Makani 74: Musankwa Uutayoowi
LANGA bantu nkobamufwubaazya musankwa ooyu uucili mwana-mwana. Hena ulimuzyi? Ngu Jelemiya. Musinsimi wa Leza uuyandika kapati.
Josiya naatalika kupwayaula zibumbwa mucisi, Jehova waambila Jelemiya kuba musinsimi Wakwe. Nekuba boobo, Jelemiya uyeeya kuti ucili mwana kapati ikuba musinsimi. Pele Jehova waamba kuti Uya kumugwasya.
Jelemiya waambila bana Isilayeli kuti baleke kucita zintu zibi. Wati: ‘Baleza aabo mbobakomba bamasi, mbakubeja.’ Pele bunji bwabana Isilayeli bayanda kukomba zibumbwa kuleka kuti kabakomba Leza mwini-mwini, Jehova. Jelemiya naabaambila kuti Leza uya kubasubula akaambo kabubi bwabo, balo nkumuseka.
Kwiinde myaka minji. Josiya wafwa, eelyo kwiinde buyo myezi yotatwe Jehoyakimu mwana wakwe musankwa waba mwami. Jelemiya watolelela kwaambila bantu kuti: ‘Jelusalemu ulanyonyoonwa ikuti mutacileki nzila zyanu zibi.’ Bapaizi bamujata Jelemiya bamane boongolola bati: ‘Weelede kujaigwa akaambo kakwaamba twaambo tuli boobu.’ Bamane baambila mwami wa Isilayeli kuti: ‘Jelemiya weelede kufwa nkaambo waamba zintu zibi kumunzi wesu.’
Ino Jelemiya ulacita nzi? Tayoowede pe! Wabaambila boonse kuti: ‘Jehova wandituma kuti ndaambe zintu eezyi kuli ndinywe. Ikuti mutaleki nzila zyanu zibi, Jehova uya kumunyonyoona Jelusalemu. Pele amuzyibe kuti: ‘Ikuti mundijaye, nkokuti mwajaya muntu uutako mulandu amuntu.’
Kumane balupati-pati bamuleka Jelemiya, pele bana Isilayeli tabacinci nzila zyabo zibi. Kumane Nebukadineza mwami wa Bbabbuloni waboola kulwana Jelusalemu. Kumamanino bana Isilayeli baba babelesi ba Nebukadineza. Wabweza zyuulu-zyuulu zyabantu akubatola ku Bbabbuloni. Ma! koyeeya buyo mbocinga caba ikuti bantu mbotazyi bakubweza amunzi akukutola kubusena nkotazyi!
Jelemiya 1:1-8; 10:1-5; 26:1-16; 2 Bami 24:1-17.
Mibuzyo
- Ngwani mwana musankwa uuli acifwanikiso?
- Ncinzi Jelemiya ncayeeya kumakani aakuba musinsimi, pele ncinzi Jehova ncaamwaambila?
- Mulumbe nzi Jelemiya ngwabujisi kwaambila bantu?
- Mbuti bapaizi mbobasola kumulesya Jelemiya, pele mbuti mbwaatondezya kuti tayoowede?
- Ncinzi cacitika kubana Isilayeli akaambo kakutacinca nzila zyabo zibi?
Mibuzyo aimwi
- Bala Jelemiya 1:1-8.
Kweelana ambocitondezya cikozyanyo ca Jelemiya, ncinzi cipa kuti muntu akonzye kubeleka mulimo wa Jehova? (2 Kor. 3:5, 6)
Nkukulwaizya kuli buti icikozyanyo ca Jelemiya nkocikulwaizya Banakristo bakubusi mazuba aano? (Muk. 12:1; 1 Timo. 4:12)
- Bala Jelemiya 10:1-5.
Ncikozyanyo nzi cigwasya kapati Jelemiya ncaakabelesya kutondezya mbocitagwasyi kusyoma mituni? (Jelemiya 10:5; Is. 46:7; Hab. 2:19)
- Bala Jelemiya 26:1-16.
Nokwaambilizyigwa mulumbe mazuba aano wakucenjezya, mbuti bananike basyeede mbobabikkila maano kukulailila kwa Jehova kuli Jelemiya ‘kwakutasotoka jwi niliba lyomwe’? (Jelemiya 26:2; Dt. 4:2; Inc 20:27)
Ncikozyanyo nzi cibotu Jelemiya ncaakasiila Bakamboni ba Jehova mazuba aano ikwaambilizya ncenjezyo ya Jehova kuli bamasi? (Jelemiya 26:8, 12, 14, 15; 2 Timo. 4:1-5)
- Bala 2 Bami 24:1-17.
Ncinzi cakacitikila cisi ca Juda akaambo kakutaswiilila Jehova? (2 Bam. 24:2-4, 14)
