1. Amupandulule ncobali kucita balindizi ba Jehova bamubusinsimi alimwi azintu izyacitika.

MULINDIZI wakaimikila abwaanda bwa Jerusalemu, kumwi kalikwabilila kumeso ajanza lyakwe kumumuni wazuba ciindi nolyakali kubbila. Wakalangisisya alaale. Mukulaba kwaliso, wakanyamuna mweembo wakwe, wakakwela muya munji, alimwi akulizya ncenjezyo yakuti basikalumamba bana Babuloni bakali kuboola! Pele ciindi cakuti bantu bamumunzi aabo ibatakali kubikkila maano babweze ntaamu kukulila kwamweembo ooyu kuzwa kumulindizi cakaceya. Kwamyaka minji, balindizi ba Jehova ibakasalidwe, naa basinsimi, bakali kucenjezya kuti buzuba oobu bwakali kuyoosika; pele, bantu bakali kukaka kuswiilila. Lino basikalumamba bana Babuloni bakaluuzingulukide munzi. Nobakausinkila kwamyezi minji, basikalumamba bakabupwaya bwaanda bwamunzi akunjila, bakalinyonyoona tempele akubajaya naa kubatola mubuzike bantu bamu Jerusalemu.

2, 3. (a) Ino mbukkale buli buti ibubajatikizya bantu bamunyika mazuba aano? (b) Ino mibuzyo nzi njotutiilange-lange?

² Mazuba aano, basikalumba ba Jehova bayaabweenda kunkondo kutegwa balwane bantu bamunyika ibanyina lusyomo. (Ciy. 17:12-14) Inkondo eeyo iyooba ngamamanino aamapenzi mapati mubuumi bwabantu. (Mt. 24:21) Pele takunaba kumuka kubantu banji  ikubweza ntaamu kukucenjezya ikupegwa abaabo Jehova mbaasala kucita mulimo wamulindizi.

³ Ino ncinzi icimukulwaizya Jehova kusala balindizi? Ino mulumbe uuli buti ngwaambilizya mulindizi? Ino mbaani bajisi mukuli ooyu, alimwi ino ndubazu nzi ndotujisi? Atulange-lange bwiinguzi kumibuzyo eeyi.

4. Nkaambo nzi Jehova ncaakasalila balindizi? (Amubone cifwanikiso icili kumatalikilo aacibalo.)

⁴ Amubale Ezekieli 33:7. Kaindi, balindizi beni kanji-kanji bakali kwiimikila aabwaanda bwamunzi kutegwa bakwabilile bantu bamumunzi. Mulimo ngobakali kubeleka wakatondezya bumboni buzulide bwakuti mweendelezi wamunzi wakali kubabikkila maano balelwa bakwe. Nokuba kuti kulila kwamweembo kuzwa kumulindizi kwakali kukonzya kuyoosya bantu ibakali koona, kusabila ooko alimwi kwakali kukonzya kufwutula buumi bwabaabo ibakatobela ncokwakali kwaamba. Mbubwenya buyo, Jehova wakasala balindizi, kutali akaambo kakuti wakali kuyanda kuyoosya bana Israyeli amilumbe yalunyonyooko, pele akaambo kakuti wakali kubabikkila maano bantu bakwe alimwi wakali kuyanda kufwutula buumi bwabo.

5, 6. Ino muunzila nzi imwi bululami bwa Jehova mobulibonya?

⁵ Ciindi naakasala Ezekieli kuti abe mulindizi, Jehova wakayubununa mbazu zyabube bwakwe zyalo izitukulwaizya. Atubone bube bobilo buyo akati kabube oobo.

⁶ Bululami: Bululami bwa Jehova bulalibonya mukuti kunyina nasalulula mbwacita zintu kuli umwi aumwi wesu. Mucikozyanyo, nokuba kuti mulumbe wa Ezekieli wakamvwugwa akukakwa abantu banji, Jehova kunyina naakabona bana Israyeli boonse kuti ninkamu yabazangi; muciindi caboobo, wakali kuyanda kubona umwi aumwi mbwaakali kukonzya kuutambula mulumbe. Wakaamba cakwiinduluka-induluka kujatikizya “mubi” alimwi ‘amululami.’ Aboobo, Jehova wakaleta lubeta kweelana umwi aumwi mbwaakautambula mulumbe.—Ezk. 33:8, 18-20.

