Makani 87: Mwana Jesu mu Tempele
LANGA mwana musankwa ooyu nkwaambaula kuli bamadaala aaba. Aaba mbafwundisi mutempele lya Leza mu Jelusalemu. Imwana ooyu ngu Jesu. Wakomena-komena. Lino ulijisi myaka iili 12.
Bafwundisi balamwa kapati kubona kuti Jesu ulizyi zinji zya Leza alimwi azintu zimwi zilembedwe mu Bbaibbele. Ino nkaambo nzi Josefa a Maliya ncobatako abalo aano? Ino bali kuli? Atubone nkobabede.
Amwaka Josefa ulaleta mukwasyi wakwe ku Jelusalemu kupobwe liyandika kapati liitwa kuti Pobwe lya Kwiindilila. Musinzo kuzwa ku Nazaleta kuya ku Jelusalemu. Taku uujisi mootoka alimwi taku zitima. Tiibakajisi zyakweendela mazuba aayo. Ibunji bwabantu beenda amaulu, alimwi cilabatolela mazuba aatandila kuli otatwe kusika ku Jelusalemu.
Lino Josefa ulijisi mukwasyi mupati. Aboobo kuli abace ba Jesu basankwa abasimbi mbobeelede kulanganya. Aboobo uno mwaka Josefa a Maliya banyamuka abana babo lweendo lulamfwu kujokela ku Nazaleta. Bayeeya kuti Jesu nkwali uleenda munkamu. Pele baime abusena bumwi nilyabbila zuba, bajana kuti Jesu tako. Bamulangaula kuli bamukowa wabo alimwi akubeenzyinyina, pele bajana kuti tako akwalo. Aboobo bajokela ku Jelusalemu kwaakumulangaula.
Limwi bamujana Jesu kuno kali abafwundisi. Ulaswiilila nzyobaamba alimwi ulababuzya mibuzyo. Bantu boonse balamwa kubona busongo Jesu mbwajisi. Pele Maliya wati: ‘Mwanike iwe, ino nkaambo nzi ncocaalila munsi? Baswaanu andime catukopa cakuti twalema kukulangaula.’
Jesu waingula kuti: ‘Ino mwali kulipenzyela nzi kundilangaula? Hena tamuzyi kuti ndeelede kuba kuŋanda ya Taata?’
Ee, Jesu uyandisya kuba kooko nkwakonzya kwiiya zya Leza. Hena tabuli mbombubo oobo mbotweelede kulimvwa andiswe? Nali kumunzi ku Nazaleta, Jesu inga wali kuunka kumiswaangano ansondo kwaakukomba. Akaambo kakuti lyoonse wali kuswiililisya, waiya zintu zinji zyamu Bbaibbele. Atube mbuli Jesu akuccilila cikozyanyo cakwe.
Luka 2:41-52; Matayo 13:53-56.
Mibuzyo
- Ino Jesu acifwanikiso ujisi myaka yongaye, alimwi nkuli nkwabede?
- Ncinzi Josefa ncalaakucita amwaka abamukwasyi wakwe?
- Nkaambo nzi Josefa a Maliya ncibajokela ku Jelusalemu nilyabbila zuba kabali mulweendo lwakujokela kumunzi?
- Nkuli Josefa a Maliya nkobamujana Jesu, alimwi nkaambo nzi bantu okuya ncibalamwa?
- Ncinzi Jesu ncaamba kuli banyina ba Maliya?
- Mbuti mbotukonzya kuba mbuli Jesu mukuyanda kwiiya Leza?
Mibuzyo aimwi
- Bala Luka 2:41-52.
Nokuba kuti mulawo wakali kuzumizya buyo basankwa kujanika kumapobwe aamwaka, ncikozyanyo nzi cibotu Josefa a Maliya ncobakasiila bazyali basunu? (Lk. 2:41; Dt. 16:16; 31:12; Tus. 22:6)
Mbuti Jesu mbwaakasiya cikozyanyo cibotu kubana basunu mbuli mbobeelede kuswiilila bazyali babo? (Lk. 2:51; Dt. 5:16; Tus. 23:22; Kol. 3:20)
- Bala Matayo 13:53-56.
Mbabaani mazina bace ba Jesu bali bone baambidwe mu Bbaibbele, alimwi mbuti bamwi bobilo mbobakabelesyegwa kumpela mumbungano ya Banakristo? (Mt. 13:55; Inc. 12:17; 15:6, 13; 21:18; Gal. 1:19; Jak. 1:1; Jud. 1)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Mukwasyi wa Jesu Waunka ku Jerusalemu
Josefa a Mariya bapenga nobatamujana Jesu, pele walo wagambwa kuti tiibalikuzyi kwakumulangauda.
