1, 2. (a) Nkaambo nzi basikwiiya ncobagambidwe? (b) Ino Jesu waamba kujatikizya butebuzi buli buti?

BASIKWIIYA bagambwa amajwi ngaamba Jesu aakuti: “Amuwaale meso aanu mubone myuunda, nkaambo yayuma kale kuti itebulwe.” Nobamvwa majwi aaya balanga ooko Jesu nkwatondeka, pele babona buyo myuunda ijisi bbaale iilimukumena—kutali zisyango ziyanda kutebulwa pe. Kweelede kuti balibuzya kuti, ‘Ino mbutebuzi buli buti mbwaamba? Kulainda myezi iili mbwiibede kutegwa mulimo wakutebula utalike.’—Joh. 4:35.

² Nokuba boobo, Jesu taambi kujatikizya butebuzi bwini-bwini pe. Muciindi caboobo, ubelesya ciindi eeci kutegwa ayiisye basikwiiya bakwe ziiyo zyobilo ziyandika kapati zijatikizya butebuzi bwakumuuya—kutebula bantu. Ino nziiyo nzi eezyo? Kutegwa tuzizyibe, atucilange-lange cibalo eeci mubulamfwu.

3. (a) Ncinzi cilangilwa kuti ncicakamukulwaizya Jesu kwaamba kuti: “Myuunda, . . . yayuma kale kuti itebulwe”? (b) Ino Jesu wakacisalazya buti ncaakali kwaamba?

³ Mubandi wa Jesu abasikwiiya bakwe wakacitika kumamanino aamwaka wa 30 C.E., afwaafwi a Sukari, munzi wabana Samariya. Ciindi basikwiiya nobanjila mumunzi, Jesu wacaala amukalo alo mpaambila mukaintu umwi kasimpe kakumuuya, mukaintu ooyo wafwambaana kubona mboziyandika njiisyo eezyo. Ciindi basikwiiya nobapiluka kuli Jesu, mukaintu wabalikila kumunzi wa Sukari kutegwa aambile basimukobonyina zintu zigambya nzyaaiya. Mulumbe wakwe wapa kuti banji babe aaluyandisisyo, alimwi basimukobonyina banji babalikila kumukalo kutegwa babonane a Jesu. Kweelede kuti aciindi eeco—Jesu wakalanga nkoyakali kugolela myuunda akubona bana Samariya kababoola—akwaamba kuti: “Amuwaale meso aanu mubone myuunda, nkaambo yayuma kale kuti itebulwe.” Mpoonya kutegwa asalazye ncaakali kwaamba, kutondezya kuti takuli kutebula kwini, pele nkwakumuuya, Jesu wakayungizya kwaamba kuti: “Sikutebula . . . uyobolola micelo yakubuumi butamani.”—Joh. 4:5-30, 36.

4. (a) Nziiyo nzi zyobilo nzyaakayiisya Jesu izijatikizya butebuzi? (b) Mibuzyo nzi njotutiilange-lange?

⁴ Nziiyo nzi zyobilo ziyandika kapati zijatikizya butebuzi bwakumuuya nzyaakayiisya Jesu? Cakusaanguna ncakuti, mulimo weelede kubelekwa cakubinda. Majwi aakwe aakuti “myuunda . . . yayuma kale kuti itebulwe,” akali kutondezya kuti basikumutobela beelede kubeleka. Kutegwa atondezye mbouyandika kapati mulimo ooyu, Jesu wakayungizya kwaamba kuti: ‘Sikutebula  ulatambula bulumbu.’ Inzya, butebuzi bwakalitalikide kale—tiikwakali kuyandika kuwayawaya pe! Cabili ncakuti, babelesi balikkomene. Jesu wakaamba kuti: Basikuminza abasikutebula ‘bayakukkomana antoomwe.’ (Joh. 4:35b, 36) Mbubwenya mbuli Jesu mwini mbwaakakkomana kubona kuti ‘bana Samaliya banji bakamusyoma,’ abalo basikwiiya bakwe bakali kuyakukkomana kubeleka camoyo woonse mumulimo wakutebula. (Joh. 4:39-42) Cibalo eeci camumwaanda wamyaka wakusaanguna cilijisi bupanduluzi bulibedelede kulindiswe nkaambo citondezya zintu zicitika mazuba aano nokubelekwa mulimo mupati kapati wakutebula wakumuuya. Ndilili mulimo wakutebula wamazuba aano nowakatalika? Mbaani batola lubazu mumulimo ooyu? Alimwi nzintu nzi zyacitika akaambo kakubeleka mulimo ooyu?