7. Ncinzi Jehova ncalanga-langa ciindi nabeteka bantu?

⁷ Bululami bwa Jehova alimwi bulakonzya kubonwa kwiinda munzila mbwababeteka bantu. Umwi aumwi ulabetekwa, ikutali akaambo kazintu nzyaakacita kaindi, pele akaambo kambwakutambula kucenjezya kucitwa aciindi eeco. Jehova wakaambila Ezekieli kuti: “Ciindi nendaambila muntu mubi kuti: ‘Ncobeni yebo ulafwa,’ kumane walo waleka cibi cakwe akucita cintu ciluzi alimwi ciluleme, . . . ncobeni uyoozumanana kupona.” Mpoonya Jehova wakaamba kaambo kakkomanisya kakuti: “Kunyina cibi nociba comwe akati kazibi nzyaakacita ciyooyeeyegwa kutegwa apegwe mulandu.” (Ezk. 33:14-16) Kulubazu lumwi, aabo ibakatobela nzila yabululami tabakonzyi kulangila kumvwida nkobakacita kaindi kubapa kutabetekwa akaambo kabuzangi bwabo lino. Jehova wakaamba kuti, ikuti muntu “wasyoma bululami bwakwe mwini akucita cintu citaluzi, kunyina mulimo nouba omwe akati kamilimo yakwe iiluleme uuyooyeeyegwa, pele uyoofwa akaambo kacintu eeco citaluzi ncaacita.”—Ezk. 33:13.

8. Ino kutuyiisya nzi kucenjezya kwabusinsimi kujatikizya bululami bwa Jehova?

 ⁸ Kuyungizya waawo, mbwabubona bululami Jehova kulalibonya mukuti ulacenjezya kakucili kooko kutegwa bantu babweze ntaamu. Ezekieli wakatalika mulimo wakwe kakucili myaka iili cisambomwe kuti basikalumamba bana Babuloni banyonyoone Jerusalemu. Pele Ezekieli tanaakali wakusaanguna kucenjezya bantu ba Leza kuti bakali kuyoobetekwa. Kwamyaka yiinda kumwaanda omwe kuti Jerusalemu anyonyoonwe, Jehova wakatuma basinsimi mbuli Hosea, Isaya, Mika, Odedi alimwi a Jeremiya kuti babeleke kabali balindizi. Jehova wakatuma Jeremiya kuyeezya bana Israyeli kuti: “Ndakabikka balindizi ibakaamba kuti, ‘Amubikkile maano kukulila kwamweembo!’” (Jer. 6:17) Kunyina iwakali kukonzya kupegwa mulandu akati ka Jehova abalindizi akaambo kabantu ibakafwa ciindi Jehova naakabelesya bana Babuloni kunyonyoona Jerusalemu.

9. Mbuti Jehova mbwaakatondezya luyando lutamani?

⁹ Luyando: Jehova wakatondezya luyando lutamani kwiinda mukutuma balindizi bakwe kutegwa bacenjezye balulami alimwi abasizibi, nkokuti aabo ibakamutyompya akumubisizya zina. Amuciyeeyele buyo, bana Israyeli bakazyibidwe kuti mbantu ba Jehova, pele cakwiinduluka-induluka bakali kumuzangila akutalika kukomba baleza bakubeja! Ciindi nobakamuzangila munzila eeyi, Jehova wakatondezya bwini mbocakamucisa mumoyo kwiinda mukukozyanisya cisi kumukaintu simamambe. (Ezk. 16:32) Nokuba boobo, Jehova tanaakabalekelezya cakufwambaana. Wakayandaula nzila yakubayanzanya, ikutali kubanyonyoona. Wakabona kubelesya panga lyalubeta kuba nzila yamamanino, ikutali kwiibelesya kumatalikilo. Nkaambo nzi? Wakaambila Ezekieli kuti: “Tandilukkomanini pe  lufwu lwamuntu mubi, pele ndiyanda kuti muntu mubi aleke nzila yakwe akuzumanana kupona.” (Ezk. 33:11) Mbombubo mbwaakalimvwa Jehova oobo kaindi, alimwi mbombubo mbwalimvwa amazuba aano.—Malk. 3:6.

