Makani 68: Bana Basankwa Bobilo Bakabusyigwa
KUTI wafwa, ino mbuti banyoko mbobakonzya kulimvwa ikuti wabusyigwa? Balakonzya kukkomana kapati! Pele hena muntu wafwa inga wabuka? Hena kuli nocakacitikide eeci?
Langa munene ooyu amukaintu alimwi amwana musankwa. Munene musinsimi utegwa Elija. Mukaintu ngumukamufwu uukkala mumunzi wa Zalefati, eelyo mwana, mwana wakwe. Pele buzuba bumwi mwana wakaciswa. Abuzuba wakali kuya ciindilila kuciswa kusikila limwi wafwa. Elija waambila mukaintu kuti: ‘Ndipe mwana.’
Elija wamubweza mwana uufwide wamutola muŋanda yamujulu wamulazika abulo. Kumane wapaila: ‘O Jehova, busya mwana.’ Aboobo mwana watalika kuyoya. Kumane wamutola kuli banyina muŋanda yaansi akwaambila banyina kuti: ‘Amubone mwana wanu wabuka!’ Nkakaambo kaako banyina ncobakkomenyi kapati.
Aumwi musinsimi wa Jehova ulaampuwo ngu Elisya. Ulabeleka kali mugwasyi wa Elija. Pele kwiinde ciindi, Jehova wamubelesya awalo Elisya kucita maleele. Buzuba bumwi Elisya wakaunka kumunzi wa Sunemu kumukaintu wakamufwida lubomba. Kumpela mukaintu ooyu waba amwana musankwa.
Naakakomena mwana, buzuba bumwi mafwumofwumo wakaunka kumuunda kwaakugwasya bawisi. Mwana wakaile kwaanzamuka kulila kati: ‘Ulacisa mutwe!’ Atolwe kumunzi, mwana wafwa. Elo banyina bausa! Cakutasowa ciindi baunka kwaakwiita Elisya.
Asike Elisya, wanjila muŋanda amwana uufwide. Wapaila kuli Jehova kumwi kalede amwana uufwide. Muciindi buyo cisyoonto mubili wamwana watalika kukasaala, alimwi weesyemuka kwaziindi zili ciloba. Banyina bakakkomana cakuti boola ubone nibakanjila muŋanda akujana kuti mwana wabo wabuka!
Bantu bakafwa kale, mbanji kapati. Eeci capa mikwasyi yabo abeenzyinyina kuusa kapati! Tatujisi nguzu zyakubusya bafwide. Pele Jehova ulijisi. Kumpela tuya kubona mbwaya kubusya tuulunzuma twabantu bafwide.
1 Bami 17:8-24; 2 Bami 4:8-37.
Mibuzyo
- Mbabaani bantu botatwe bali acifwanikiso, alimwi ncinzi cacitika kumwana musankwa?
- Ncinzi Elija ncapaila kujatikizya mwana, alimwi ncinzi cacitika naamana kupaila?
- Ngwani zina mugwasyi wa Elija?
- Nkaambo nzi Elisya waitwa kumunzi wamukaintu mu Sunemu?
- Ncinzi ncaacita Elisya, alimwi ncinzi cacitika kumwana uufwide?
- Ninguzu nzi Jehova zyajisi kweelana ambokwatondezyegwa kwiinda muli Elija a Elisya?
Mibuzyo aimwi
- Bala 1 Bami 17:8-24.
Mbuti Elija mbwaakasunkwa akaambo kakuswiilila kwakwe alimwi alusyomo ndwaakajisi? (1 Bam. 17:9; 19:1-4, 10)
Nkaambo nzi lusyomo lwamukamufwu waku Zalefati ncoluyandika kapati? (1 Bam. 17:12-16; Lk. 4:25, 26)
Mbuti cakacitikila mukamufwu waku Zalefati mboceendelana amajwi aa Jesu aalembedwe ku Matayo 10:41, 42? (1 Bam. 17:10-12, 17, 23, 24)
- Bala 2 Bami 4:8-37.
Mbuti mukaintu waku Sunemu mbwatuyiisya caboola kumakani aakutambula beenzu? (2 Bam. 4:8; Lk. 6:38; Balo. 12:13; 1 Joh. 3:17)
Muunzila nzi sunu motukonzya kutondezya luyando kubabelesi ba Leza? (Inc. 20:35; 28:1, 2; Gal. 6:9, 10; Heb. 6:10)
Andiza Inga Mwaakkomanina Ayaaya
ZYAKUCITA ZIJATIKIZYA KWIIYA BBAIBBELE
Amwiimine Bukombi Bwakasimpe!
Ino muumbazu zili zyabuumi momukonzya kutondezya busicamba caboola mumakani aabukombi?
