1, 2. (a) Ino ncinzi ncotwakaiya mucibalo cainda kujatikizya tempele lyamucilengaano ca Ezekieli? (b) Mibuzyo nzi yobilo njotutiilange-lange mucibalo eeci?

EZEKIELI tanaakabona tempele lipati lyakumuuya mucilengaano eelyo ndyaakaamba mwaapostolo Paulo nokwakainda myaanda yamyaka. Oobu mbotwakaiya mucibalo cainda. Alimwi twakaiya kuti cilengaano cakapegwa kutegwa ciyiisye bantu ba Leza ikaambo ncoziyandika zyeelelo zya Leza mubukombi busalala. Lilikke kuti bazitobela zyeelelo eezyi ndendilyo bantu nobakali kukonzya kukkomana acilongwe cipya a Jehova. Aboobo tulakonzya kubona kaambo Jehova ziindi zyobilo ncaakakankaizyila kaambo aaka kayandika kapati mukapango komwe: “Ooyu ngomulawo watempele.”—Amubale Ezekieli 43:12.

² Lino tweelede kulanga-langa mibuzyo aimbi yobilo. Wakusaanguna: Ino nziiyo nzi zigaminide kujatikizya zyeelelo zya Jehova kubukombi busalala izilangilwa kuti iba Juda bakapona mumazuba aa Ezekieli nzyobakaiya kutempele lyamucilengaano? Bwiinguzi kumubuzyo ooyo bulatugwasya kujana bwiinguzi kumubuzyo wesu wabili: Ino cilengaano caamba nzi kulindiswe mazuba aano aakatazya aamamanino?

3. Mbuti kubikka tempele lyamucilengaano atala aacilundu mbokwakapa bantu kumvwa nsoni?

³ Ikutegwa tujane bwiinguzi kumubuzyo wakusaanguna, atubikkile maano kuzibeela zisyoonto buyo iziyandika kapati zyatempele eeli lyamucilengaano. Cilundu cilamfwu. Bantu beelede kuti bakaswaanganya cilengaano ca Ezekieli kubusinsimi bukkazika moyo bwa Isaya ibujatikizya kubukulusya. (Is. 2:2) Pele ino kubona ŋanda ya Jehova acilundu cilamfwu boobo cakabayiisya nzi? Cakabayiisya kuti bukombi busalala bweelede kusumpulwa, nkokuti kubikkwa atala azintu zyoonse zimbi. Masimpe, bukombi busalala bulisumpukide kale, nkaambo mbubambe ibuzwa kuli yooyo ‘uusumpukide kapati kwiinda baleza boonse.’ (Int. 97:9) Pele bantu tiibakali kucita lubazu lwabo. Kwamyaanda yamyaka, cakwiinduluka-induluka bakalekela bukombi busalala kuti busofwaazyigwe alimwi akutabikkilwa maano. Kubona ŋanda ya Leza iisetekene yasumpulwa akubikkwa abusena bwabulemu alimwi ibuyandika, cakapa babombe myoyo kumvwa nsoni.

4, 5. Nciiyo nzi baswiilizi ba Ezekieli ncobakaiya kujatikizya milyango milamfwu yatempele?

⁴ Milyango milamfwu. Kumatalikilo mucilengaano, Ezekieli wakabona mungelo iwakali kumusololela kapima milyango. Milyango eeyo yakali kulampa mamita aabalilwa ku 30 kuyamujulu. (Ezk. 40:14) Kwakali twaanda twabalindizi kumanjililo aayo. Ino zintu eezyi zyoonse zyakabayiisya nzi aabo ibakalanga-langa mbolibambidwe tempele eeli? Jehova wakaambila Ezekieli kuti: “Kobikkila maano kapati kumanjililo aatempele.” Ino nkaambo nzi? Akaambo kakuti kuli bakali kuleta bantu “batapalwidwe mumoyo alimwi aamubili” mukati mwini muŋanda ya Leza iisetekene yakukombela. Ino ncinzi cakacitika? Jehova wakaamba kuti: “Basofwaazya tempele lyangu.”—Ezk. 44:5, 7.