10, 11. Ino nziiyo nzi nzyotukonzya kwiiya kujatikizya mbwaakali kubeendelezya bantu bakwe Jehova?

¹⁰ Ino ncinzi ncotukonzya kwiiya kuzwa kunzila yabululami alimwi yaluyando Jehova mbwaakeendelezya bana Israyeli? Ciiyo cimwi ncakuti bantu mbotukambaukila tatweelede kubabona kabali kabunga, pele tweelede kubona muntu umwi aumwi kumugama. Eelo kaka kulakonzya kuba kulubizya ikumubetekela limwi muntu kuti teeleli kumvwa mulumbe ngotukambauka akaambo kamicito yakwe yakaindi naa akaambo kazilengwa, mwaambo, mbwapona, naa mulaka wakwe! Jehova wakayiisya mwaapostolo Petro ciiyo ciyandika kapati naaba mazuba aano icakuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Mil. 10:34, 35.

¹¹ Acimwi ciiyo ciyandika kapati ncakuti tweelede kulilingula tobeni, milimo yabululami yakaindi taipi kutabetekwa akaambo kazibi nzyotucita lino. Tweelede kuyeeya kuti tulijisi tumpenda twakutalondoka ituli mbuli tobajisi aabo mbotukambaukila. Ilulayo oolu mwaapostolo Paulo ndwaakapa bana Korinto lulabeleka akulindiswe: “Ooyo uuyeeya kuti wiimvwi kabotu acenjele kutegwa atawi. Kunyina sunko lyakamucitikila nywebo litabacitikili bamwi.” (1Kor. 10:12, 13) Kunyina notukonzya kuyanda kuba muntu ‘uusyoma bululami bwakwe mwini,’ katuyeeya kuti tulakonzya kucita cibi kakunyina kusubulwa akaambo kakuti tulacita milimo mibotu. (Ezk. 33:13) Kufwumbwa naa twamubelekela kwaciindi cilamfwu  buti Jehova, cilayandika kapati kuzumanana kuba abube bwakulicesya akumvwida.

12. Ikuti naa twakacita cibi cipati kaindi, ino ncinzi ncotweelede kuyeeya?

¹² Ino mbuti ikuti naa twakacita cibi cipati kaindi pele lino tulimvwa kuusa? Kweelana amulumbe wa Ezekieli, twiiya kuti Jehova uyoobasubula basizibi bateempwi. Nokuba boobo, alimwi twiiya kuti Jehova ngu Leza siluyando, tapilusizyi muntu cibi. (1Joh. 4:8) Ikuti naa twatondezya kweempwa kwiinda mumilimo yesu, tatweelede kulimvwa kuti Leza takonzyi kutufwida luse akaambo kazibi zyesu. (Jak. 5:14, 15) Jehova wakalilibambilide kubalekelela bana Israyeli ibakali kucita bumambe bwakumuuya, alimwi ulilibambilide kutulekelela andiswe.—Int. 86:5.

13, 14. (a) Ino mulumbe uuli buti ngobakeelede kwaambilizya balindiziy? (b) Ino mulumbe nzi ngwaakaamba Isaya?

¹³ Amubale Ezekieli 33:2, 3. Ino mulumbe nzi ngobakeelede kwaambilizya balindizi ba Jehova? Cibeela cipati camulimo wabo cakali cakucenjezya. Pele alimwi bakali kwaambilizya amakani mabotu. Atulange-lange zikozyanyo zimwi.

