Makani 107: Sitivini Wapwaigwa Mabwe
MUNTU ooyu uufwugemi waawa ngu Sitivini. Ngusikwiiya uusyomeka wa Jesu. Pele langa lino cicitika kuli nguwe! Ibantu aaba bamupwaya mabwe. Nkaambo nzi ncobamusulide Sitivini cakuti bacita cintu cibi cili boobu? Atubone.
Leza wali kumugwasya Sitivini kucita maleele aakkomanisya. Bantu aaba tabaayandi makani aaya, aboobo batalika kumuzwanganya akaambo kakasimpe nkayiisya bantu. Pele Leza wamupa Sitivini busongo bunji, alimwi Sitivini waamba nzyobayiisya bantu aaba kuti nzyakubeja. Eeci cainda kubakalazya. Aboobo bamujata, alimwi baita bantu kutegwa bamubejelezye.
Mupaizi mupati wamubuzya Sitivini kuti: ‘Hena makani aaya ngamasimpe?’ Sitivini waingula kwiinda mukukanana makani aakondelezya aamu Bbaibbele. Kumamanino aamakani waamba mbuli bantu babi mbobatakali kubayanda basinsimi ba Jehova kaindi. Kumane Sitivini wati: ‘Nywebo muli mbuli baabo bantu. Mwakamujaya Jesu mubelesi wa Leza alimwi taku nimwaccilila milawo ya Leza.’
Eeci cabakalazya basololi aaba bazikombelo cakuti boola ubone. Batalika kulizya menyo kukalala kwalo. Kumane Sitivini walungumika mutwe mujulu wati: ‘Amubone! Ndabona Jesu kujulu uliimvwi kubbazu lyalulyo lwa Leza.’ Bamvwe boobo bantu aaba balisinka mumatwi amaanza, kumane babalika kuli Sitivini. Bamujata akumukwelela kunze aamunzi.
Kuno basakununa zyakusama zyaatala akupa mukubusi Saulu kuti abajatile. Hena wamubona Saulu? Kumane bamwi bantu batalika kumupwaya mabwe Sitivini. Sitivini wafwugama kweelana ambobona, eelyo wapaila kuli Leza wati: ‘Jehova utabasubuli kucibi eeci ncobacita.’ Ulizyi kuti bamwi bauninwa buya abasololi bazikombelo. Kumane Sitivini wafwa.
Ikuti muntu wakucitila cibi, hena ulajola cibi kucibi naa waambila Leza kuti ajole nguwe? Oobo tabusyi mbwaakacita Sitivini naba Jesu. Bakalijisi lubomba nokuba kuli baabo batakajisi lubomba kuli mbabo. Atwiiye cikozyanyo cabo.
Milimo 6:8-15; 7:1-60.
Mibuzyo
- Ngwani Sitivini, alimwi ncinzi Leza ncaali kumugwasya kucita?
- Ncinzi Sitivini ncaamba capa kuti basololi bazikombelo bakalale kapati?
- Ncinzi bantu ncibamucita Sitivini nibamukwelela anze aamunzi?
- Ngwani musankwa uucili mwana uimvwi munsi aazisani?
- Ncinzi Sitivini ncaapaila kuli Jehova katanafwa?
- Kwiinda mukwiiya Sitivini, ncinzi ncotweelede kucita ikuti muntu watulubizyila?
Mibuzyo aimwi
- Bala Milimo 6:8-15, Ci.
Ninzila nzi nzyibi basololi bazikombelo nzyobabelesya kusola kulesya mulimo wakukambauka wa Bakamboni ba Jehova? (Mili. 6:9, 11, 13)
- Bala Milimo 7:1-60.
Ncinzi cakamugwasya Sitivini kuba musungu mukwiiminina kasimpe kumpela lya Nkuta Mpati, alimwi ncinzi ncotukonzya kwiiya kucikozyanyo cakwe? (Mili. 7:51-53; Balo. 15:4; 2 Timo. 3:14-17; 1 Pita 3:15)
Muunzila nzi motweelede kubabona aabo bakazya mulimo wesu? (Mili. 7:58-60; Mt. 5:44; Lk. 23:33, 34)