⁵ Aabo ‘ibatakapalwidwe amubili’ bakaalilwa kutobela mulawo iwakazwa kuli Leza iwakapedwe kaindi mumazuba aa Abrahamu. (Matl. 17:9, 10; Lev. 12:1-3) Pele aabo ‘ibatakapalwidwe mumoyo’ bakajisi penzi lipati kapati. Bakali bazangi basicinguni, ibatakali kuyanda kutobela malailile aa Jehova alimwi abusolozi bwakwe. Bantu bali boobo tiibakeelede kuzumizyigwa kunjila muŋanda ya Jehova iisetekene yakukombela. Jehova ulibasulide basikuupaupa ameso, alimwi bantu bakwe bakali kuzumizyide kuupaupa ameso kuti kunjile muŋanda yakwe. Milyango alimwi atwaanda twabalindizi mucilengaano catempele cakusalazya zyakayiisya ciiyo eeci cakuti: Zintu zili boobo kunyina nozyakeelede kuzumizyigwa limbi! Zyeelelo zisumpukide zyakunjila muŋanda ya Leza zyeelede kutobelwa. Ndendilyo lilikke Jehova nakonzya kubulongezya bukombi bwabantu.

6, 7. (a) Mbuti Jehova mbwaakabelesya bwaanda ibwakazingulukide tempele ikupa mulumbe kubantu bakwe? (b) Mbuti bantu ba Jehova kaindi mbobakali kulilanganya tempele? (Amubone makani aayungizyidwe.)

⁶ Bwaanda bwakazingulukide tempele. Cibeela cimwi cikkomanisya catempele eeli lyamucilengaano bwakali bwaanda ibwakazingulukide tempele lyoonse. Ezekieli wakaamba kuti bwaanda kulubazu lumwi alumwi bwakali kulampa matete aakupimya aali 500, naa mamita aali 1,555. (Ezk. 42:15-20) Nokuba boobo, mayake  aatempele alimwi alubuwa zyakabweza busena bwakali kulampa tukokola tuli 500, naa mamita aali 259 mumabazu oonse. Aboobo kwakali busena bupati kapati kuzinguluka tempele, alimwi lyakali abwaanda ibwakali kunze. * Ino nkaambo nzi ncocakali boobo?

⁷ Jehova wakaamba kuti: “Lino ababutantamwide kulamfwu andime buvwuule bwabo bwakumuuya amitunta yabami babo, eelyo ndinookkala akati kabo mane kukabe kutamani.” (Ezk. 43:9) Kulibonya kuti “mitunta yabami babo” yakali kwaamba kukomba mituni. Aboobo Jehova wakabelesya bupati bwabusena oobu mutempele lyamucilengaano ca Ezekieli kwaamba kuti: “Amwiitantamwide kulamfwu micito iisofweede iili boobo. Tamweelede kwiilekela kuti iboole nomuba munsi-munsi.” Aboobo nobakazumanana kubamba bukombi bwabo kuti kabusalala, Jehova wakali kuyoobalongezya kwiinda mukuba akati kabo.

8, 9. Ino ncinzi ncobakaiya bantu kululayo lwanguzu Jehova ndwaakapa baalumi ibakajisi mikuli?

⁸ Lulayo lwanguzu kubaalumi bakajisi mikuli. Jehova alimwi wakapa lulayo lwanguzu pele lwaluyando kubaalumi bakajisi mikuli mipati akati kabantu. Wakabalulamika canguzu ba Levi ibakaleya kuzwa kulinguwe ciindi bantu nobakali kukomba mituni, pele wakalumbaizya bana basankwa ba Zadoki, “aabo ibakali kulanganya mikuli yamubusena [bwakwe] busalala ciindi bana Israyeli nobakaleya.” Wakayeendelezya cabululami alimwi caluzyalo nkamu imwi aimwi, kweelana amicito yabo. (Ezk. 44:10, 12-16) Mbubwenya buyo, basilutwe ba Israyeli bakalulamikwa canguzu abalo.—Ezk. 45:9.

⁹ Aboobo cakusalazya Jehova wakaamba kuti baalumi ibakali muzyuuno zyabweendelezi alimwi ibakali kusololela bakeelede kulyaambilila kulinguwe kujatikizya mbobakali kwiilanganya mikuli yabo. Abalo bakali kuyandika lulayo, kululamikwa alimwi akusubulwa. Aboobo, bakeelede kuba ambele mukusumpula zyeelelo zya Jehova.

