Nomuyandwa Bakwesu Abacizyi:

Mwakali mumwaka wa 1971. Aabo ibakajanika ku Muswaangano Wacooko iwakajisi mutwe wakuti “Divine Name” (Zina lya Leza) iwakacitwa mumwaka ooyu bakakkomana kapati kutambula mabbuku manji mapya. Mabbuku aaya akapandululwa kuti “ncintu catakali kuyeeyelwa amuntu uuli woonse.” Kujatikizya bbuku limwi akati kayaayo aakamwaigwa, mukwesu umwi wakaamba kuti: “Ncitondezyo cazintu zikkomanisya kapati ziciboola kumbele!” Ino wakali kwaamba nzi? Wakali kwaamba bbuku ilyakajisi mutwe wakuti “The Nations Shall Know That I Am Jehovah”—How? Pele ino nkaambo nzi bbuku eeli ncolyakapa kuti kube lukkomano luli boobu? Akaambo kakuti lyakajisi bupanduluzi bupya bwabusinsimi bujanika mubbuku lyamu Bbaibbele lya Ezekieli, businsimi ibujatikizya buumi bwabantu boonse bwakumbele.

Kuzwa nolyakamwaigwa bbuku eeli, mweelwe wabantu ba Leza wayungizyika citaambiki, kuzwa kumweelwe uubalilwa ku 1.5 miliyoni kusika kumweelwe wiinda ku 8 miliyoni. (Is. 60:22) Babelesi ba Jehova aaba banji boobu baambaula myaambo iindene-indene iinda ku 900. (Zek. 8:23) Bunji bwabo tabanabede acoolwe cakubala bbuku ilibupandulula kabotu-kabotu businsimi bwakasololelwa amuuya ibwakalembwa amusinsimi Ezekieli.

Kuyungizya waawo, mumyaka minji yainda kuzwa mu 1971, kumvwisya kwesu kwakasimpe kamu Bbaibbele kwayaambele ciindi mumuni nouyaabuzumanana kumwekesya. (Tus. 4:18) Mu 1985 twakatalika kuzyiba kabotu-kabotu kujatikizya ncocipandulula kwaamba ‘bambelele zimbi’ kuti mbalulami kabali balongwe ba Leza. (Joh. 10:16; Rom. 5:18; Jak. 2:23) Mpoonya mu 1995 twakamvwisya ciindi cakusaanguna kuti lubeta lwamamanino ‘lwambelele’ alimwi “ampongo” luyoocitika ‘lyamapenzi mapati’ aboola kumbele. (Mt. 24:21; 25:31, 32) Kucinca koonse ooku kwali kukujatikizya kapati kumvwisya kwesu kwabbuku lya Ezekieli.

Mumyaka misyoonto yainda, mumuni wazumanana kuyaabumwekesya. Amubone ziiyo zijanika kuzikozyanyo zya Jesu. Bunji bwaziiyo eezyi zilalimvwisya kapati lino mumizeezo alimwi amumyoyo yesu. Alimwi bunji bwazikozyanyo eezyi zyaamba kujatikizya zintu ziyoocitika lyamapenzi mapati aalo aalaafwaafwi kusika. Mbubwenya buyo, kwaba kucinca mukumvwisya kwesu kujatikizya businsimi bumwi bujanika mubbuku lya Ezekieli. Akati kabusinsimi oobo, kuli businsimi bujatikizya Gogo Waku Magogo (caandaano 38 a 39), mulimo wamwaalumi iwakajisi nkomo yazilembyo yamulembi (caandaano 9), kkuti ilyakajisi mafwuwa mayumu alimwi akuswaanganizyigwa kwatusamu tobilo kwamucikozyanyo (caandaano 37). Mbubwenya buyo, kucinca mukumvwisya koonse ooku kusalazya twaambo itwakalembedwe kaindi mubbuku lya “The Nations Shall Know That I Am Jehovah”—How?

Aboobo, nkakaambo kaako bunji bwabantu ba Jehova bali kubuzya kuti, “Ino ndilili notuyooba abbuku ilijisi bupanduluzi busalazyidwe bwabusinsimi bwa Ezekieli?” Ibbuku lya Bukombi Busalala—Bwabukulusyigwa! ndebbuku eelyo. Ciindi nomubala zibalo zili 22 izili mubbuku eeli alimwi akuzinzibala kuyeeya zifwanikiso zikkomanisya zili mumo, muyoogambwa kapati kujatikizya buvwuntauzi bwakacitwa cakulomya mukulibambila kuti lilembwe. Kwakapailwa mipailo minji kutegwa kuzyibwe cakapa Jehova kusololela kuti bbuku lyamu Bbaibbele lya Ezekieli lilembwe. Kwakaba kwiilanga-langa cakulomya mibuzyo mbuli yakuti: Ino nziiyo nzi izili mubbuku lya Ezekieli izyakapegwa kuli baabo ibakapona mumazuba aakwe alimwi akulindiswe  mazuba aano? Ino mbusinsimi nzi ibwaamba zintu ziyoocitika kumbele? Sena tweelede kubikkila maano kuyandaula ncoziiminina zyoonse izili mubusinsimi bwa Ezekieli? Bwiinguzi kumibuzyo eeyi bupa kuti tulimvwisye kabotu-kabotu bbuku lyamu Bbaibbele eeli ndyotukkomanina kapati kubala.

Ciindi mwanoolibala bbuku lya Ezekieli kuzwa kumatalikilo kusikila kumamanino, muyoocikkomanina kapati cibeela cambunga ya Jehova cakujulu. Cakutadooneka mulagambwa kapati kujatikizya zyeelelo zisumpukide nzyabikkide Jehova kulibaabo bali kujulu alimwi aanyika ibayanda kumukomba munzila iitambulika. Bbuku lya Bukombi Busalala liyoomugwasya kumulumba kapati Jehova akaambo kazintu nzyaakabacitila kale bantu bakwe alimwi anzyayoobacitila ino-ino kumbele. Muyoojana kuti bbuku eeli lilatukankaizya twaambo tobilo tuyandika kapati. Kakusaanguna, kutegwa tumukkomanisye Jehova, tweelede kumuzyiba alimwi akuzumina kuti ngo Mweendelezi Wabubumbo Boonse. Kabili, tweelede kumukomba Jehova munzila njakkomanina, kupona kweelana azyeelelo zyakwe zisumpukide.

Nkulombozya kwesu kuti bbuku eeli liyooyumya makanze aanu aakukomba Jehova munzila iipa bulemu kuzina lyakwe lipati alimwi lisalala. Alimwi alimukulwaizye kuzumanana kulangila ciindi masi oonse naayoozyiba kuti ngu Jehova.—Ezk. 36:23; 38:23.

Taateesu siluyando, Jehova, akulongezye kapati kusolekesya kwanu kutegwa mulimvwisye bbuku ndyaakamusololela kulemba musinsimi Ezekieli.