5. Nguni uusololela mumulimo wabutebuzi uucitwa munyika yoonse, alimwi ino cilengaano ca Johane citondezya buti kuti mulimo ulibindide?

⁵ Mucilengaano ncaakapegwa mwaapostolo Johane, Jehova ulayubununa mbwaakamupa mulimo Jesu kutegwa asololele mumulimo wakutebula bantu uucitwa munyika yoonse. (Amubale Ciyubunuzyo 14:14-16.) Mucilengaano eeci, Jesu upanduludwe kuti usamide musini alimwi ujisi sikela. ‘Musini wangolida ngwasamide Jesu,’ utondezya cuuno ncapedwe kujulu kali Mwami uulela. “Sikela libosya mujanza lyakwe” litondezya kuti ngu Sikutebula. Kwiinda mukubelesya mungelo kwaamba kuti “zisyango zyanyika zyabizwa zyoonse,” Jehova ukankaizya kaambo kakuti mulimo weelede kubelekwa cakubinda. Masimpe, “lyasika woola lyakutebula”—takuyandiki kuwayawaya pe! Jesu wacita kweelana amalailile aa Leza aakuti: “Vwukaula sikela lyako,” alimwi nyika yatebulwa—nkokuti, bantu bamunyika batebulwa. Cilengaano eeci alimwi cituyeezya kuti “myuunda . . . yayuma kale kuti itebulwe.” Sena cilengaano eeci cilatugwasya kuzyiba ciindi mulimo wakutebula nowakatalika? Inzya!

6. (a) Ino “ciindi cakutebula” cakatalika lili? (b) Ino ndilili nobwakatalika ‘butebuzi bwazisyango zyanyika’? Amupandulule.

⁶ Mbwaanga cilengaano ca Johane mulugwalo lwa Ciyubunuzyo caandaano 14 citondezya Jesu, Sikutebula, kasamide musini (kapango 14), nkokuti wakatalikide kale kulela kali Mwami mu 1914. (Dan. 7:13, 14) Kwiinde buyo ciindi cili mbocibede kuzwa leelyo, Jesu wakalaililwa kuti atalike kutebula (kapango 15). Mbozicitika zintu kulikozyene ambozipanduludwe mucikozyanyo ca Jesu cijatikizya butebuzi bwamaila, kwalo nkwaambide kuti: “Butebuzi mamanino aabweende bwazyintu.” Aboobo, ciindi cakutebula alimwi acamamanino aabweende bwazintu zyakatalikila antoomwe—mu 1914. Mukuya kwaciindi, “ciindi cakutebula,” mulimo wini wakutebula wakatalika. (Mt. 13:30, 39) Ikuti twalanga musyule kweelana ambotuzimvwisya zintu lino, tulakonzya kubona kuti mulimo wakutebula wakatalika nokwakainda myaka kuzwa ciindi Jesu naakatalika kulela kali Mwami. Cakusaanguna, kuzwa mu 1914 kuzikusika kumatalikilo aamwaka wa 1919, Jesu wakajisi mulimo wakusalazya basikumutobela bananike. (Malk. 3:1-3; 1 Pe. 4:17) Mpoonya mu 1919, ‘butebuzi bwazisyango zyanyika’ bwakatalika. Kakunyina kuwayawaya, Jesu wakabelesya muzike  musyomesi ngwaakasalide caino-ino kutegwa agwasye bakwesu kubona mbowakali kuyandika kubelekwa cakubinda mulimo wakukambauka. Amubone cakacitika.

7. (a) Nkuvwuntauzya nzi ikwakabagwasya bakwesu kubona mbowakabindide mulimo wakukambauka? (b) Ino bakwesu bakakulwaizyigwa kucita nzi?

