Makani 91: Jesu Ulayiisya Acilundu
LANGA Jesu ulikkede aawa. Uyiisya bantu boonse aaba acilundu ca Galilaya. Aabo bakkede munsi lyakwe mbaasikwiiya bakwe. Wasala bali 12 kuba baapositolo bakwe. Baapositolo mbaasikwiiya ba Jesu mbayandisya kapati. Hena ulibazyi mazina aabo?
Kuli Saimoni Pita amunyina Andulu. Alimwi kuli Jakobo a Johane abalo mbanabunyina. Umwi mwaapositolo wiitwa kuti Jakobo alimwi umwi ngu Saimoni. Bobilo baapositolo baulikidwe zina likozyenyi lyakuti Judasi. Umwi ngu Judasi Isikaliyoti, eelyo wabili ngu Judasi kumwi wiitwa kuti Tadayo. Kumane kuli Filipo a Natanayeli (alimwi wiitwa kuti Batalomayo), Matayo a Tomasi.
Bajoke ku Samaliya, Jesu watalika kukambauka ciindi cakutaanguna, wati: ‘Bwami bwakujulu bulaafwiifwi.’ Hena ulibuzyi bwami? Ibwami nimfwulumende ini-ini ya Leza. Jesu ngomwami wanjiyo. Uuya kulela kujulu akuleta luumuno anyika. Nyika yoonse iya kusandulwa akuba paladaiso mubotu kwiinda mubwami bwa Leza.
Jesu uli waano kuyiisya bantu makani aamba bwami. Ulapandulula kuti: ‘Mboobu mbomweelede kupaila. Taateesu ooli kujulu, alilemekwe zina lyako. Abuboole Bwami bwako. Alucitwe luyando lwako ansi aano, mbweena mbuli kujulu.’ Bantu banji mupailo ooyu bawiita kuti, ‘Mupailo wa Mwami.’ Ibamwi balati ‘Mupailo wa Taateesu.’ Hena ulakonzya kuwaamba mupailo woonse?
Alimwi Jesu uuyiisya bantu mbobeelede kubalemeka bantunyina. Wati: ‘Amubacitile bantu eezyo nzyomuyanda kuti anywebo bamucitile.’ Hena toyandi kuti bantu kabakulemeka? Aboobo Jesu waamba kuti, tweelede kubalemeka bantu. Hena tacikaboti munyika yapaladaiso bantu boonse baakutalika kulemekana?
Matayo caandaano 5 kusikila ku 7; 10:1-4.
Mibuzyo
- Nkuli acifwanikiso Jesu nkwayiisya, alimwi mbabaani aabo bakkede munsi lyakwe?
- Mbabaani mazina baapositolo bali 12?
- Mbwami nzi Jesu mbwakambauka?
- Ncinzi Jesu ncayiisya bantu kuti kabapailila ncinco?
- Ncinzi Jesu ncaamba kujatikizya bantu mbobeelede kubeendelezya bantunyina?
Mibuzyo aimwi
- Bala Matayo 5:1-12.
Muunzila nzi motukonzya kutondezya kuti tulabikkila maano kuzintu zyakumuuya? (Mt. 5:3; Balo. 10:13-15; 1 Timo. 4:13, 15, 16)
- Bala Matayo 5:21-26.
Mbuti Matayo 5:23, 24 mbwakankaizya kuti cilongwe cesu abakwesu cilacijatikizya cilongwe cesu ncotujisi a Jehova? (Mt. 6:14, 15; Int. 133:1; Kol. 3:13; 1 Joh. 4:20)
- Bala Matayo 6:1-8.
Ninzila nzi zyakuba amuuya wakulibona kululama Banakristo nzyobeelede kuleka? (Lk. 18:11, 12; 1 Kor. 4:6, 7; 2 Kor. 9:7)
- Bala Matayo 6:25-34.
Ncinzi Jesu ncaakayiisya kujatikizya mbociyandika kusyoma muli Jehova caboola kumakani aazintu zyakumubili? (Kul. 16:4; Int. 37:25; Flp. 4:6)
- Bala Matayo 7:1-11.
Mbuti mbocituyiisya cikozyanyo cijanika ku Matayo 7:5? (Tus. 26:12; Balo. 2:1; 14:10; Jak. 4:11, 12)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Mulumbe Waacilundu Uuzyibidwe Kapati
Amujane bupanduluzi bwatwaambo tupati-pati mumulumbe ngwaakaamba Jesu.
NGAZI YAMULINDIZI