10, 11. Mbumboni nzi butondezya kuti bamwi babantu ibakazwa mubuzike bakaziiya ziiyo izili mucilengaano ca Ezekieli?

¹⁰ Sena ibakazwa mubuzike bakazibelesya ziiyo zili mucilengaano ca Ezekieli? Mubwini, tatukonzyi kuzyiba bwini mbobakali kuyeeya baalumi abamakaintu basyomeka kaindi kujatikizya cilengaano eeci cikkomanisya. Nokuba boobo, Jwi lya Leza lilatwaambila zintu zinji kujatikizya nzyobakacita ibakazwa mubuzike alimwi ambobakatalika kububona bukombi busalala bwa Jehova. Sena bakazibelesya njiisyo izili mucilengaano ca Ezekieli? Munzila imwi, bakazibelesya, ikapati nobeezyanisyigwa abasikale ibakali bazangi kabatanaunka mubuzike mu Babuloni.

¹¹ Baalumi basyomeka mbuli musinsimi Hagai alimwi a Zekariya, mupaizi alimwi sikukkopolola Ezara, alimwi amweendelezi Nehemiya boonse bakabeleka canguzu kuyiisya bantu kujatikizya njiisyo zili mbuli zyeezyo izili mutempele lyamucilengaano ca Ezekieli. (Ezr. 5:1, 2) Bakabayiisya bantu kuti bukombi busalala bweelede kusumpulwa alimwi bweelede kuba mubusena bwakusaanguna kuzintu zyakumubili alimwi anzyobayanda beni. (Hag. 1:3, 4)  Bakaamba kuti zyeelelo izyeelede kutobelwa mubukombi busalala zyeelede kulemekwa. Mucikozyanyo, Ezara a Nehemiya bakabalaya canguzu bantu kuti babaleke bamakaintu beenzu, balo ibakali kubajola ansi bantu kumuuya. (Amubale Ezara 10:10, 11; Neh. 13:23-27, 30) Ino mbuti kujatikizya kukomba mituni? Kulibonya kuti nobwakamana buzike, cisi lino cakatalika kucisulaika cibi eeco, calo cakali kuboongelezya cakwiinduluka-induluka mubuumi bwabo. Pele ino mbuti kujatikizya bapaizi abasilutwe? Kweelana ambocakatondezya cilengaano ca Ezekieli, bakali akati kabaabo, ibakatambula lulayo alimwi akululamikwa a Jehova. (Neh. 13:22, 28) Cakulicesya banji bakalutobela lulayo oolo.—Ezr. 10:7-9, 12-14; Neh. 9:1-3, 38.

12. Muunzila nzi Jehova mwaakabalongezya baange ciindi nobakapiluka?

¹² Mbwaanga bakacita boobo, Jehova wakabalongezya bantu bakwe. Bantu bakaba acilongwe cibotu a Jehova, bakapona buumi bubotu kumubili alimwi bakaba aluumuno ndobakabwene kwaciindi cilamfwu. (Ezr. 6:19-22; Neh. 8:9-12; 12:27-30, 43) Ino nkaambo nzi? Akaambo kakuti bantu lino bakatalika kutobela zyeelelo zya Jehova ziluleme kujatikizya bukombi busalala. Ziiyo izyakali mutempele lyamucilengaano zyakabanjila mumoyo bantu banji babombe myoyo. Aboobo mubufwaafwi tulakonzya kwaamba kuti, cilengaano ca Ezekieli catempele cakabagwasya baange munzila zyobilo iziyandika kapati. (1) Cakabayiisya ziiyo zigwasya kujatikizya zyeelelo zyabukombi busalala alimwi ambobakeelede  kuzitobela zyeelelo eezyo. (2) Cakabapa cisyomezyo cabusinsimi. Cilengaano cakasinsima kuti bukombi busalala bwakali kuyoobukulusyigwa, alimwi cakaambilizya mbwaakali kuyoobalongezya bantu bakwe Jehova kufwumbwa buyo kuti bazumanana kutobela bukombi busalala. Nokuba boobo, swebo mazuba aano kuli kaambo nkotweelede kuzyiba: Sena cilengaano eeci cilazuzikizyigwa amazuba aano?

