Makani 108: Munzila Kaya ku Damasiko
HENA ulimuzyi ooyu uulede ansi? Ngu Saulu. Koyeeya kuti ngonguyo wakabajatila zisani bantu baya bakali kupwaya Sitivini mabwe. Langa mumuni ooyu uumweka kapati! Ncinzi cicitika?
Sitivini amane kujaigwa, Saulu waba nguuli kumpela kwaanga basikwiiya ba Jesu kutegwa abajaye. Ulanjila muŋanda aŋanda akubajata akubabikka muntolongo. Ibunji bwabasikwiiya baccijila muminzi iimwi akutalika kukambauka “makani mabotu” ooko. Pele Saulu waunka kumunzi umwi kwaakulangaula basikwiiya ba Jesu. Aawa lino uli munzila kuya ku Damasiko. Pele kali munzila eeci ncecintu cilamya camucitikila.
Cakutayeeyelwa mumuni uuzwa kujulu wamweka mpabede Saulu. Kumane Saulu wawa muzinga mbuli mbobona aawa. Eelyo jwi lyati: ‘Saulu, Saulu! Nkaambo nzi ncondipenzyela?’ Ibantu mbocili a Saulu baubona mumuni akumvwa jwi, pele tabakonzyi kumvwa caambwa.
Saulu wabuzya: ‘Nduweni Mwami?’
Ijwi lyati: ‘Ndime Jesu ngopenzya.’ Jesu waamba boobu akaambo kakuti Saulu napenzya basikwiiya ba Jesu, Jesu ulimvwa mbuli kuti nguupenzyegwa.
Saulu wabuzya kuti: ‘Ino ndicite buti Mwami?’
Jesu wati: ‘Nyamuka uunke ku Damasiko. Okuya uya kwaambilwa ncoyelede kucita.’ Saulu anyamuke akusola kulanga, wajana kuti taboni. Wabaya! Aboobo bantu mbocili limwi bamukwela kujanza kuya ku Damasiko.
Lino Jesu waambila Hananiya umwi wabasikwiiya bakwe mu Damasiko kuti: ‘Nyamuka. Koya kumugwagwa wiitwa kuti mugwagwa Wiimvwi Nci. Kuŋanda ya Juda mukabuzye muntu wiitwa kuti Saulu. Ndamusala kuba mubelesi wangu uuyandika kapati.’
Hananiya waccilila ncaalaililwa. Amujane Saulu, wabikka maanza ali nguwe wati: ‘Mwami wandituma kuti utalike kulanga alimwi akuti utambule muuya uusalala.’ Aciindi aawa cintu cimwi cili mbuli makwa caloka mumeso aa Saulu, eelyo watalika kulanga alimwi.
Saulu wabelesyegwa kapati kukambauka kubantu bamisyobo minji. Wakacinca akuba mwaapositolo Paulu walo ngotulaaiye kapati kumpela ooku. Pele cakusaanguna atubone Leza ncaamutuma Pita kuti akacite.
Incito 8:1-4; 9:1-20; 22:6-16; 26:8-20.
Mibuzyo
- Ncinzi Saulu ncaacita Sitivini naajaigwa?
- Saulu kali munzila kuya ku Damasiko, ncintu nzi cilamya cacitika?
- Ncinzi Jesu ncaamwaambila Saulu kuti acite?
- Malailile nzi Jesu ngaapa Ananiya, alimwi mbuti Saulu mbwaakonzya kutalika kulanga alimwi?
- Ino Saulu wacinca zina akuba ni, alimwi mbuti mbwaabelesyegwa?
Mibuzyo aimwi
- Bala Incito 8:1-4.
Mbuti penzi lyakanjilila mbungano mpya ya Banakristo mbolyakagwasya kumwaya makani aa Banakristo, alimwi ncinzi cikozyenyi aceeci cacitika mazuba aano? (Inc. 8:4; Is. 54:17)
- Bala Incito 9:1-20.
Muunzila nzi zyotatwe zyamulimo Jesu mwaakatondezya kuti wakali kumuyanda Saulu kuti amumanine milimo? (Inc. 9:15; 13:5; 26:1; 27:24; Balo. 11:13)
- Bala Incito 22:6-16.
Mbuti mbotukonzya kuba mbuli Ananiya, alimwi nkaambo nzi eeci ncociyandika? (Inc. 22:12; 1 Timo. 3:7; 1 Pita 1:14-16; 2:12)
- Bala Incito 26:8-20.
Mbuti kusanduka kwa Saulu kuba Munakristo mbokunga mazuba aano kwakulwaizya baabo bakwete naa bakwetwe kubantu batasyomi? (Inc. 26:11; 1 Timo. 1:14-16; 2 Timo. 4:2; 1 Pita 3:1-3)
