Makani 81: Kusyoma mu Lugwasyo lwa Leza
ZYUULU zinji zyabantu babweza lweendo lulamfwu kuzwa mu Bbabbuloni kuya ku Jelusalemu. Nibasika bajana Jelusalemu nditongo lipati. Taku muntu uukkala. Bana Isilayeli beelede kutalika buya alimwi kuyaka zyoonse.
Cipaililo ncecintu ncibataanguna kuyaka. Oobu mbobusena mbobakonzya kucitila zipaililo zyabanyama naa zipego kuli Jehova. Kwiinde buyo myezi misyoonto, bana Isilayeli batalika kuyaka tempele. Pele basinkondonyina bakkala munsi lyabo, tabayandi kuti bana Isilayeli baliyake. Aboobo babakonga kubajaya kutegwa bacileke. Limwi aaba basikondonyina baambila mwami mupya waku Persia kuti abikke mulawo wakubalesya kuyaka tempele.
Kwainda myaka minji. Lino kwainda myaka iili 17 bana Isilayeli nibakazwa mu Bbabbuloni. Jehova watuma basinsimi bakwe, Hagai a Zekaliya kwaambila bantu kuti batalike kuyaka alimwi. Bantu basyoma mulugwasyo lwa Leza, alimwi baccilila caamba basinsimi. Aboobo batalika alimwi kuyaka nikuba kuti mulawo ulakasya.
Kumane Tatinai mupati wa Persia waboola kuzyi kubuzya bana Isilayeli nguzu nzyobajisi zyakuyaka tempele. Bana Isilayeli bamwaambila kuti nibakali ku Bbabbuloni, mwami Sailasi wakabaambila kuti: ‘Kamuya lino ku Jelusalemu mukayake tempele lya Jehova Leza wanu.’
Tatinai watumizya lugwalo ku Bbabbuloni akubuzya kuti naa Sailasi ooyo lino uufwide naa wakaamba ncobeni oobu. Mumazuba masyoonto lwasika lugwalo kuzwa kumwami mupya wa Persia. Lwaamba kuti Sailasi masimpe wakaamba ncobeni oobo. Aboobo mwami walemba kuti: ‘Amubaleke bana Isilayeli bayake tempele lya Leza wabo. Alimwi mweelede kubagwasya kuyaka.’ Kwamyaka iitandila kuli yone tempele lyamana kuyakwa, aboobo bana Isilayeli bakkomana kapati.
Kwainda myaka minji. Lino kuli myaka iisika kuma 48 kuzwa nilyakamana kuyakwa tempele. Bantu mu Jelusalemu mbacete, eelyo munzi atempele lya Leza tazyilibonyi kabotu. Kali ku Bbabbuloni, Ezara muna Isilayeli wabona ziyandika kukuyaka tempele lya Leza. Aboobo hena ulicizyi ncaacita?
Ezara waunka kubona Atakisesi mwami wa Persia, alimwi ooyu mwami mubotu moyo wamupa Ezara zipego zinji zyakutola ku Jelusalemu. Ezara waambila bana Isilayeli bali mu Bbabbuloni kumunyamuzya zipego kutola ku Jelusalemu. Bantu basika kuma 6,000 bazumina kuunka. Balijisi nsiliva inji angolida azintu zimwi zibotu zyakutola.
Ezara ulilibilikide nkaambo kuli bantu babi munzila. Bantu aaba balakonzya kubanyanga nsiliva angolida akubajaya. Aboobo Ezara wabunganya bantu mbuli mbobona acifwanikiso. Kumane bapaila kuli Jehova kuti abakwabilile mulweendo lwabo lulamfwu lwakujokela ku Jelusalemu.
Jehova wabakwabilila. Kwiinde myezi yone yakweenda, basika ku Jelusalemu kakunyina apenzi. Hena eeci tacitondezyi kuti Jehova ulakonzya kubakwabilila aabo basyoma muli nguwe?
Ezara caandaano 2 kusikila ku 8.
Mibuzyo
- Bali bongaye bantu ibeenda lweendo lulamfwu kuzwa ku Bbabbuloni kuya ku Jelusalemu, pele ncinzi ncibajana nibasika?
- Ncinzi bana Isilayeli ncibatalika kuyaka nibasika ooko, pele ncinzi basikondonyina ncibacita?
- Ngwani Hagai a Zekaliya, alimwi ncinzi ncibabaambila bantu?
- Nkaambo nzi Tatinai ncaatumizya lugwalo ku Bbabbuloni, alimwi mbwiinguzi nzi mbwaatambula?
- Ncinzi Ezara ncaacita naamvwa kuyandika kwakuyaka kwatempele lya Leza?
- Ncinzi Ezara acifwanikiso ncapailila, mbuti mupailo wakwe mbowaingulwa, alimwi ino eeci cituyiisya nzi?
Mibuzyo aimwi
- Bala Ezara 3:1-13.
Ikuti twajanika mubusena butako mbungano yabantu ba Leza, ncinzi ncotweelede kuzumanana kucita? (Ezr. 3:3, 6; Inc. 17:16, 17; Heb. 13:15)
- Bala Ezara 4:1-7.
Ncikozyanyo nzi Zelubabeli ncaakasiila bantu ba Jehova kujatikizya kuvwelana kwabukombi? (Kul. 34:12; 1 Kor. 15:33; 2 Kor. 6:14-17)
- Bala Ezara 5:1-5, 17 a 6:1-22.
Nkaambo nzi basikukazya ncobatakacikonzya kuwiimika mulimo wakuyaka tempele? (Ezr. 5:5; Is. 54:17)
Mbuti mbobakacita bapati baba Juda mbokukulwaizya Banakristo baalu kulangaula busolozi bwa Jehova nokwaba basikukazya? (Ezr. 6:14; Int. 32:8; Balo. 8:31; Jak. 1:5)
- Bala Ezara 8:21-23, 28-36.
Ncikozyanyo nzi ca Ezara ncotweelede kuccilila katutana bweza ntaamu iili yoonse? (Ezr. 8:23; Int. 127:1; Tus. 10:22; Jak. 4:13-15)
