Bana Isilayeli kabacili mubuzike mu Bbabbuloni, bakasunkwa misunko minji akaambo kalusyomo lwabo. Syadileki, Misyeki a Abedinego bakawaalwa mubbibi lyamulilo, pele Leza wakabavwuna. Kumpela, Bbabbuloni naakazundwa abana Medi a Persia, Daniyeli wakawaalwa mumulindi wabasyuumbwa, pele Leza wakamuvwuna awalo kwiinda mukujata milomo yabasyuumbwa.

Kumamanino, Sailasi mwami wa Persia wakabaangulula bana Isilayeli. Bakajokela kucisi cokwabo nokwakainda myaka iili 70 kuzwa ciindi nibakatolwa mubuzike ku Bbabbuloni. Cintu ncibakataanguna kucita nibakajokela ku Jelusalemu, nkuyaka tempele lya Jehova. Pele tiicakatola ciindi, basinkondonyina bakawiimika mulimo wabo. Aboobo kwakainda myaka iitandila ku 22 nibakajokela ku Jelusalemu nibaya bamane kuyaka tempele.

Ciccilila tulaiya lweendo lwa Ezara lwakujokela ku Jelusalemu lwakuyakulula tempele. Kwakainda myaka iili 47 kuzwa tempele nilyakamana kuyakwa. Kwamyaka iili 13 kuzwa kulweendo lwa Ezara, Nehemiya wakagwasya kuyaka bwaanda bwa Jelusalemu bwakawide. Cibeela CASANU cilaamba zintu zyakacitika mumyaka iili 152 kusikila sunu.