Makani 106: Kwaangululwa Muntolongo
LANGA mungelo nkwajalula cijazyo caŋanda yantolongo. Ibantu mbaangulula mbaapositolo ba Jesu. Atubone cakapa kuti babikkwe muntolongo.
Kwainda buyo mazuba masyoonto kuzwa ciindi muuya uusalala nowakatilwa ali basikwiiya ba Jesu. Alimwi mboobu mbocakacitika: ‘Buzuba bumwi kumazuba Pita a Johane bakanjila mutempele mu Jelusalemu. Munsi aamulyango kwakali muntu mulema kuzwa naakazyalwa. Bantu balamutola abuzuba okuya kutegwa kalomba mali kubantu banjila mutempele. Aboobo ababone buyo ba Pita a Johane, wabalomba kuti bamupe cimwi cintu. Ino baapositolo balacita nzi?
Baima bamulanga mupenzi. Pita wati: ‘Tandijisi mali pe, pele ndilakupa ncendijisi. Kwiinda muzina lya Jesu, nyamuka weende!’ Kumane Pita wamunyamuna muntu ajanza lyakwe lyalulyo, mpamunya watalika kusotooka akweenda. Bantu babone buyo cacitika eeci, balamwa akukkomana kapati kumaleele aaya aataliboteli.
Pita wati: ‘Nkwiinda munguzu zya Leza wakabusya Jesu nzyotwabelesya kumaleele aaya. Kacaambaula Pita a Johane, basololi bazikombelo basika. Bakalala nkaambo Pita a Johane baambila bantu kuti Jesu wakabusyigwa. Aboobo babajata akubabikka muntolongo.
Buce buyo, basololi bazikombelo baba amuswaangano mupati. Pita a Johane kubikkilizya amuntu ngobakaponya baletwa kuti babetekwe. Ibasololi bazikombelo babuzya kuti: ‘Nkwiinda munguzu zyaani nzyomwacita maleele aaya?’
Pita wabaambila wati: ‘Nkwiinda munguzu zya Leza wakabusya Jesu. Bapaizi babula acakucita, nkaambo tabakonzyi kukazya kuti maleele aaya aataliboteli akacitika ncobeni. Aboobo babaambila baapositolo kuti batakaambi kabili makani aamba zya Jesu, kumane babaangulula baunka.
Mbwaaya ciya mazuba, baapositolo bazumanana kukambauka makani aamba zya Jesu akuponya baciswa. Makani aaya aamaleele asakana cisi coonse. Alimwi bantu bali muminzi iili mumbali-mbali lya Jelusalemu baleta baciswa kubaapositolo kuti babaponye. Basololi bazikombelo baba amunyono, aboobo babajata baapositolo akubabikka muntolongo. Pele tiibakkala ciindi cilamfwu muntolongo.
Ciindi camasiku mungelo wa Leza wajalula cijazyo cantolongo mbuli mbobona aawa. Mungelo wati: ‘Kamuya mukaime mutempele kamuujisi kwaambaula kubantu.’ Buce buyo, basololi bazikombelo nobatuma bantu kuntolongo kwaakuleta baapositolo, bajana kuti bazwa. Kwiinde ciindi babajana balayiisya mutempele, eelyo babaleta mu Nkuta Mpati.
Basololi bazikombelo bati: ‘Twakamwaambila kuti mutakayiisyi kabili makani aamba zya Jesu. Kamulanga lino mu Jelusalemu mwaile kuvwula kuyiisya kwanu.’ Kumane baapositolo baingula kuti: ‘Tweelede kumvwida Leza muleli ikutali bantu balya maila.’ Eelyo bazumanana kuyiisya “makani mabotu.” Hena eeco tacili cikozyanyo cibotu kuccilila?
Incito caandaano 3 kusikila ku 5.
Mibuzyo
- Ncinzi cakacitika kuli Johane a Pita buzuba bumwi kumazuba kabanjila mutempele?
- Ncinzi Pita ncaakaamba kumuntu mulema, alimwi ncinzi Pita ncaakamupa cilaampindu kapati kwiinda mali?
- Nkaambo nzi basololi bazikombelo bakalala, alimwi ncinzi ncibamucita Pita a Johane?
- Ncinzi Pita ncaamba kubasololi bazikombelo, alimwi ncinzi ncibabaambila baapositolo kuti batakaambi kabili?
- Nkaambo nzi basololi bazikombelo ncobaba amunyono, pele ncinzi cacitika baapositolo nobabikkwa muntolongo kwaciindi cabili?
- Mbuti mbobaingula baapositolo nobaletwa mu Nkuta mpati?
Mibuzyo aimwi
- Bala Incito 3:1-10.
Nokuba kuti tatupedwe nguzu zyakucita maleele mazuba aano, mbuti majwi aa Pita aalembedwe ku Incito 3:6 mbwaatugwasya kubona mbouyandika mulumbe wa Bwami? (Joh. 17:3; 2 Kor. 5:18-20; Flp. 3:8)
- Bala Incito 4:1-31.
Notukazyigwa mumulimo, muunzila nzi mbotukonzya kwiiya bakwesu Banakristo bamumwaanda wamyaka wakutaanguna? (Inc. 4:29, 31; Ef. 6:18-20; 1 Tes. 2:2)
- Bala Incito 5:17-42.
Mbuti bantu batali Bakamboni ibakaindi alimwi abasunu mbobacita camaano kumakani aamulimo wakukambauka? (Inc. 5:34-39)
