Twaambo Tusalazyidwe Mubufwaafwi
Kwamyaka minji, Ngazi Yamulindizi yali kwaamba kujatikizya kucinca mukumvwisya kwesu kwazibeela zinji zyabusinsimi bwa Ezekieli. Alimwi bbuku eeli lya Bukombi Busalala—Bwabukulusyigwa!, lilijisi twaambo tusalazyidwe atumbi. Amubone naa mulakonzya kuyiingula mibuzyo iitobela.
Ino masyu one aazilenge zyuumi aiminina nzi?
Mbotwakazyi kaindi: Busyu bumwi abumwi bwazilenge zyuumi izijisi masyu one, naa bakerubi, bwiiminina bube bwa Jehova bone buyandika kapati.
Mbotuzyi lino: Nokuba kuti busyu bumwi abumwi bwazilenge zyuumi izijisi masyu one bwiiminina bube bomwe akati kabube bwa Jehova buyandika kapati, ikuti naa mwabulangila antoomwe bwiiminina bube boonse mbwajisi Jehova. Alimwi, busyu bone bututondezya nguzu abulemu bwa Jehova butalikomeneni.
Kaambo kakapa kuti kube kucinca: Mu Jwi lya Leza, mweelwe ooyu, one, ulabelesyegwa kanji-kanji kwiiminina cintu cizwide cakumaninina naa icikkwene. Aboobo, ciindi masyu one nomwaalangila antoomwe, apanga cintu cikondelezya kwiinda aali ceeco cipangwa abusyu bomwe, nkokuti aba cibeela ciyandika kapati cabube bwa Jehova ibugambya. Alimwi busyu bumwi abumwi bwakali bwacilenge iciiminina bulemu, nguzu, abupati. Nokuba boobo, zilenge zyone zyoonse iziiminina nguzu, kweelana ambokutondezyedwe amasyu one aakerubi umwi aumwi, zyakali kunsi aacuuno cabwami ca Jehova. Eeci citondezya kuti Jehova ngo Mweendelezi Mupatikampatila mububumbo boonse.
Ino mwaalumi iwakajisi nkomo yazilembyo yamulembi wiiminina nzi?
Mbotwakazyi kaindi: Mwaalumi uujisi nkomo yazilembyo yamulembi wiiminina bananike ibacipona anyika. Kwiinda mumulimo wakukambauka, bananike lino bali mukubikka citondezyo cacikozyanyo ankumo zyabaabo ibaba cibeela ‘cankamu mpati.’—Ciy. 7:9.
Mbotuzyi lino: Mwaalumi uujisi nkomo yazilembyo yamulembi wiiminina Jesu Kristo. Uyoobikka citondezyo kubantu bankamu mpati ciindi nayoobabeteka kuti nimbelele, ‘lyamapenzi mapati.’—Mt. 24:21.
Kaambo kakapa kuti kube kucinca: Jehova wakapa Mwanaakwe mulimo wakubeteka. (Joh. 5:22, 23) Kweelana alugwalo lwa Matayo 25:31-33, Jesu uyoobeteka bantu beelela kuba kulubazu ‘lwambelele’ naa ‘lwampongo.’
Sena bana basimbi bobilo babunyina ibavwuule, Ohola a Oholiba, baiminina Bunakristo Bwanyika bobilo ibwaandeene, nkokuti cikombelo ca Katolika alimwi aca Protestanti?
Mbotwakazyi kaindi: Ohola (Samariya, imunzi mupati wa Israyeli), imupati, wiiminina cikombelo ca Katolika: Oholiba (Jerusalemu, imunzi mupati wa Juda), musyoonto, wiiminina zikombelo zya Protestanti.
Mbotuzyi lino: Bana basimbi ibavwuule aaba tabaiminini zibeela zili zyoonse zya Bunakristo Bwanyika. Muciindi caboobo, balatugwasya kumvwisya mbwalimvwa Jehova kujatikizya baabo ibakali bantu bakwe basyomeka nobacita buvwuule bwakumuuya. Mbwalimvwa ciindi bantu bakwe basyomeka nobacita buvwuule bwakumuuya mbombubo mbwalimvwa kujatikizya bukombi bwakubeja boonse.
