Makani 69: Mwana Musimbi Wagwasya Nkumenkeme
HENA ulicizyi ncaamba mwana ooyu musimbi? Waambila mukaintu zyamusinsimi wa Jehova uutegwa Elisya, alimwi azintu zibotu eezyo Jehova zyamugwasya Elisya kucita. Mukaintu tamuzyi Jehova nkaambo tali muna Isilayeli. Atubone musimbi ooyu ncali mumunzi wamukaintu ooyu.
Mukaintu muna Alamu. Mulumi wakwe ngu Naamani, mupati wabasikalumamba wabana Alamu. Lyankondo, bana Alamu bakabweza mwana musimbi ooyu muna Isilayeli, eelyo bakamuleta kumukaintu wa Naamani kuti abe mubelesi wakwe.
Naamani ulijisi bulwazi bubi bwiitwa kuti mankuntu. Oobu bulwazi bulakonzya kupa kuti nyama yamuntu aminwe kayiile kuloka yalikke. Aboobo ncencico eeci musimbi ncaambila mukaintu wa Naamani kuti: ‘Ndilombozya kuti kubota simalelo wangu waunka kumusinsimi wa Jehova ku Isilayeli. Ulakonzya kumusilika mankuntu.’ Kumane mukaintu waambila mulumi wakwe.
Naamani ulayanda kapati kuti aponesyegwe; aboobo waunka ku Isilayeli. Asike kuya, waunka kuŋanda ya Elisya. Elisya watuma mubelesi wakwe kwaambila Naamani kuti aunke akasambe mu Mulonga wa Jodano ziindi zili ciloba. Eeci camukalazya kapati Naamani, alimwi wati: ‘Milonga yankotuzwa mibotu kwiinda milonga yamu Isilayeli!’ Amane kwaamba boobu, Naamani watakata.
Pele umwi wababelesi bakwe wati: ‘Mwami, ikuti Elisya wamwaambila kucita cintu ciyumu, mweelede kucicita. Ino nkaambo nzi ncomutayandi kusamba kweelana ambwaamba?’ Naamani wamvwa caamba mubelesi wakwe, eelyo waunka kwaakusamba mu Mulonga wa Jodano kwaziindi zili ciloba. Mbwaasambila buyo ziindi zili ciloba, lukanda lwabota eelyo wapona.
Naamani wakkomana kapati. Wajokela kuli Elisya akumwaambila kuti: ‘Lino masimpe ndazyiba kuti Leza wamu Isilayeli ngo Leza mwini-mwini alikke munyika yoonse. Nkooku kotambula cipego cangu eeci.’ Pele Elisya wati: ‘Peepe, tandiko kucibweza.’ Elisya ulizyi kuti tacikonzyi kuba kabotu kubweza cipego, nkaambo ngu Jehova wamuponya Naamani. Pele mubelesi wa Elisya uutegwa Gehazi ulaciyanda cipego eeci.
Aboobo mboobu Gehazi mbwaacita. Anyamuke buyo Naamani, Gehazi wamutandila. Amweenzye, Gehazi wati: ‘Elisya wandituma kuti undipe zimwi zipego kutegwa ape beenzyinyina baboola kumuswaya.’ Koonse ooku nkubeja. Pele Naamani tazyi kuti makani aaya ngakubeja, aboobo wamupa Gehazi zimwi zipego.
Gehazi ajoke kumunzi, Elisya wazyiba ncaacita. Jehova wamwaambila. Aboobo wati kuli nguwe: ‘Akaambo kakuti wacita cintu eeci cibi, mankuntu aa Naamani alaboola kuli nduwe.’ Mpamunya aawo watalika kuciswa mankuntu.
Ino ncinzi ncotukonzya kwiiya kumakani aaya? Cakutaanguna, tweelede kuba mbuli mwana musimbi wakaamba makani aamba zya Jehova. Eeci cilakonzya kugwasya kapati. Cabili, tatweelede kulisumpula mbuli bwakacita Naamani kumatalikilo, pele tweelede kubamvwa babelesi ba Leza. Catatu, tatweelede kubeja mbuli bwakacita Gehazi. Hena tatukonzyi kwiiya zinji kwiinda mukubala Bbaibbele?
2 Bami 5:1-27.
Mibuzyo
- Ino ncinzi mwana musimbi acifwanikiso ncaambila mukaintu?
- Ngwani mukaintu uuli acifwanikiso, alimwi ncinzi mwana musimbi ncacita aŋanda yamukaintu ooyu?
- Ncinzi Elisya ncaambila mubelesi wakwe kwaambila Naamani, alimwi nkaambo nzi Naamani wakalala?
- Ncinzi cacitika Naamani naamvwa caamba mubelesi wakwe?
- Nkaambo nzi Elisya ncaakakila cipego ca Naamani, pele ncinzi Gehazi ncaacita?
- Ncinzi cacitika kuli Gehazi, alimwi ncinzi ncotukonzya kwiiya kuli ceeci?
Mibuzyo aimwi
- Bala 2 Bami 5:1-27.
Mbuti sunu mbocikonzya kubayumya-yumya bana icikozyanyo ncaakacita mwana musimbi muna Isilayeli? (2 Bam. 5:3; Int. 8:2; 148:12, 13)
Nkaambo nzi ncocili cibotu kuciyeeya cikozyanyo ca Naamani notupegwa lulayo lwamu Magwalo? (2 Bam. 5:15; Heb. 12:5, 6; Jak. 4:6)
Nziiyo nzi nzyotukonzya kwiiya kucikozyanyo ca Elisya alimwi aca Gehazi? (2 Bam. 5:9, 10, 14-16, 20; Mt. 10:8; Inc. 5:1-5; 2 Kor. 2:17)
Andiza Inga Mwaakkomanina Ayaaya
AMUBE BALONGWE BA JEHOVA
Jehova Uyoomugwasya Kuba Basicamba
Ncinzi cikonzya kumugwasya kuba basicamba kutegwa mwaambile bamwi zya Jehova?
ZYAKUCITA ZIJATIKIZYA KWIIYA BBAIBBELE
Sicinsenda Waponesyegwa!
Amwiiye Naamani ncaakeelede kucita kutegwa aponesyegwe cinsenda.