¹⁴ Isaya, walo iwakabeleka kuzwa kuma 778 kusika mu 732 B.C.E., wakacenjezya kuti bana Babuloni bakali kuyoozunda Jerusalemu akutola bantu ibakali kukkala mulinguwo mubuzike. (Is. 39:5-7) Pele alimwi wakasololelwa amuuya kulemba kuti: “Swiilila! Balindizi bako baloompolola ajwi pati. Baloongolola antoomwe cakukondwa, nkaambo bayoolibonena cantongolameso Jehova aakubapilusya bantu bamu Ziyoni.” (Is. 52:8) Isaya wakaamba zyamulumbe mubotu kapati wakuti, bukombi busalala bwakali kuyoobukulusyigwa!

15. Ino mulumbe nzi ngwaakaamba Jeremiya?

¹⁵ Jeremiya, walo iwakabeleka kuzwa mu 647 kusikila ku 580 B.C.E., kanji-kanji wakali kutamikizyigwa kuti ciindi coonse wakali “kwaamba buyo zyamapenzi.” Cakutadooneka, wakacita mulimo uulibedelede wakucenjezya bana Israyeli basizibi kujatikizya mapenzi ngaakali kuyoobaletela Jehova. * Pele alimwi wakaambilizya amakani mabotu, wakasinsima kujatikizya kujokela kwabantu ba Leza kunyika yabo alimwi akubukulusyigwa kwabukombi busalala okuya.—Jer. 29:10-14; 33:10, 11.

16. Mbuti mulumbe wa Ezekieli mbowakabagwasya baange ibakali mu Babuloni?

¹⁶ Ezekieli wakasalwa kuba mulindizi mu 613 B.C.E., alimwi wakazumanana amulimo ooyu kusikila mu 591 B.C.E. Kweelana ambokwakaambwa mu Cibalo 5 alimwi a 6 cabbuku eeli, cabusungu Ezekieli wakacenjezya bantu bamucisi ca Israyeli zyalunyonyooko ilwakali kuyoobasikila, wakalisalazya kumulandu wabulowa uuli woonse wabantu bakali kuyoofwa. Naakali kucita boobo, tanaakacenjezya buyo baange kuti Jehova wakali kuyoobasubula basiluleyo pele alimwi wakabagwasya baange ibakali mu Babuloni kuzumanana kuyumya cilongwe cabo a Jehova kutegwa kabalibambilide. Kumamanino aamyaka iili 70 yabuzike, Jehova wakali kuyoobikka ibakasyeede munyika ya Israyeli iyakali kuyoobukulusyigwa. (Ezk. 36:7-11) Ibasyeede aaba bakali kuyoobikkilizya ikapati bana alimwi abazyukulu babaabo ibakakubikkila maano kucenjezya  kwa Ezekieli. Kweelana ambozyakakankaizya zibalo zimwi mu Cibeela 3 cabbuku eeli, Ezekieli wakajisi makani mabotu manji aakubaambila, kusinizya kuti bukombi busalala bwakali kuyoobukulusyigwa mu Jerusalemu.

17. Ino ndilili Jehova naakasala balindizi?

¹⁷ Sena basinsimi aaba ibakaambaula kubantu ba Leza ciindi Jerusalemu naakali kuyanda kunyonyoonwa mu 607 B.C.E. mbambabo balikke mbaakabelesya Jehova kuba balindizi? Bwiinguzi mbwakuti peepe! Kacitanacitika cintu cimwi acimwi iciyandika kapati ciindi naakali kuyanda kuti kuyanda kwakwe kuzuzikizyigwe, Jehova wakali kusala balindizi kutegwa bacenjezye basizibi alimwi akwaambilizya makani mabotu.

18. Ino mulimo nzi ngwaakacita Johane Mubbapatizi?

¹⁸ Mumwaanda wamyaka wakusaanguna C.E., Johane Mubbapatizi wakabeleka mulimo wabulindizi. Wakabacenjezya aabo ibakali bamuŋanda ya Israyeli wakumubili kuti ino-ino bakali kuyookakwa. (Mt. 3:1, 2, 9-11) Pele wakacita azimbi zinji. Jesu wakaamba kuti Johane wakali “mutumwa” iwakasinsimwa kuti wakabamba nzila ya Mesiya. (Malk. 3:1; Mt. 11:7-10) Cibeela camulimo ooyu cakali kubikkilizya akwaambilizya makani mabotu aakuti, “Mwanaambelele wa Leza,” Jesu, wasika alimwi uyoocigusya “cibi canyika.”—Joh. 1:29, 30.