13, 14. (a) Ino tuzyi buti kuti cilengaano catempele ca Ezekieli cilazuzikizyigwa mazuba aano? (b) Ino muunzila nzi zyobilo motugwasyigwa acilengaano mazuba aano? (Amubone akabbokesi 13A, “Matempele Aayindene, Ziiyo Ziindene.”)

¹³ Sena tulakonzya kusinizya kuti cilengaano catempele ca Ezekieli cilatujatikizya mazuba aano? Inzya! Amuyeeye kukozyanya kuliko akati kacilengaano ca Ezekieli caŋanda ya Leza iisetekene “acilundu cilamfwu kapati” alimwi abusinsimi bwa Isaya bwakuti “cilundu caŋanda ya Jehova ciyakwiimikwa nji kwiindilila atala eeni aamalundu.” Cacigaminina Isaya utwaambila kuti businsimi bwakwe bwakali kuyoozuzikizyigwa “kumamanino aamazuba,” naa “kumazuba aamamanino.” (Ezk. 40:2; Is. 2:2-4; bupanduluzi buyungizyidwe; amubone alimwi a Mika 4:1-4.) Businsimi oobu bwaamba ciindi cakumazuba aamamanino kuzwa mu 1919 ciindi bukombi busalala nobwakasumpulwa, kubukulusyigwa, mbuli kuti bwabikkwa atala aacilundu. *

¹⁴ Aboobo cakutadooneka, cilengaano ca Ezekieli cijatikizya bukombi busalala mazuba aano. Mbubwenya mbocakabagwasya ba Juda baange kaindi, cilengaano eeci cilatugwasya andiswe mazuba aano munzila zyobilo. (1) Citupa ziiyo zigwasya kujatikizya mbotukonzya kutobela zyeelelo zya Jehova zyabukombi busalala. (2) Citupa zisyomezyo zyabusinsimi kujatikizya kubukulusyigwa kwabukombi busalala alimwi azilongezyo zya Jehova.

15. Ncinzi ncotweelede kuyeeya ciindi notubikkila maano kuziiyo zili mutempele lyamucilengaano ca Ezekieli?

¹⁵ Lino atulange-lange zibeela zimwi zigaminide izili mucilengaano ca Ezekieli. Amweezyeezye kuti twamusangana Ezekieli mukulanga-langa tempele lyamucilengaano eelyo likkomanisya kapati. Kamuyeeyede kuti tatuboni tempele lipati lyakumuuya; muciindi caboobo, tubikkila buyo maano kuziiyo zikonzya kubeleka mubukombi bwesu mazuba aano. Ino nziiyo nzi zimbi nzyotukonzya kwiiya?

16. Ncinzi ncotukonzya kwiiya kukupima koonse ikuli mucilengaano ca Ezekieli? (Amubone cifwanikiso icili kumatalikilo aacibalo)

¹⁶ Ino nkaambo nzi zintu ncozyakali kupimwa? Naakali kulangilila Ezekieli, mwaalumi uuli mbuli mungelo iwakali kulibonya mbuli mukuba wakapima tempele, kubikkilizya abwaanda, milyango, twaanda twabalindizi, lubuwa alimwi acipaililo. Bumpiyo-mpiyo bupedwe bulakonzya kumutyompya sikubala. (Ezk. 40:1–42:20; 43:13, 14) Nokuba boobo, amuyeeye twaambo tupati-pati ntotukonzya kwiiya kubumpiyo-mpiyo oobu. Aboobo Jehova wakakankaizya kapati mboziyandika zyeelelo zyakwe. Ngonguwe uuzibikka, ikutali bantu ibalya maila. Aabo ibaamba kuti tacikwe makani Leza mbwakombwa balalicenga kapati. Kuyungizya waawo,  kwiinda mukupima zibeela zyatempele, Jehova ulapa cisyomezyo munzila iisalede kuti kupilusyigwa kwabukombi busalala ncintu ciyakucitika kakunyina akudooneka naaceya. Zisyomezyo zya Leza ziyoozuzikizyigwa munzila iigaminide mbubwenya mbuli zipimyo zigaminide eezyo. Aboobo Ezekieli wakasinizya kuti kubukulusyigwa kwabukombi busalala kumazuba aamamanino ncintu ciyoocitika ncobeni.

