KWAINDA mwaya iili 10 kuzwa ciindi Mwami Nebukadineza naakatola bana Isilayeli bayiide kapati ku Bbabbuloni. Lino langa buyo cicitika! Munzi wa Jelusalemu waumpwa. Pele aabo bana Isilayeli batakajaigwa batolwa mubuzike ku Bbabbuloni.

Koyeeya kuti eeci ncencico basinsimi ba Jehova ncobakacenjezya kuti ciya kucitika ikuti bantu batazyileka nzila zyabo zibi. Pele bana Isilayeli tababaswiilili basinsimi. Bazumanana kukomba baleza bakubeja kuleka kuti kabakomba Jehova. Aboobo bantu bakali kweelelwa kusubulwa. Tulaazyi makani aaya akaambo kakuti Ezekiyeli musinsimi wa Leza watwaambila zintu zibi bana Isilayeli nzyobakali kucita.

Hena ulimuzyi Ezekiyeli? Ooyu ngumwi wabasankwa Mwami Nebukadineza mbaakatola ku Bbabbuloni kwamyaka iili 10 yainda kunyonyoonwa kwa Jelusalemu kakutana citika. Daniyeli abeenzyinyina botatwe Syadileki, Misyeki a Abedinego abalo bakatolwa ku Bbabbuloni aciindi nceena.

Ezekiyeli kacili ku Bbabbuloni, Jehova wamutondezya zintu zibi zyakali kucitika mu Jelusalemu atempele. Jehova wacita eeci kwiinda mumaleele. Ezekiyeli ucili mu Bbabbuloni, pele Jehova wamupa kuti abone zyoonse zicitika atempele. Nzyaabona Ezekiyeli zilalamya!

Jehova waambila Ezekiyeli kuti: ‘Langa zintu zisesemya bantu nzyobacita ano atempele. Langa bwaanda boonse bujisi zifwanikiso zyanzoka abanyama. Langa bana Isilayeli nkobazyikomba!’ Ezekiyeli ulakonzya kuzyibona zintu eezyi, alimwi ulalemba eezyo zicitika.

Jehova wamubuzya Ezekiyeli kuti: ‘Hena wabona basololi ba Isilayeli nkobacita zintu cakusisikizya?’ Inzya, azyalo eezyi wazyibona. Kuli basankwa bali 70, alimwi boonse bakomba baleza bakubeja. Balati: ‘Jehova tatubwenyi. Waisiya nyika!’

Kumane Jehova wamutondezya Ezekiyeli bamakaintu bali kujwe lyamulyango watempele. Balikkede kabakomba Tamuzi leza wakubeja. Alimwi langa bantu bali kumanjililo aamulyango watempele lya Jehova! Balasika kuma 25. Ezekiyeli wababona. Balavwuntama kulanga kujwe kukomba zuba.

Jehova wati: ‘Bantu aaba tabandipi bulemu. Tabaciti buyo zintu zibi, pele balaboola kutempele lyangu kuzyi kucitila nkuko!’ Aboobo Jehova usyomezya kuti: ‘Baya kububona bukali bwangu. Alimwi tandikeetezyegwi baakunyonyoonwa.’

Kwainda buyo myaka iitandila kuli yotatwe kuzwa Jehova naakatondezya Ezekiyeli zintu eezyi, bana Isilayeli nibakazangila Mwami Nebukadineza. Aboobo waunka kubalwana. Kwiinde mwaka omwe acisela, bana Bbabbuloni babbwalula bwaanda bwamunzi wa Jelusalemu banjila akuumpa munzi woonse. Bunji bwabantu bajaigwa naa kutolwa mubuzike ku Bbabbuloni.

Ino nkaambo nzi Jehova ncaalekela lunyonyooko luli boobu kucitika kubana Isilayeli? Nkaambo kakuti tiibakamuswiilila Jehova akuccilila milawo yakwe. Eeci citondezya mbociyandika lyoonse kucita Leza ncaamba.

Kumatalikilo bantu buyo basyoonto bazumizyigwa kukkala mu Isilayeli. Mwami Nebukadineza wabikka mu Juda wazina lya Gedaliya kuti kalanga bantu. Pele bana Isilayeli bamujaya Gedaliya. Lino bantu bali yoowede kuti bantu baku Bbabbuloni balaboola kubajaya boonse akaambo kacintu eeci cacitika. Aboobo basinikizya Jelemiya kuunka ambabo akuccijila ku Ijipiti.

Eeci capa kuti nyika yabana Isilayeli kubule amuntu naba omwe uucaala. Kwamyaka iili 70, kuli buyo wi. Taku muntu uuzela. Pele Jehova wasyomezya kuti uya kubajola bantu bakwe kwaakwiinda myaka iili 70. Kwaciindi cino, ino ncinzi cicitika kubantu ba Leza munyika ya Bbabbuloni ooko nkobakatolwa? Atubone.

2 Bami 25:1-26; Jelemiya 29:10; Ezekiyeli 1:1-3; 8:1-18.