Makani 90: Kali Amukaintu Amugoti
JESU waleya kuti apumune amugoti uuli mu Samaliya. Basikwiiya bakwe baunka mumunzi kwaakuula cakulya. Imukaintu Jesu ngwaambaula limwi waboola kuteka meenda. Jesu wati kumukaintu: ‘Ndilomba meenda aakunywa.’
Eeci camulamya kapati mukaintu. Hena ulicizyi ncaalaminwa? Nkaambo kakuti Jesu mu Juda, pele walo mu Samaliya. Alimwi bunji bwaba Juda tababayandi bana Samaliya. Alimwi tabaambauzyanyi pe. Pele Jesu ulabayanda bantu boonse. Aboobo wati: ‘Ikuti nowali muzyi uukulomba meenda aakunywa, noomulomba eelyo naakupa meenda aapa buumi.’
Mukaintu wati: ‘Mwami, mugoti mulamfwu alimwi tojisi acakutesya. Ino nkuli nkokonzya kujana meenda aaya aapa buumi?’
Jesu wati: ‘Ikuti wanywa meenda aamumugoti ooyu ulakonzya kufwa nyota alimwi, pele meenda ngendipa mebo alakonzya kupa kuti muntu apone kukabe akutamani.’
Mukaintu wati: ‘Mwami, ndipe meenda aayo! Elyo tandikafwi kabili nyota. Alimwi tandikabooli kabili kuno kuzyi kuteka meenda.’
Mukaintu uyeeya kuti Jesu waamba meenda eeni. Pele waamba kasimpe ka Leza abwami bwakwe. Aaka kasimpe kali mbuli meenda aapa buumi. Kalakonzya kupa muntu kuba abuumi butamani.
Lino Jesu waambila mukaintu kuti: ‘Koya ukaite mulumi wako wamana ujoke.’
Mukaintu waingula wati: ‘Tandijisi mulumi.’
Jesu wati: ‘Waingula kabotu. Pele wakali kwetwe kubasankwa bosanwe, aboobo musankwa ngokkala limwi tali mulumi wako pe.’
Mukaintu walamwa nkaambo zyoonse eezyi zyamasimpe. Ino Jesu wazyiba buti? Nkaambo kakuti Jesu ngonguwe Ooyo Uusyomezyedwe a Leza, eelyo Leza nguumwaambila twaambo toonse. Aciindi aawa basikwiiya ba Jesu bajoka, alimwi balamwa kubona nkwaambaula amukaintu mu Samaliya.
Ino ncinzi ncotwiiya kumakani aaya? Eeci citondezya kuti Jesu ulijisi luzyalo kubantu bamisyobo yoonse. Aswebo tweelede kuba mbuli nguwe. Tatweelede kuyeeya kuti bantu bamwi mbabi akaambo kakuti mbamusyobo uumbi. Jesu uyanda kuti bantu boonse bazyibe kasimpe katola kubuumi butamani. Atuswe mbweena tweelede kuba aluyando lwakugwasya bantu kwiiya kasimpe.
Johane 4:5-43; 17:3.
Mibuzyo
- Nkaambo nzi Jesu ncaaimina amugoti, alimwi ncinzi ncaambaula kumukaintu?
- Nkaambo nzi mukaintu walamwa, alimwi ncinzi Jesu ncaamba kumukaintu, alimwi nkaambo nzi?
- Ino meenda nzi mukaintu ngayeeya kuti Jesu ngaamba, pele mubwini meenda nzi ngaamba Jesu?
- Nkaambo nzi mukaintu walamwa Jesu naamupanduluda mbwapona, alimwi mbuti Jesu mbwatuzyiba twaambo ootu?
- Nziiyo nzi nzyotukonzya kwiiya kucibalo camukaintu amugoti?
Mibuzyo aimwi
- Bala Johane 4:5-43.
Kwiinda mukuba acikozyanyo ca Jesu, mbuti mbotweelede kubabona bantu bamubala uumbi naa bajisi bukkale bwiindenyi-indenyi? (Joh. 4:9; 1 Kor. 9:22; 1 Timo. 2:3, 4; Tit. 2:11)
Nimpindu nzi zyakumuuya ziboola kumuntu uuba sikwiiya wa Jesu? (Joh. 4:14; Is. 58:11; 2 Kor. 4:16)
Mbuti mbotukonzya kulumba mbuli bwakacita mukaintu muna Samaliya wakali kupya moyo kwaambila bantu zintu nzyaakaiya? (Joh. 4:7, 28; Mt. 6:33; Lk. 10:40-42)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Kuyiisya Mukaintu Muna Samariya
Jesu wamwaambila makani aalibonya kuti tanabuzuba waambila muntu umbi uuli woonse.
