Makani 65: Bwami Bwaandaanizyigwa
HENA ulicizyi cipa kuti muntu ooyu kayaula cisani cakwe? Jehova ngowamwaambila kuti acite boobo. Ooyu muntu ngu Ahaija musinsimi wa Leza. Hena musinsimi ulimuzyi? Imusinsimi muntu ooyo Leza ngwaambila zintu ziya kucitika kumpela.
Ahaija waambaula a Jelobowamu. Jelobowamu ngomuntu Solomoni ngwaakabikka kulanga mulimo wakwe wakuyaka. Ahaija amuyaanye Jelobowamu munzila, Ahaija wacita cintu cilamya. Wasamununa cisani cinyowana ncasamide akuciyaula muzyibeela zili 12. Wati kuli Jelobowamu: ‘Bweza zibeela zili 10.’ Hena ulicizyi Ahaija ncaapeda Jelobowamu zibeela zili 10?
Ahaija wapandulula kuti Jehova uya kumunyanga Solomoni bwami. Alimwi Jehova uya kubweza misyobo iili 10 akwiipa Jelobowamu. Eeci caamba kuti misyobo buyo yobilo njaya kucaalilwa Lobowamu mwana wa Solomoni kuti alele.
Solomoni naamvwa Ahaija ncaali kwaambila Jelobowamu, wakalala kapati. Uyanda kuti amujaye Jelobowamu. Pele Jelobowamu walusikka kuya ku Ijipiti. Kwiinde mazuba, Solomoni wafwa. Wakali mwami kwamyaka iili 40, pele lino mwana wakwe Lobowamu wabikkwa kuba mwami. Kali ku Ijipiti, Jelobowamu wamvwa kuti Solomoni wafwa, aboobo wajokela ku Isilayeli.
Lobowamu tali mwami mubotu. Walo wakainda kuba alunya kubantu kwiinda bwakali bausyi ba Solomoni. Jelobowamu ankumenkume zimwi baunka ku Mwami Lobowamu akumulomba kuti kabalanganya kabotu bantu. Pele Lobowamu tamvwi pe. Lino waindilila kubija. Aboobo bantu babikka Jelobowamu kuba mwami wamisyobo iili 10, pele musyobo wa Bbenjamini awa Juda bamubikka Lobowamu kuti abe mwami wabo.
Jelobowamu tayandi kuti bantu bakwe kabaunka ku Jelusalemu kwaakukomba ku tempele lya Jehova. Aboobo wapanga boombe bobilo bangolida kutegwa bwami bwamisyobo eeyi iili 10 kaikomba. Lino nyika yavwula bubi alupyopyongano.
Kuli mapenzi akwalo kumisyobo yobilo yabwami. Kaitanasika myaka yosanwe kuzwa Lobowamu naaba mwami, mwami wa Ijipiti waboola kulwana Jelusalemu. Wabweza lubono lunji mutempele lya Jehova. Aboobo tempele yakkala buyo mazuba masyoonto kiicilibonya kubota mbuli mboyakabede niyakayakwa-yakwa.
1 Bami 11:26-43; 12:1-33; 14:21-31.
Mibuzyo
- Mbabaani mazina basankwa bobilo bali acifwanikiso, alimwi mbantu bali buti?
- Ncinzi Ahaija ncaacita kucisani ncasamide, alimwi kucita boobu kutondezya nzi?
- Ncinzi Solomoni ncayanda kuti amucite Jelobowamu?
- Nkaambo nzi bantu ncobamubikka Jelobowamu kuba mwami wamisyobo iili kkumi?
- Nkaambo nzi Jelobowamu ncaabambila boombe bobilo bangolida, alimwi ncinzi cacitika munyika naamana kucita boobo?
- Ncinzi cacitika kubwami bwamisyobo yobilo alimwi akutempele lya Jehova mu Jelusalemu?
Mibuzyo aimwi
- Bala 1 Bami 11:26-43.
Ino Jelobowamu wakali muntu uuli buti, alimwi ncinzi Jehova ncaakamusyomezya ikuti naa waaccilila malailile aa Leza? (1 Bam. 11:28, 38)
- Bala 1 Bami 12:1-33.
Twalanga cikozyanyo cibi ca Lehobowamu, ncinzi bazyali abaalu ncobakonzya kwiiya kukutabelesya kabotu kwanguzu zyabo? (1 Bam. 12:13; Muk. 7:7; 1 Pita 5:2, 3)
Ndulayo nzi lusyomeka bakubusi sunu ndobeelede kulanga nobasala ziyandika kapati mubuumi? (1 Bam. 12:6, 7; Tus. 1:8, 9; 2 Timo. 3:16, 17; Heb. 13:7)
Ncinzi cakamupa kuti Jelobowamu abikke masena obilo aakukombela moombe, alimwi mbuti eeci mbocitondezya kubula lusyomo muli Jehova? (1 Bam. 11:37; 12:26-28)
Ngwani wakabasololela bantu mubwami bwamisyobo iili 10 mukuzangila bukombi bwakasimpe? (1 Bam. 12:32, 33)