17. Ino bwaanda bwakazingulukide tempele butuyeezya nzi mazuba aano?

¹⁷ Bwaanda bwakazingulukide tempele. Mbubwenya mbotwabandika kale, Ezekieli wakabona bwaanda kuzinguluka busena boonse bwatempele lyamucilengaano. Cibeela eeci cakali ciyeekezyo cipati cakuti bantu ba Leza bakeelede kubutola kulamfwu kapati abukombi busalala, busofwaazi boonse mumakani aabukombi, kunyina nobakeelede kusofwaazya ŋanda ya Leza. (Amubale Ezekieli 43:7-9.) Eelo kaka lulayo oolu lulayandika kapati kulindiswe mazuba aano! Nobakamana kuzwa bantu ba Leza mumyaka minji yabuzike bwakumuuya mu Babuloni Mupati, Kristo wakasala muzike wakwe uusyomeka alimwi uucenjede mu 1919. Ikapati kuzwa kuciindi eeco, bantu ba Leza babeleka canguzu kapati kutegwa baleke njiisyo zyakubeja alimwi amicito iivwelene akukomba mituni alimwi amicito yabantu batakombi Leza. Tulabikkila maano kapati kutegwa tutaleti busofwaazi bwakumuuya afwaafwi abukombi busalala. Kuyungizya waawo, mane buya kunyina notucita makwebo mu Maanda eesu aa Bwami, kubikka zintu zyamubuumi zili boobo kulamfwu abukombi bwesu.—Mk. 11:15, 16.

18, 19. (a) Ncinzi ncotukonzya kwiiya kumilyango milamfwu yatempele lyamucilengaano? (b) Ino tweelede kubaingula buti aabo ibasola kuubya-ubya zyeelelo zya Jehova zisumpukide? Amupe cikozyanyo.

¹⁸ Milyango milamfwu. Ciindi notuyeeya kujatikizya milyango milamfwu eeyo Ezekieli njaakabona, ino nziiyo nzi nzyotukonzya kwiiya? Cakutadooneka cibeela eeco catempele lyamucilengaano cakayiisya ba Juda baange kuti Jehova ulijisi zyeelelo zyakulilemeka zisumpukide kapati. Ikuti naa masimpe mbocakabede oobo kaindi, ino mbuti mazuba aano? Tukombela mutempele lipati lyakumuuya lya Jehova. Sena bukkale bubotu ibutali bwakuupaupa ameso tabuyandiki kapati mazuba aano? (Rom. 12:9; 1Pet. 1:14, 15) Kumazuba aamamanino, Jehova wazumanana kubasololela bantu bakwe kutegwa batobele zyeelelo zyakwe zyakulilemeka. * Mucikozyanyo, basizibi bateempwi balagusyigwa mumbungano. (1Kor. 5:11-13) Kwiinda zyoonse, twaanda twabalindizi kumanjililo aamilyango eeyo kulakonzya kutuyeezya mazuba aano kuti, caboola kukukomba Jehova, kunyina uuzumizyigwa kunjila uutazumizyidwe a Leza. Mucikozyanyo, muntu uucita zintu zyamunyika pele kali Munakristo ulakonzya kunjila mu Ŋanda ya Bwami, pele takonzyi kuzuminwa a Jehova kusikila mane watalika kucita nzyayanda Leza. (Jak. 4:8) Eelo kaka bukombi busalala bulikwabilidwe munzila iikkomanisya kapati muziindi eezyi zibyaabi!

¹⁹ Bbaibbele lyakasinsima kuti nyika eeyi iyoobija kapati kaatanasika mamanino. Tubala kuti, “bantu babyaabi abasilweeno bayoobija akubijila limwi, banikweena bamwi alimwi akweenwa lwabo beni.” (2Tim. 3:13) Bantu banji mazuba aano bali mukweenwa  kabayeeya kuti zyeelelo zya Jehova zisumpukide kapati nziyumu, tazibeleki, naa kuti taziluzi. Sena muyakweenwa andinywe? Mucikozyanyo, ikuti umwi usola kumupa kusyoma kuti zyeelelo zya Leza kujatikizya bukkale bwakoonana kwabantu bajisi zizo zikozyenye taziluzi, sena muyoozumina kuti ncaamba ncamasimpe? Naa sena muyootobela ncaamba Jehova Leza, walo cakusalazya Ijwi lyakwe lyaamba kuti aabo ibacita micito iili boobo “bacita zisapi zisesemya”? Leza ulatucenjezya kujatikizya kukkomanina micito yakutalilemeka. (Rom. 1:24-27, 32) Ciindi notubuzyigwa makani aali boobo, tweelede kuyeeya kujatikizya tempele lyamucilengaano ca Ezekieli amilyango milamfwu alimwi tweelede kuyeeya kuti: Jehova kunyina nazyuubya-ubya zyeelelo zyakwe ziluleme, nokuba kuti kuli kuyungwa munyika eeyi mbyaabi. Sena tulazuminana a Taateesu wakujulu alimwi akukakatila kucintu ciluzi?