Kaambo kakapa kuti kube kucinca: Kunyina Magwalo mpaatondezya kuti Ohola a Oholiba mubusinsimi baiminina Bunakristo Bwanyika. Israyeli alimwi a Juda bakali mbuli mukaintu uusyomeka kuli Jehova, pele Bunakristo Bwanyika kunyina nobwakali mukaintu wa Jehova munzila iili yoonse. Kuyungizya waawo, kukozyanisyigwa kwabantu ba Leza basyomeka kubavwuule ibali mucaandano 16 a 23 cabbuku lya Ezekieli kupa bulangizi bwakucinca akubukulusyigwa. Bunakristo Bwanyika, mbwaanga ncibeela ca Babuloni Mupati, tabujisi bulangizi buli boobu.
Sena Bunakristo Bwanyika bwiimininwa a Jerusalemu wansiku siluleyo?
Mbotwakazyi kaindi: Jerusalemu uutasyomeki wiiminina Bunakristo Bwanyika. Aboobo, kunyonyoonwa kwa Jerusalemu mubusinsimi kutondezya ciyoocitikila Bunakristo Bwanyika
Mbotuzyi lino: Bukkale ibwakali mu Jerusalemu, mbuli kukomba mituni alimwi abumpelenge ibwakadumide, butuyeezya Bunakristo Bwanyika, pele tatucaambi kuti Bunakristo Bwanyika bwiimininwa a Jerusalemu.
Kaambo kakapa kuti kube kucinca: Kunyina kaambo kamu Magwalo ikeelede kutupa kwaamba boobu. Mukwiimpana a Jerusalemu wansiku, bukombi busalala kunyina nobwakacitidwe mu Bunakristo Bwanyika. Alimwi nokuba kuti Jehova wakali kumulekelela Jerusalemu kwaziindi zili mbozibede, kunyina bulangizi buli boobu ku Bunakristo Bwanyika.
Ino mbuti mbocakazuzikizyigwa cilengaano cakkuti lyamafwuwa mayumu?
Mbotwakazyi kaindi: Mu 1918 bananike ibakali kupenzyegwa bakaba baange mu Babuloni Mupati, bakakozyanisyigwa kulufwu. Kwaangwa kwaciindi cisyoonto buyo ooku kwakamana mu 1919 ciindi Jehova naakababukulusya kabali basikwaambilizya Bwami.
Mbotuzyi lino: Lufwu lwacikozyanyo oolu lwakatola ciindi cilamfwu alimwi lwakatalika kautanasika mwaka wa 1918. Lwakatalika mumwaanda wamyaka wabili C.E. kusikila mu 1919 C.E. alimwi luleendelana aciindi cilamfwu ncaakaamba Jesu mucikozyanyo cawiiti ansaku.
Kaambo kakapa kuti kube kucinca: Kwaangwa kwabana Israyeli bansiku kwakatola ciindi cilamfwu, kutalikila mu 740 B.C.E. kusikila mu 537 B.C.E. Businsimi bwa Ezekieli bwaamba kuti mafwuwa akali “mayumu” naa akali “mafwuwa mayumu kapati,” kutondezya kuti aabo ibakali kwiimininwa amafwuwa bakalifwide kwaciindi cilamfwu kapati. Alimwi kubukulusyigwa kwamafwuwa kwakali kuyoocitika asyoonto-syoonto kwalo ikwakali kuyootola ciindi cilamfwu.
Ino kwaamba nzi kuswaanganizyigwa antoomwe kwatusamu tobilo?
Mbotwakazyi kaindi: Nocakainda ciindi cisyoonto cakunyonganizyigwa kwalukamantano lya Nkondo Yakusaanguna Yanyika Yoonse, bananike basyeede basyomeka bakakamantana alimwi mu 1919.
