Makani 92: Jesu Wabusya Bafwide
MWANA musimbi ooyu ngobwenyi waawa ujisi myaka iili 12. Jesu wamujata kujanza, eelyo banyina abaswaabo baliimvwi afwaafwi. Hena ulicizyi ncobalibonya kukkomana boobu? Atucibone.
Baswaabo mwana ooyu, mbalupati-pati mucikombelo alimwi zina lyabo mbaba Jailo. Buzuba bumwi mwana wabo wakaciswa, kumane bakamulazika abulo. Pele taponi pe. Uya ampela buya kuciswa. Jailo amukaintu wakwe banyongana kapati, nkaambo kulibonya kuti mwana wabo ulafwa. Ngomwana alikke luzutu ngobajisi. Aboobo Jailo waunka kwaakulangaula Jesu. Wakamvwa maleele Jesu ngaakacita.
Jailo amujane Jesu, wajana bantu bamubunganina. Pele Jailo wapenauka mubantu akuwa kumaulu aa Jesu, wati: ‘Mwana wangu waciswa kapati.’ Walomba wati: ‘Ndakomba boola umuponye.’ Kumane Jesu wavwiila wati ndilaboola.
Nobaya ceenda, bantu baya citontana kutegwa basike munsi lya Jesu. Cakutayeeyelwa Jesu waima. Wabuzya kuti: ‘Ngwani wandiguma?’ Jesu wamvwa kuti nguzu zyazwa, aboobo wazyiba kuti kuli muntu wamuguma. Pele ino ngwani? Mukaintu wakali kuciswa kapati kwamyaka iili 12. Wakaboola akuguma zisani zya Jesu, eelyo wakapona.
Eeci camukkazyika moyo Jailo nkaambo wabona mbocitamukatazyi Jesu kuponya muntu. Kumane sikutumwa waboola. Wati kuli Jailo: ‘Mutamukatazyi Jesu. Mwana wanu wafwa.’ Jesu wamvwa, amane wati kuli Jailo: ‘Utapengi, ulaba kabotu mwana wako.’
Nibasika kuŋanda ya Jailo, bajana kuti bantu balalila ceetezya. Pele Jesu wati: ‘Utalili! Mwana tanaafwa. Uloona.’ Pele baseka akumufwubaazya Jesu, nkaambo balizyi kuti mwana ulifwide.
Kumane Jesu wabweza baswaabo mwana abanyina alimwi abaapositolo botatwe banjila muŋanda muli mwana. Jesu wamujata kujanza, wati: ‘Buka!’ Wabuka mbuli mbobona aawa. Wanyamuka akutalika kweendeenda. Nkakaambo kaako banyina abaswaabo ncobakkomenyi kapati.
Ooyo tali muntu wakutaanguna Jesu ngwaakabusya. Wakutaanguna Ibbaibbele ngolyaamba mwana wamukamufwu uukkala mumunzi wa Naini. Kumane Jesu wakabusya a Lazalo mucizyi wa Maliya a Malita. Jesu aakulela kali mwami wa Leza, uya kubusya bantu banji bafwide. Hena tatukonzyi kukkomana kumakani aaya?
Luka 8:40-56; 7:11-17; Johane 11:17-44.
Mibuzyo
- Mbabaani baswaabo mwana bali acifwanikiso, alimwi nkaambo nzi baswaabo abanyina ncobauside kapati?
- Ncinzi Jailo ncaacita naamujana Jesu?
- Ncinzi cacitika Jesu keenda kuya mumunzi wa Jailo, alimwi mulumbe nzi Jailo ngwaatambula kali munzila?
- Nkaambo nzi bantu muŋanda ya Jailo ncobamuseka Jesu?
- Ncinzi Jesu ncaacita naamana kubweza baapositolo botatwe alimwi abaswaabo mwana kubikkilizya abanyina akubanjizya muŋanda muli mwana?
- Ngwani aumwi Jesu ngwaabusya, alimwi ino eeci citondezya nzi?
Mibuzyo aimwi
- Bala Luka 8:40-56.
Mbuti Jesu mbwaakatondezya luzyalo abupampu kumukaintu wakali kuzwa bulowa, alimwi ncinzi sunu baalu Banakristo ncobakonzya kwiiya kumakani aaya? (Lk. 8:43, 44, 47, 48; Lev. 15:25-27; Mt. 9:12, 13; Kol. 3:12-14)
- Bala Luka 7:11-17.
Mbuti aabo basowekelwa bayandwa mulufwu mbobakonzya kuumbulizyigwa kapati mbuli Jesu mbwaakacita kumukamufwu mukaintu waku Naini? (Lk 7:13; 2 Kor. 1:3, 4; Heb. 4:15)
- Bala Johane 11:17-44.
Mbuti Jesu mbwaatondezya kuti cili buyo kabotu kulila muyandwa wafwa? (Joh. 11:33-36, 38; 2 Sam. 18:33; 19:1-4)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Mwana Musimbi Wabuka!
Bantu bamuseka Jesu naamba kuti mwana musimbi uufwide woona buyo. Ncinzi walo ncazyi bantu ncobatazyi?
JESU—NENZILA, NGOKASIMPE, MBOBUUMI
Jesu Wabusya Mwana Wamukamufwu
Aabo ibakabona maleele aaya bakacizyiba cini ncaamba.
JESU—NENZILA, NGOKASIMPE, MBOBUUMI
Lazaro Wabusyigwa
Twaambo tobilo tutakonzyi kukazyigwa itujatikizya maleele aaya, twapa kuti nobaba basikumukazya Jesu baalilwe kutondezya kuti ngakubeja.