20. Ino nziyeekezyo nzi zikulwaizya nzyobajana mucilengaano ca Ezekieli aabo ibali cibeela ‘cankamu mpati’?

²⁰ Lubuwa. Ciindi Ezekieli naakabona lubuwa lwaanze lupati, weelede kuti wakakkomana kapati kuyeeya kujatikizya bakombi ba Jehova banji ibakkomene ibakali kunoobungana abusena aawo. Mazuba aano, Banakristo bakombela mubusena busetekene kapati. Aabo ibali cibeela ‘cankamu mpati’ yabakombi mulubuwa lwaanze lwatempele lya Jehova lyakumuuya balajana ziyeekezyo zikulwaizya mucilengaano ca Ezekieli. (Ciy. 7:9, 10, 14, 15) Ezekieli wakabona kuti lubuwa lwakazingulukidwe maanda aakulida oomo bakombi mobakali kukonzya kulida antoomwe zipaizyo  zyalumvwano nzyobakaletelezya. (Ezk. 40:17) Munzila imwi, bakali kukonzya kulida antoomwe cakulya a Jehova Leza, calo icakali kutondezya cilongwe cibotu. Mazuba aano, tatutuuli zipaizyo mbuli mbobakali kucita ba Juda nobakali kweendelezyegwa a Mulawo wa Musa. Muciindi caboobo, tulatuula “cipaizyo cantembauzyo” ciindi notutola lubazu mubukombi busalala, mbuli ciindi notupa bwiinguzi alimwi akwaamba zyalusyomo lwesu kumiswaangano yesu naa mumulimo wamumuunda. (Heb. 13:15) Alimwi tulasaninwa acakulya cakumuuya eeco Jehova ncapa. Anu nkakaambo kaako tulimvwa mbobakalimvwa bana ba Kora ibakaimbila Jehova kuti: “Kukkala buzuba bomwe mumabuwa aako nkubotu kwiinda kukkala mazuba aali 1,000 kumbi!”—Int. 84:10.

21. Ino Banakristo bananike inga baiya nzi kujatikizya bupaizi mucilengaano ca Ezekieli?

²¹ Bupaizi. Ezekieli wakabona kuti bapaizi aba Levi bakali kukonzya kunjila mulubuwa lwamukati kubelesya milyango mbuli yeeyo njobakali kubelesya aabo ibatakali bamusyobo wabapaizi kunjila mulubuwa lwaanze. Eeyo yakali nzila iigwasya kapati yakuyeezya baalumi aabo baciinga cabapaizi kuti abalo bakeelede kuzuzikizya zyeelelo zya Jehova zyabukombi busalala. Ino mbuti mazuba aano? Bupaizi tacili cintu cakukona akati kababelesi ba Leza mazuba aano, pele Banakristo bananike baambilwa kuti: “Nywebo muli ‘musyobo uusalidwe, ibapaizi bami.’” (1Pet. 2:9) Bapaizi bamu Israyeli yansiku bakali kukombela mulubuwa lwaandeene. Mazuba aano, Banakristo bananike tabaandanizyigwi abakombinyina munzila iili yoonse yacigaminina, pele balakkomana acilongwe caalubazu ncobajisi a Jehova kabali bana bakwe. (Gal. 4:4-6) Aciindi nciconya, bananike balakonzya kujana ziyeekezyo zigwasya mucilengaano ca Ezekieli. Mucikozyanyo, balaiya kuti bapaizi bakaleelede kulaigwa akululamikwa. Banakristo boonse beelede kuyeeya kuti tuli “tanga lyomwe” libeleka aansi abweendelezi ‘bwamweembezi omwe.’—Amubale Johane 10:16.

