TUBBOKESI TWAKUYIISYA 19A
Milonga Yazilongezyo Zizwa Kuli Jehova
Atulange-lange zibalo zyamu Bbaibbele zimwi ziindene-indene izibelesya bbala lyakuti “mulonga” alimwi alyakuti “maanzi” kwaamba zilongezyo zizwa kuli Jehova. Kuti twazibala zibalo zyoonse eezyi, tuyookulwaizyigwa kuzyiba mbuli mbwatulongezya Jehova. Mubuti?
JOELI 3:18 Businsimi oobu butondezya kasensa kamaanzi ikazwa mutempele. Kalakunka kutilila “Kkuti lya Zisamu Zyamuunga.” Aboobo Joeli alimwi a Ezekieli bakabona mulonga uupa buumi kubusena bwakanyina cintu. Mubusinsimi boonse bobilo, mulonga uzwa muŋanda ya Jehova, naa mutempele.
ZEKARIYA 14:8 Musinsimi Zekariya wakabona “maanzi aabuumi” aakali kukunka kuzwa mumunzi wa Jerusalemu. Cisela camaanzi aaya cakali kukunkila kulwizi lwakujwe, naa Lwizi Lutajisi Buumi, mpoonya cisela cimwi cakali kukunkila kulwizi lwakumbo, naa Lwizi lwa Mediterranean. Jerusalemu wakali “munzi wa Mwami mupati,” Jehova Leza. (Mt. 5:35) Mbwaakawaamba munzi ooyu Zekariya cituyeezya kujatikizya bweendelezi bwa Jehova anyika yoonse kumbele. Kuzwa kaindi tulizyi kuti mubusinsimi oobu maanzi atondezya kuti Jehova uyoolongezya nkamu zyobilo zyabantu basyomeka mu Paradaiso, nkokuti aabo ibanoopona kusikila lyamapenzi mapati alimwi abaabo ibayoobusyigwa aakwiinda.
CIYUBUNUZYO 22:1, 2 Mwaapostolo Johane wakabona mulonga wamucikozyanyo uukozyenye ayooyo ngwaakabona Ezekieli. Nokuba boobo, walo tauzwi mutempele, pele uzwa kucuuno cabwami ca Jehova. Aboobo cilengaano eeci, mbubwenya mbuli ca Zekariya, kulibonya kuti cikankaizya kujatikizya zilongezyo zyabweendelezi bwa Leza mu Myaka Iili Cuulu.
Nokuba boobo, kuli kwiindana kumwi kuliko akati kazilongezyo zizwa kubweendelezi bwa Jehova azyeezyo ziimininwa amulonga ooyo Ezekieli ngwaakabona mucilengaano. Zilongezyo zyoonse eezyi zizwa kuli Jehova alimwi zilakunka kuya kubantu boonse basyomeka.
INTEMBAUZYO 46:4 Amubone kapango komwe aaka mbokaziswaanganya zibeela zyoonse zyobilo, nkokuti bukombi alimwi abweendelezi. Aawa tubona mulonga uupa kuti “munzi wa Leza” ukondwe, kwaamba Bwami abweendelezi, alimwi ‘atente lipati lisalala lyakukombela lya Mupatikampatila,’ kwaamba bukombi busalala.
Kuzibala zibalo zyoonse eezyi kutupa lusyomo lwakuti Jehova uyoobalongezya bantu basyomeka, mumbazu zyobilo. Mbazu yakusaanguna, tuyoogwasyigwa mane kukabe kutamani kuzwa kubweendelezi bwakwe, mpoonya yabili, tuyoogwasyigwa kuzwa kububambe bwakwe bwabukombi busalala. Aboobo lino atube amakanze aakuzumanana kuyandaula “maanzi aabuumi” kuzwa kuli Jehova Leza alimwi a Mwanaakwe, bubambe bwaluyando mbobabikkide ibupa kujana buumi butamani!—Jer. 2:13; Joh. 4:10.