19, 20. Mbuti Jesu abasikwiiya bakwe mbobakabeleka kabali balindizi?

¹⁹ Kubalindizi boonse, Jesu nguwakali kwiinda. Mbubwenya mbuli Ezekieli, wakatumwa a Jehova ‘kuŋanda ya Israyeli.’ (Ezk. 3:17; Mt. 15:24) Jesu wakacenjezya kuti cisi ca Israyeli wakumubili ino-ino cakali kuyookakwa alimwi akuti Jerusalemu wakali kuyoonyonyoonwa. (Mt. 23:37, 38; 24:1, 2; Lk. 21:20-24) Pele mulimo wakwe mupati wakali wakwaambilizya makani mabotu.—Lk. 4:17-21.

²⁰ Naakali anyika, Jesu cacigaminina wakaambila basikwiiya bakwe kuti: “Amulangile.” (Mt. 24:42) Bakaumvwida mulawo wakwe alimwi bakabeleka kabali balindizi, bakacenjezya kuti Jehova wakabakaka bamuŋanda ya Israyeli wakumubili alimwi amunzi waanyika wa Jerusalemu. (Rom. 9:6-8; Gal. 4:25, 26) Mbubwenya mbuli balindizi bakabasaangunina, abalo bakaambilizya makani mabotu. Mulumbe wabo wakali kubikkilizya akwaambilizya kuyandika kapati kwakuti Bamasi bakali kuyoobikkilizyigwa mubana Israyeli ba Leza bananikidwe amuuya alimwi bakali kuyoocikkomanina coolwe cakugwasya Kristo kubukulusya bukombi busalala anyika.—Mil. 15:14; Gal. 6:15, 16; Ciy. 5:9, 10.

21. Ino ncikozyanyo nzi ncaakatondezya Paulo?

²¹ Akati kabalindizi bamumwaanda wamyaka wakusaanguna, mwaapostolo Paulo wakatondezya cikozyanyo cibotu kapati. Wakaubeleka mulimo wakwe cabusungu. Mbubwenya mbuli Ezekieli, wakalizyi kuti wakali kuyooba amulandu wabulowa ikuti naakaalilwa kuuzuzikizya mulimo wakwe. (Mil. 20:26, 27) Katobela cikozyanyo cabalindizi bamwi, Paulo tanaakali kubacenjezya buyo bamwi pele alimwi wakali kwaambilizya amakani mabotu. (Mil. 15:35;  Rom. 1:1-4) Mubwini, kwiinda mukusololelwa amuuya uusalala, wakazubulula majwi aabusinsimi aakaambwa a Isaya aakuti: “Taaliboteli kaka atala aamalundu imaulu aamuntu uuleta makani mabotu,” alimwi wakaabelesya kumulimo wakacitwa abasikutobela Kristo ciindi nobakali kukambauka kujatikizya Bwami bwa Leza.—Is. 52:7, 8; Rom. 10:13-15.

22. Ncinzi cakacitika nobakafwa baapostolo?

²² Nobakafwa baapostolo, basiluleyo ibakasinsimwa bakanyonganya mbungano ya Banakristo. (Mil. 20:29, 30; 2Tes. 2:3-8) Muciindi eeco cakatola myaka minji, Banakristo bakubeja ibali mbuli nsaku bakavwula kapati kwiinda basikutobela Kristo ibakali mbuli wiiti, alimwi mulumbe uulimvwisya uujatikizya Bwami bwa Leza wakazula anjiisyo zyakubeja. (Mt. 13:36-43) Nokuba boobo, nocakasika ciindi cakuti Jehova abweze ntaamu muzintu izyakali kucitika, wakatondezya alimwi luyando lwakwe abululami kwiinda mukusala balindizi kutegwa bape kucenjezya kulimvwisya alimwi akwaambilizya makani mabotu. Ino mbaani ibakali balindizi aabo?