22, 23. (a) Nciiyo nzi baalu Banakristo mazuba aano ncobakonzya kwiiya kuli silutwe iwaambidwe mucilengaano ca Ezekieli? (b) Ino ncinzi ciyoocitika kumbele?

²² Silutwe. Mucilengaano ca Ezekieli, silutwe ulayandika. Tali wamumukowa wabapaizi, alimwi mububambe bwatempele, usololelwa abapaizi. Nokuba boobo, ulabeleka kali mulangizi akati kabantu alimwi ulabagwasyilizya mukupa zituuzyo. (Ezk. 44:2, 3; 45:16, 17; 46:2) Aboobo silutwe ooyu ncikozyanyo kubaalumi Banakristo mazuba aano ibajisi mikuli mumbungano. Alimwi buya, baalu Banakristo, kubikkilizya abalangizi beendeenda, beelede kuzumanana kulibombya kumuzike uusyomeka uunanikidwe. (Heb. 13:17) Baalu balabeleka canguzu kugwasya bantu ba Leza kupa zituuzyo zyabo zyakutembaula lyamiswaangano ya Bunakristo alimwi amumulimo wamumuunda. (Ef. 4:11, 12) Alimwi baalu beelede kubikkila maano kubona mbuli Jehova mbwaakabakalalila basilutwe ba Israyeli akaambo kakutazibelesya kabotu nguzu nzyobakajisi. (Ezk. 45:9) Mbubwenya buyo, baalu tabeelede kuyeeya kuti tabayandiki lulayo akululamikwa. Muciindi caboobo, balacikkomanina coolwe cili coonse cakululamikwa a Jehova kutegwa  babe beembezi abalangizi ibacibwene kabotu.—Amubale 1 Petro 5:1-3.

²³ Jehova uyoozumanana kusala balangizi bacibwene alimwi basiluyando munyika ya Paradaiso iiboola kumbele. Baalu banji mazuba aano, balatambula lwiiyo kujatikizya mbobakonzya kuba beembezi bacibwene mu Paradaiso. (Int. 45:16) Sena tacikkomanisyi kuyeeya mbuli baalumi aaba mbobayooba cilongezyo munyika mpya? Cilengaano ca Ezekieli, mbubwenya mbuli businsimi bwakubukulusya bumwi, ciyoolimvwisya kapati muciindi ncabikkide Jehova. Ambweni zibeela zimwi ziyoobonwa mbozigwasya kumbele, kuzuzikizyigwa nkotutakonzyi kumvwisya lino. Tuyoozyiba kumbele.

24, 25. Mbuti cilengaano ca Ezekieli mbocakatondezya zilongezyo zya Jehova kubantu bakwe ciindi nobakali kukakatila kubukombi busalala?

²⁴ Ikumana makani aaya, atuyeeye cintu cimwi cipati icakacitika mucilengaano ca Ezekieli. Jehova wakaboola mutempele lyamucilengaano akusyomezya bantu bakwe kuti wakali kuyoozumanana oomo kufwumbwa buyo kuti bakakatila cakusyomeka kuzyeelelo zyakwe zyabukombi busalala. (Ezk. 43:4-9) Ino kubako kwa Jehova kwakali kuyoobajatikizya buti bantu bakwe alimwi anyika yabo?

²⁵ Cilengaano cakapandulula zilongezyo zya Jehova kwiinda mukubelesya businsimi bobilo ibukulwaizya: (1) Kalonga kakunka kuzwa mutempele, akupa kuti zilenge zyuumi zicikonzye kupona akuti nyika ibe aambolezi; alimwi (2) nyika yakaapaulwa kabotu munzila yabulondo, tempele amabbuwa aazingulukide kalili abusena bwaakati. Ino zibalo eezyo zyaamba nzi kulindiswe mazuba aano? Kayi, tupona kuciindi Jehova naakanjila, kusalazya alimwi akuzumina nzila yabukombi iisetekene kapati, nkokuti tempele lipati lyakumuuya. (Malk. 3:1-4) Tuyoobubandika businsimi bobilo oobo mu Cibalo 19 kusikila ku 21 cabbuku eeli.