OOYO ngu Pita mwaapositolo wiimvwi waawa, aabo baimvwi kunze lyakwe mbeenzyinyina bamwi. Pele ino nkaambo nzi muntu ooyu ncamufwugamina Pita? Hena uleelede kucita boobo? Alimwi hena ulimuzyi?

Muntu ooyu ngu Koneliyo. Mupati wabasikalumamba wabana Loma. Koneliyo tamuzyi Pita, pele wakaambilwa kuti akamutambe Pita. Atubone eeci mbocakatalika.

Basikwiiya ba Jesu bakutaanguna bakali ba Juda, pele Koneliyo tali mu Juda. Pele ulamuyanda Leza, ulapaila kuli nguwe akucitila bantu zintu zinji zibotu. Buzuba bumwi kumazuba kwakaboola mungelo kuli nguwe wati: ‘Leza wakukkomanina, aboobo ulaivwiila mipailo yako yoonse. Tuma bantu baunke bakaite muntu uutegwa Pita. Ukkala mu Jopa muŋanda ya Saimoni uukkala munsi aalwizi.’

Cakutasowa ciindi Koneliyo watuma bantu kwaakwiita Pita. Buzuba bwakaccilila, bantu kabayanda kusika ku Jopa, bajana Pita ulikkede aciluli cisasabede caŋanda ya Saimoni. Kali aciluli, Leza wapa kuti Pita mumizeezo abone mulembo mupati uuzwa kujulu. Mumulembo kuli banyama bamisyobo-misyobo. Ikweelana amulawo wa Leza, banyama aaba tiibakali kusalala kulya pe, pele ijwi lyati: ‘Pita, nyamuka. Jaya ulye!’

Pita waingula wati: ‘Peepe! Taku nindakalide cintu citasalali.’ Pele jwi lyaambila Pita kuti: ‘Koleka kwaamba kuti tacisalali Leza ncaamba kuti cilasalala.’ Kwaziindi zyotatwe eeci cacitika. Pita kaciyeeya ncocaamba, bantu mbaatuma Koneliyo basika amunzi kumane babuzya naa nkwali Pita.

Pita waseluka wati: ‘Ndendime muntu ngomulangaula. Nkaambo nzi ncomundiyandila?’ Bantu nibapandulula kuti mungelo wakaambila Koneliyo kuti akamutambe Pita nkwazwa, eelyo Pita wazumina kuunka ambabo. Buce Pita abeenzyinyina baunka kwaakuswaya Koneliyo ku Kaisaleya.

Koneliyo waleta bamukowa wakwe abeenzyinyina beni-beni. Asike Pita, Koneliyo wamutambula camaanza obilo. Wafwugama kumaulu aa Pita mbuli mbobona aawa. Kumane Pita wati: ‘Nyamuka, andime ndili muntu buyo.’ Masimpe Bbaibbele litondezya kuti tacili kabotu kufwugamina muntu akumukomba. Tweelede kukomba buyo Jehova.

Lino Pita wakambauka kuli baabo babungenyi. Pita wati: ‘Ndabona kuti Leza ulatambula bantu boonse bamuyanda kumubelekela.’ Kacaambaula, Leza watumizya muuya wakwe uusalala, eelyo bantu batalika kwaambaula mumilaka iindenyi-indenyi. Eeci cabalamya basikwiiya ba Juda baboola a Pita, nkaambo bali kuyeeya kuti Leza utambula buyo ba Juda. Aboobo eeci cibayiisya kuti Leza talangi musyobo uumwi wabantu kuti mubotu kwiinda wabamwi, alimwi talangi kuti musyobo uumwi nguuyandika kapati kuli Leza kwiinda musyobo uumwi. Hena eeci tacili cintu cibotu kuli ndiswe toonse kuti katuciyeeya?

Milimo 10:1-48; 11:1-18; Ciyubunuzyo 19:10.