Makani 75: Basankwa Bone mu Bbabbuloni
MWAMI Nebukadineza wabweza boonse bayiide kapati bana Isilayeli akubatola ku Bbabbuloni. Kuzwa waawo, mwami wasala basankwa beebeka kapati alimwi basongo. Aaba mbambabo basankwa bone mbobona waawa. Umwi ngu Daniyeli, eelyo bamwi botatwe baitwa mazina amu Bbabbuloni aakuti, Syadileki, Misyeki a Abedinego.
Nebukadineza uyanda kuyiisya basankwa aaba kutegwa kababelekela muŋanda yakwe yabwami. Kwamana myaka yotatwe yakwiiya, uya kusala buyo basongo bani kumugwasya kubamba twaambo. Mwami uyanda kuti basankwa aaba kabali bayumu alimwi kabajisi mibili mibotu nobayiisyigwa. Aboobo wapa mulawo wakuti babelesi bakwe beelede kubapa boonse zyakulya zibotu awaini zyalo bamukwasyi wakwe Nebukadineza nzyobalya.
Langa Daniyeli mukubusi. Hena ulicizyi ncaambila Asipenazi mupati wababelesi ba Nebukadineza? Daniyeli umwaambila kuti tayandi kulya zyakulya zinono zilya mwami. Pele Asipenazi wakatazyigwa. Wati: ‘Mwami wasala nzyomweelede kulya akunywa. Ikuti mibili yanu kaitalibonyi kabotu mbuli basankwa bamwi, ulakonzya kundijaya.’
Aboobo Daniyeli waunka kuli sikubalanga ooyo Asipenazi ngwaabikka kuti kamulanga Daniyeli abeenzyinyina botatwe. Daniyeli wati: ‘Amutusole kwamazuba aali 10. Amutupe cisyumani tulye alimwi ameenda aakunywa. Kwaakumana mukatweelanye abasankwa aabo bali kulya zyakulya zilya mwami mukabone naa mbabaani baya kulibonya kabotu.’
Sikubalanga wazumina kucita oobo. Amane mazuba aali 10, Daniyeli abeenzyinyina botatwe baboneka kuba amibili iili kabotu kwiinda basankwa bamwi. Aboobo sikubalanga wabaleka kuti kabalya cisyumani ikutali kulya ceeco mwami ncapa.
Kumamanino aamyaka yotatwe, basankwa aaba botatwe batolwa kuli Nebukadineza. Amane kwaambaula kuli mbabo boonse, mwami wajana kuti Daniyeli abeenzyinyina botatwe mbabasongo kapati. Aboobo wababweza kuti kabamugwasya muŋanda yakwe yabwami. Alimwi kufwumbwa mwami nabuzya Daniyeli, Syadileki, Misyeki a Abedinego mibuzyo naa kubapa milimo miyumu, balo balizyi ziindi zili 10 kwiinda mbobazyi bapaizi bakwe naa bantu basongo.
Daniyeli 1:1-21.
Mibuzyo
- Mbabaani basankwa bone bali acifwanikiso, alimwi nkaambo nzi ncobali mu Bbabbuloni?
- Muzeezo nzi ngwajisi Nebukadineza kubasankwa bone, alimwi ncinzi ncaalailila babelesi bakwe?
- Ncinzi Daniyeli ncaalomba alimwi abeenzyinyina botatwe kujatikizya zyakulya azyakunywa?
- Mbuti Daniyeli alimwi abeenzyinyina botatwe mbobalibonya mibili nobeelanizyigwa abasankwa bamwi nibamana kulya cisyumani kwamazuba aali 10?
- Mbuti Daniyeli abeenzyinyina botatwe mbobakaba muŋanda yabwami yamwami, alimwi muunzila nzi mbobali basongo kwiinda bapaizi alimwi abantu basongo?
Mibuzyo aimwi
- Bala Daniyeli 1:1-21.
Nkusoleka kuli buti kuyandika kutegwa tukonzye kuliyumya kumasunko alimwi akuzunda kutyompwa? (Dan. 1:8; Matl. 39:7, 10; Gal. 6:9)
Muunzila nzi sunu bakubusi mobakonzya kuyungwa kutola lubazu muzintu bamwi nzyobati “zilyo zinono”? (Dan. 1:8; Tus. 20:1; 2 Kor. 6:17-7:1)
Mbuti cibalo ca Bbaibbele caamba bakubusi bone bana Hebrayo mbocitugwasya caboola kumakani aalwiiyo lwakumubili? (Dan. 1:20; Is. 54:13; 1 Kor. 3:18-20)