Mbotuzyi lino: Businsimi butondezya kuti Jehova uyoopa kuti babelesi bakwe babe bomwe. Nowakainda mwaka wa 1919, mbwaakali kuyaabuya mazuba, bananike basyeede bakasanganwa abantu banji ibajisi bulangizi bwakupona aanyika. Nkamu zyoonse zyobilo bakomba Jehova antoomwe kabali bantu bomwe.
Kaambo kakapa kuti kube kucinca: Businsimi tabwaambi kuti kasamu komwe kakasaanguna kutyolwa kutegwa tube tobilo mpoonya alimwi nokwakainda ciindi twakaswaanganizyigwa antoomwe kuba komwe. Aboobo, businsimi tabwaambi nkamu yomwe kuti yakali kuyakwaandaana mpoonya mukuya kwaciindi yakali kuyooswaanganizyigwa. Muciindi caboobo, bupandulula nkamu zyobilo ziindene mboziyookamantana.
Ino Gogo Waku Magogo nguni?
Mbotwakazyi kaindi: Gogo Waku Magogo ndizina lyamubusinsimi ndyaakapegwa Saatani kuzwa ciindi naakatandwa kujulu.
Mbotuzyi lino: Gogo Waku Magogo ninkamu yazisi iiyoolwana bakombi basalala lyamapenzi mapati.
Kaambo kakapa kuti kube kucinca: Mbwapandululwa mubusinsimi Gogo, kwaamba kuti uyoopegwa kali cakulya kubayuni balya nyama, ibalya mitunta akupegwa busena bwakuzikkilwa anyika, kutondezya kuti Gogo tacili cilenge camuuya pe. Kuyungizya waawo, kulwanwa a Gogo kuleendelana ancolyaamba bbuku lya Daniele alimwi alya Ciyubunuzyo kujatikizya kulwanwa kwabantu ba Leza amasi aamunyika.—Dan. 11:40, 44, 45; Ciy. 17:14; 19:19.
Sena Ezekieli wakabona tempele lipati lyakumuuya, eelyo mwaapostolo Paulo ndyaakazoopandulula?
Mbotwakazyi kaindi: Tempele lyamucilengaano ca Ezekieli lilikozyenye atempele lyakumuuya ndyaakazoopandulula mwaapostolo Paulo.
Mbotuzyi lino: Ezekieli tanaakabona tempele lyakumuuya ilyakatalika mu 29 C.E., pele wakabona cilengaano citondezya bukombi busalala ibwaambidwe mu Mulawo wa Musa mbobwakali kuyoobukulusyigwa baakuzwa mubuzike. Bupanduluzi ibwakasololelwa amuuya bwa Paulo kujatikizya tempele lyakumuuya bubikkila kapati maano kumulimo wa Jesu, kali Mupaizi Mupati, iwakacitwa kuzwa mu 29 kusikila mu 33 C.E. Cilengaano catempele ca Ezekieli, calo citaambi kujatikizya mupaizi mupati, cibikkila kapati maano kukubukulusyigwa kwakumuuya kwalo kwakatalika mu 1919 C.E. Aboobo tatuyandauli ncoziiminina zintu zyoonse izili mutempele lyamucilengaano ca Ezekieli. Muciindi caboobo, tuyanda kubikkila kapati maano kuziiyo nzyotujana mucilengaano ca Ezekieli kujatikizya zyeelelo zya Jehova zyabukombi busalala.
Kaambo kakapa kuti kube kucinca: Tempele lyamucilengaano ca Ezekieli liliindene atempele lyakumuuya munzila ziyandika kapati. Mucikozyanyo, mutempele lyamucilengaano ca Ezekieli mwakali kucitilwa zipaizyo zyabanyama zinji; mutempele lyakumuuya, kwakapegwa buyo cipaizyo comwe, “ciindi comwe buyo kukabe kutamani.” (Heb. 9:11, 12) Mumyaanda yamyaka Kristo katanaboola, tiicakali ciindi ceelede cakuti Jehova ayubunune kasimpe kujatikizya tempele lyakumuuya.
