TEE kayi mwana ooyu musankwa mubotu? Izina lyakwe ngu Samuyele. Muntu ooyu uubikkide janza amutwe wa Samuyele ngu Eli mupaizi mupati wa Isilayeli. Aaba mbaba usyi Samuyele ba Elikana abanyina ba Hana baleta Samuyele kuli Eli.

Samuyele ujisi buyo myaka iili yone naa yosanwe. Pele unakukkala aano acikombelo ca Jehova antoomwe a Eli kubikkilizya abapaizi bamwi. Ino nkaambo nzi Elikana a Hana ncobamutolela Samuyele uucili mwana boobu kubelekela Jehova acikombelo? Atubone kaambo.

Kwainda buyo myaka misyoonto kacitana citika eeci, Hana naakauside kapati. Nkaambo kakuti tanaakali kukonzya kuba amwana, aboobo wakali kuyanda kapati kuti abe amwana. Aboobo buzuba bumwi, Hana naakaunka kucikombelo ca Jehova, wakapaila kuti: ‘O Jehova, utandilubi! Ikuti wandipa mwana musankwa, ndasyomezya kuti ndiya kukupa kuti akakubelekele mubuumi bwakwe boonse.’

Jehova wawiingula mupailo wa Hana, mumyezi yakaccilila wakatumbuka mwana uutegwa Samuyele. Hana wakali kumuyanda kapati mwana wakwe, alimwi wakatalika kumuyiisya makani aa Jehova kacili mwana kapati. Wakaambila mulumi kuti: ‘Kufwumbwa buyo Samuyele akomena-komena kusika aciimo ncakonzya kulisanzya, ndiya kumutola kucikombelo akabelekele Jehova.’

Ncencico eeci ncotubona acifwanikiso ncobacita ba Hana a Elikana. Akaambo kakuti Samuyele wakayiisyigwa kabotu abazyali bakwe, ulikkomenyi kubelekela Jehova ano atente lya Jehova. Amwaka Hana a Elikana balaboola kukomba atente eeli lyaalubazu, akuzyi kubona mwana wabo. Amwaka Hana ulamuletela Samuyele jansi lifwaafwi maanza ndyaakamusumina.

Mbwiiya ciya myaka, Samuyele wazumanana kubelekela Jehova acikombelo cakwe, Jehova alimwi abantu boonse balamuyanda Samuyele. Pele Hofeni a Pinehasi bana ba Eli mupaizi mupati tabali kabotu. Balacita zintu zinji zibi akupa bantu bamwi kuleka kuswiilila Jehova. Eli weelede kubalesya mulimo wabupaizi, pele wiile kubalanga.

Mwana Samuyele wazumanana kubelekela Jehova nokuba kuti kuli zibi zinji zicitika acikombelo. Pele akaambo kakuti mbasyoonto bantu bamuyanda ncobeni Jehova, kwaba ciindi cilamfwu kuzwa Jehova naakaambaude kumuntu. Samuyele naakakomena-komena, nceeci cakacitika:

Samuyele ulilede mucikombelo ijwi nilyamubusya. Wavwiila: ‘Mpendi.’ Wabuka akubalika kuli Eli, wati: ‘Hena mulandiita?’

Pele Eli waingula wati: ‘Tandikwiiti, jokela ukoone.’ Aboobo Samuyele wajokela kwaakoona.

Alimwi waitwa lwabili: “Samuyele!” Alimwi Samuyele wabuka akubalika kuli Eli. Wati: ‘Hena mulandiita?’ Pele Eli wavwiila wati: ‘Tandikwiiti mwanaangu. Jokela alimwi ukoone.’ Aboobo Samuyele wajokela kwaakoona.

Wamvwa alimwi ijwi ciindi catatu kaliti: “Samuyele!” Alimwi Samuyele wabalika kale kuli Eli. Wati: ‘Mpendi, kweelede kuti ndinywe mwandiita lino.’ Eli wazyiba lino kuti kweelede kuti ngu Jehova wiita. Lino wamwaambila Samuyele kuti: ‘Koya ukoone, ikuti alimwi aite, waambe kuti: Jehova kwaamba buyo, mulanda wako ulaswiilila.’

Mbombubo oobu Samuyele mbwaacita Jehova naaita alimwi. Kumane Jehova waambila Samuyele kuti ulamusubula Eli abana bakwe. Kuzwa waawo, Hofeni a Pinehasi bafwa munkondo yabana Filisiti. Eli amvwe makani aaya, wawa muzinga akutyoka nsingo wafwa awalo. Aboobo cacitika mbweena mbolyakaamba jwi lya Jehova.

Samuyele wakomena, eelyo akuba mubetesi wamamanino wa Isilayeli. Acembale buyo, bantu bamulomba kuti: ‘Tusalile mwami unakutulela.’ Samuyele wawayawaya, nkaambo Jehova masimpe ngomwami wabo. Pele Jehova wamwaambila kuti abaswiilile bantu.

1 Samuyele 1:1-28; 2:11-36; 4:16-18; 8:4-9.