BUZUBA bumwi Jesu waambila muntu umwi kuti weelede kuyanda mweenzyinyina. Muntu ooyu wamubuzya Jesu wati: ‘Ino ngwani mweenzuma?’ Jesu wazyiba ncayeeya muntu ooyu. Muntu ooyu uyeeya kuti ccita buyo mbocizwa limwi kubusena alimwi ambocikomba limwi mbabakonzya kuba beenzyinyina. Aboobo atubone Jesu ncaamba kumuntu ooyu.

Muziindi zimwi Jesu ulayiisya kwiinda mukwaana kaano. Oobu mbwaacita. Waana kaano kaamba zyamu Juda amu Samaliya. Twaiya kale kuti bunji bwaba Juda tababayandi bana Samaliya. Komvwa nkooko Jesu watalika kwaana.

Buzuba bumwi kwakali mu Juda wakali kweenda munzila yamalundu kuya ku Jeliko. Pele babbi bakamujata. Bakamunyanga mali akumuuma bamusiya kayuminide.

Kumane kwakaboola mupaizi mu Juda wakali kweenda munzila. Wamubona muntu waumwa. Ino uyeeya kuti ncinzi ncaakacita? Wakamuleya ngooyo waunka. Kwiinde ciindi kwakaboola aumwi mukombi. Wakali mu Levi. Hena wakaima? Peepe, awalo tanaakaima kugwasya muntu wakaumwa. Ulakonzya kumubona mupaizi amu Levi nkobeenda aalya munzila.

Pele bona muntu uli amuntu wakaumwa. Mu Samaliya. Aboobo ugwasya mu Juda. Umubikka musamu azilonda akumwaanga cisani. Kumane wamutola mu Juda kubusena nkwakonzya kupumuna akuti apone.

Amane kwaana, Jesu wamubuzya mubuzyo muntu ooyo wati: ‘Ino ngwani ngoyeeya kubantu aaba botatwe wakacita mbuli mweenzyinyina kuli yooyo wakaumwa? Hena mupaizi, mu Levi naa mu Samaliya?’

Waingula wati: ‘Mu Samaliya. Wakali siluzyalo kumuntu wakaumwa.’

Jesu wati: ‘Waamba kabotu. Aboobo koya ukacitile bantu mbuli mbwaakacita.’

Hena tacikukondi Jesu mbwayiisya? Tulakonzya kwiiya zintu zinji alimwi ziyandika ikuti katuswiilila Jesu nzyaamba mu Bbaibbele. Hena inga caala kucita oobo?

Luka 10:25-37.