamakaintu bacili bana? (Lute 2:17, 18; Tus. 23:22; 31:15)
- Bala Lute 3:5-13.
Mbuti Bbowazi mbwaakakubona kulisungula kwa Lute kukwatwa kuli nguwe muciindi cakukwatwa kumusankwa uucili mwana?
Mbuti bube bwa Lute mbobutuyiisya kuba aluyando lwini-lwini? (Lute 3:10; 1 Kor. 13:4, 5)
- Bala Lute 4:7-17.
Mbuti basankwa Banakristo sunu mbobakonzya kuba mbuli Bbowazi? (Lute 4:9, 10; 1 Timo. 3:1, 12, 13; 5:8, Ci)
Andiza Inga Mwaakkomanina Ayaaya
ZIFWANIKISO IZIGWASYILIZYA BANA KWIIYA BBAIBBELE
Rute Mulongwe Uusyomeka
Nokuba kuti tanaakali muna Israyeli, luyando lutamani ndwaakatondezya lwakamukkomanisya Leza aboobo wakamulongezya.