23. Ino mulimo nzi C. T. Russell alimwi abeenzinyina ngobakabeleka?

²³ Mumyaka misyoonto kautanasika mwaka wa 1914, Charles Taze Russell alimwi abeenzinyina bakabeleka mbuli “mutumwa” iwakali ‘kuyoobamba nzila’ kabutanakkazikizyigwa Bwami bwabu Mesiya. * (Malk. 3:1) Kabunga aako akalo kakabeleka mulimo wabulindizi, kakabelesya magazini ya Zion’s Watch Tower and Herald of  Christ’s Presence ikugwasya kucenjezya kujatikizya lubeta lwa Leza alimwi akumwaya makani mabotu aajatikizya Bwami bwa Leza.

24. (a) Mbuti muzike uusyomeka mbwaabeleka kali mulindizi? (b) Ncinzi ncomwaiya kucikozyanyo cabalindizi bakaindi? (Amubone ccaati yakuti “Balindizi Bamwi Ibakatondezya Zikozyanyo Zibotu.”)

²⁴ Kuzwa Bwami nobwakakkazikizyigwa, Jesu wakasala kakamu kasyoonto kabaalumi kuti babeleke kabali muzike uusyomeka. (Mt. 24:45-47) Kuzwa ciindi eeco, muzike uusyomeka, lino iwiitwa kuti Kabunga Keendelezya, wabeleka mulimo wamulindizi. Ulasololela kutali buyo mukucenjezya kujatikizya ‘buzuba bwakupa cisubulo’ pele alimwi akwaambilizya “mwaka wakukkomaninwa a Jehova.”—Is. 61:2; amubone alimwi a 2 Bakorinto 6:1, 2.

25, 26. (a) Ino mulimo nzi ngobeelede kucita basikutobela Kristo boonse, alimwi ino ucitwa buti? (b) Ncinzi ncotuyoolanga-langa mucibalo citobela?

²⁵ Ciindi muzike uusyomeka nasololela mumulimo wabulindizi, Jesu wakaambila basikumutobela ‘boonse kulangila.’ (Mk. 13:33-37) Tulaumvwida mulawo ooyu kwiinda mukuzumanana kupakamana kumuuya, kumugwasyilizya cakusyomeka mulindizi wamazuba aano. Tulatondezya kuti tulipakamene kwiinda mukuuzuzikizya mukuli wesu wakukambauka. (2Tim. 4:2) Ino ncinzi citukulwaizya? Munzila imwi, nduyandisisyo ndotujisi lwakufwutula buumi. (1Tim. 4:16) Ino-ino banji bayoosweekelwa buumi bwabo akaambo kakuti bakaunduluzya kucenjezya kwamulindizi wamazuba aano. (Ezk. 3:19) Pele icitukulwaizya kapati ncakuti tulangila kuciindi notuyoomwaya mulumbe mubotu kapati wakuti, bukombi busalala bwabukulusyigwa! Lino, muciindi cino ‘camwaka wakukkomaninwa a Jehova,’ mulyango ulijalukide kubantu banji kutegwa batusangane mukukomba Leza wesu wabululami alimwi siluyando, Jehova. Ino-ino boonse ibali munyika ibayoofwutuka kumamanino aabweende bwazintu oobu bubyaabi bayoogwasyigwa kuzwa kubulelo bwaluse bwa Mwanaakwe, Kristo Jesu. Tatweelede kucileka kumugwasyilizya mulindizi wamazuba aano mukwaambilizya makani mabotu aali boobu.—Mt. 24:14.

²⁶ Nociba ciindi bweende bwazintu bubyaabi oobu kabutanamana, Jehova wabakamantanya bantu bakwe munzila yamaleele. Mucibalo citobela tuyoolanga-langa businsimi bujatikizya tusamu tobilo itubelesyegwa kutondezya mbocakacitika eeci.