Makani 78: Mabala Kubwaanda
NCINZI cicitika aawa? Bantu bali apobwe lipati. Mwami wa Bbabbuloni watamba nkumenkume zili cuulu. Babelesya nkapu zyangolida, zyansiliva ambale zyakabwezyegwa mutempele lya Jehova mu Jelusalemu. Pele cakutayeeyelwa, minwe yamuntu yalibonya mumulenga-lenga akutalika kulemba kubwaanda. Aumwi uli yoowede.
Belisyaza muzyukulu wa Nebukadineza ngomwami lino. Woongolola kwiita bantu bakwe basongo kuti baletwe muŋanda. Mwami wati: ‘Kufwumbwa uulaakonzye kubala mabala aaya akundaambila ncaapandulula, ulapegwa bulumbu alimwi ulaba mweendelezi mupati watatu mubwami.’ Pele taku naba omwe musongo uukonzya kubala mabala kubwaanda nikuba kwaamba ncaapandulula.
Banyina mwami bamvwa kuyobeka, eelyo baboola muŋanda mpati yakulida. Bati kumwami: ‘Utayoowi! Kuli muntu mubwami bwako uuzyi baleza basetekene. Bakaapanyoko ba Nebukadineza nobakali mubwami, bakamubikka kuba mupati kubasongo babo boonse. Izina lyakwe ngu Daniyeli. Tuma bantu bamulete, ulakwaambila ncocipandulula eeci.’
Cakutasowa ciindi Daniyeli waletwa muŋanda. Amane kukaka kubweza zipego, Daniyeli watalika kwaamba ikaambo Jehova ncaakamugusyila Nebukadineza bakaapanyina Belisyaza mubwami. Daniyeli wati: ‘Wakali kulisumpula kapati. Eelyo Jehova wakamusubula.’
Daniyeli waambila Belisyaza kuti: ‘Pele iwe uciyeeyede cakacitika kuli nguwe, aboobo ulalisumpula mbuli bwakali Nebukadineza. Waleta nkapu ambale kuzwa mutempele lya Jehova akunywida mumo. Walemeka baleza bakabambwa azisamu amabwe, pele tiiwalemeka Mulengi wesu Mupati. Nkakaambo kaako Leza ncaatumina janza kulemba mabala aaya.
Daniyeli wati: Cilembedwe nceeci: ‘MENE, MENE, TEKELI PASINI.’
‘MENE caamba kuti Leza wabala mazuba aabwami bwako, eelyo bwami bwasika kumamanino. TEKELI caamba kuti wapimwa acikkelo alimwi kwajanwa kuti toli kabotu. PASINI caamba kuti bwami bwako bwapegwa kuli ba Medi a Persia.’
Kacaambaula Daniyeli, ba Medi a Persia batalika kumulwana Bbabbuloni. Baubweza munzi akumujaya Belisyaza. Mabala aali kubwaanda aba aamasimpe ngeena masiku aayo. Pele ino ncinzi cilaacitike kubana Isilayeli lino? Tulabona, pele cakutaanguna atubone cacitikila Daniyeli.
Daniyeli 5:1-31.
Mibuzyo
- Ncinzi cacitika mwami wa Bbabbuloni naacita pobwe lipati akubelesya nkapu ambale zyakazwa kutempele lya Jehova mu Jelusalemu?
- Ncinzi ncaamba Belisyaza kubantu bakwe basongo, pele ncinzi ncobaalilwa kucita?
- Ncinzi banyina mwami ncibamwaambila kuti acite?
- Kweelana aceeco Daniyeli ncaambila mwami, nkaambo nzi Leza ncaatumina janza kulemba kubwaanda?
- Mbuti Daniyeli mbwaapandulula ncaamba mabala aali kubwaanda?
- Ncinzi cacitika Daniyeli kacaambaula?
Mibuzyo aimwi
- Bala Daniyeli 5:1-31.
Indanya kuyoowa Leza alimwi akuyoowa ooko nkwaakaba ankuko Belisyaza naakabona mabala kubwaanda. (Dan. 5:6, 7; Int. 19:9; Balo. 8:35-39)
Mbuti Daniyeli mbwaakatondezya busicamba naakali kwaambaula kuli Belisyaza alimwi akubapati? (Dan. 5:17, 18, 22, 26-28; Inc. 4:29)
Muunzila nzi Daniyeli caandaano 5 mbwakankaizya nguzu zya Jehova zyakoonse-koonse? (Dan. 4:17, 25; 5:21)
