Makani 98: Acilundu ca Eliyoni
OOYU ngu Jesu a Cilundu ca Eliyoni. Bantu bali bone mbocili limwi mbaapositolo bakwe. Andulu a Pita mbanabunyina, awalo Jakobo a Johane mbanabunyina. Eeli nditempele lya Leza mu Jelusalemu ndyobona atala aalya.
Kwainda buyo mazuba obilo kuzwa ciindi Jesu naakanjila mu Jelusalemu kakkwelede amwana wambongolo. Aboobo muuli Bwabili. Cifwumofwumo Jesu wali kutempele. Okuya bapaizi bali kuyanda kumujata Jesu kuti bamujaye. Pele bayoowa kumujaya nkaambo bantu balamuyanda Jesu.
Jesu wati kubasololi bazikombelo: ‘Nywebo nobazoka alimwi nobana banzoka!’ Kumane Jesu wakati Leza uya kubasubula akaambo kazintu zibi zyoonse nzyobakacita. Amane Jesu waunka kucilundu ca Eliyoni, eelyo baapositolo bone batalika kumubuzya mibuzyo. Hena ulicizyi ncobamubuzya Jesu?
Ibaapositolo bamubuzya zintu ziya kucitika kumpela. Balizyi kuti Jesu uya kubumana boonse bubi buliko anyika. Pele bayanda kuzyiba kuti ndilili eeci niciya kucitika. Ino ndilili Jesu naya kuboola alimwi kuti alele kali Mwami?
Jesu ulizyi kuti basikwiiya bakwe anyika tabakakonzyi kumubona aakuboola alimwi. Nkaambo kakuti unakuli kujulu alimwi tabakakonzyi kumubona kujulu. Amane Jesu wabaambila baapositolo bakwe zintu zimwi zina kucitika anyika anikulela kujulu kali Mwami. Ino nzintu nzi zimwi eezyi?
Jesu wati kuya kuba nkondo ziyoosya kapati, bantu banji bana kuciswa akufwa nzala, bubi buya kwiindilila alimwi kuya kuba mizuzumo mipati yanyika. Alimwi Jesu wati, makani mabotu aabwami bwa Leza aya kukambaukwa munyika yoonse. Hena ulazyibona zintu eezyi kazicitika mazuba aano? Inzya. Aboobo tulakonzya kuba masimpe kuti lino Jesu ulalela kujulu. Ino-ino uya kubumana bubi boonse buli anyika.
Matayo 21:46; 23:1-39; 24:1-14; Maako 13:3-10.
Mibuzyo
- Ino nguli Jesu aawa abantu bali acifwanikiso, alimwi mbabaani mbocili limwi?
- Ncinzi bapaizi ncobali kusola kucita kuli Jesu mutempele, alimwi ncinzi ncaabaambila?
- Ncinzi baapositolo ncibamubuzya Jesu?
- Nkaambo nzi Jesu ncaabaambila baapositolo bakwe zintu zimwi zina kucitika anyika aakutalika kulela kujulu kali Mwami?
- Ncinzi Jesu ncaamba kuti ciya kucitika katana nyonyoona bubi boonse buli anyika?
Mibuzyo aimwi
- Bala Matayo 23:1-39.
Nokuba kuti Magwalo alatondezya kuti mazina aabulemu alakonzya kubelesyegwa, ino ncinzi majwi aa Jesu aalembedwe ku Matayo 23:8-11 ncaatondezya kujatikizya kubelesya mazina aabulemu mumbungano ya Banakristo? (Inc. 26:25; Balo. 13:7; 1 Pita 2:13, 14)
Ncinzi ba Falisi ncobakabelesya kusinkila bantu kuba Banakristo, alimwi mbuti basololi bazikombelo mbobabelesya nzila iikonzyenyi ayeeyi mazuba aano? (Mt. 23:13; Lk. 11:52; Joh. 9:22; 12:42; 1 Tes. 2:16)
- Bala Matayo 24:1-14.
Mbuti kuliyumya mbokukankaizyigwa ku Matayo 24:13?
Ncinzi bbala lyakuti “kumamanino” ncolyaamba ku Matayo 24:13? (Mt. 16:27; Balo. 14:10-12; 2 Kor. 5:10)
- Bala Maako 13:3-10.
Majwi nzi aajanwa ku Maako 13:10 aatondezya kubindaana kwakukambauka makani mabotu, alimwi mbuti majwi aa Jesu mbwaayelede kutujatikizya? (Balo. 13:11, 12; 1 Kor. 7:29-31; 2 Timo. 4:2)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Baapostolo Balomba Kupegwa Citondezyo
Businsimi bakwe bwakazuzikizyigwa ciindi cakusaanguna mumwaanda wamyaka wakusaanguna. Sena alimwi bwakali kuyoozuzikizyigwa munzila mpati kumbele?
NGAZI YAMULINDIZI
Sena Mamanino Alaafwaafwi?
Amulange-lange zitondezyo zyone izitondezya kuti tuli kumazuba aamamanino izyaambidwe mu Bbaibbele.