⁷ Ngazi Yamulindizi yamu Chingisi ya July 1920, yakaamba kuti: “Kwiinda mukuvwuntauzya ncaamba Magwalo cilalibonya antangalala kuti cikombelo cipedwe coolwe cipati cakwaambilizya mulumbe uujatikizya bwami.” Mucikozyanyo, businsimi bwa Isaya bwakabagwasya bakwesu kubona kuti makani aa Bwami akeelede kukambaukwa munyika yoonse. (Is. 49:6; 52:7; 61:1-3) Aciindi eeco tiibakazyi mbowakali kuyakubelekwa mulimo ooyo, nokuba boobo bakali kusyoma kuti Jehova wakali kuya kubajalwida nzila. (Amubale Isaya 59:1.) Akaambo kakumvwisya mbouyandika kubelekwa cakubinda mulimo wakukambauka, bakwesu bakakulwaizyigwa kuyungizya mulimo wabo. Ino bakwesu bakakutambula buti kukulwaizya ooko?

8. Ntwaambo nzi tobilo tuyandika kapati itujatikizya mulimo wesu wakukambauka ntobakamvwisya bakwesu mumwaka wa 1921?

⁸ Ngazi Yamulindizi yamu Chingisi ya December 1921, yakaambilizya kuti: “Uno mwaka ulainda myaka yoonse kubota; alimwi bantu banji baumvwa mulumbe wakasimpe mumwaka uno wa 1921 kwiinda myaka yoonse yainda.” Magazini yakayungizya kwaamba kuti: “Kucili mulimo mupati uuciyandika kubelekwa. . . . Atuubeleke calukkomano.” Amubone bakwesu mbobakatumvwisya twaambo tobilo tuyandika kapati itujatikizya mulimo wesu wakukambauka Jesu ntwaakaambila basikwiiya bakwe, twakuti: Mulimo ulayandika kubelekwa cakubinda, alimwi babelesi balikkomene.

9. (a) Mu 1954, ncinzi ncoyakaamba Ngazi Yamulindizi kujatikizya mulimo wakutebula, alimwi nkaambo nzi? (b) Nkuyungizyika kuli buti kwabasikumwaya ikwacitika nyika yoonse mumyaka iili 50 yainda? (Amubone ccaati yakuti “ Kuyungizyika Nyika Yoonse.”)

⁹ Mumyaka yamuma 1930, bakwesu nobakamvwisya makani aamba zya nkamu mpati kuti iyakutambula mulumbe wa Bwami, bakabikkila kapati maano kumulimo wakukambauka. (Is. 55:5; Joh. 10:16; Ciy. 7:9) Ino ncinzi cakacitika? Mweelwe wabaabo ibakali kukambauka mulumbe wa Bwami wakayungizyika kuzwa ku 41,000 mu 1934 kuzikusika ku 500,000 mu 1953! Ngazi Yamulindizi yamu Chingisi ya December 1, 1954, yakaamba kuti: “Mulimo ooyu wakutebula wanyika yoonse wacitwa kwiinda mukugwasyigwa amuuya wa Jehova alimwi a Jwi lyakwe lilaanguzu.” *—Zek. 4:6.

10, 11. Mucikozyanyo canseke yamusitada, ntwaambo nzi itwaambidwe itujatikizya kukomena kwanseke eeyi?

¹⁰ Muzikozyanyo zyakwe zijatikizya Bwami, Jesu wakaambila limwi munzila iilimvwisya izyakali kuyakucitika akaambo kamulimo wakutebula. Atulange-lange cikozyanyo cakwe cijatikizya nseke yamusitada alimwi acikozyanyo cabumena. Tulabikkila kapati maano kulanga-langa mbozyazuzikizyigwa mumazuba aamamanino.

¹¹ Cikozyanyo canseke yamusitada. Muntu wakasyanga nseke yamusitada. Mpoonya yakakomena akuba cisamu mwalo bayuni mobaboola kukkala. (Amubale Matayo 13:31, 32.) Ntwaambo nzi tujatikizya kukomena kwanseke eeyi itwaambidwe mucikozyanyo eeci? (1) Kukomena kwacisamu kulagambya. “Nseke nsyoonto kapati kunseke zyoonse” yakomena akuba cisamu cijisi “mitabi mipati.” (Mk. 4:31, 32) (2) Kukomena kwaco kulisinizyidwe. ‘Nseke noyasyangwa ilakomena.’ Jesu tanaakaamba kuti, “Ilakonzya kukomena.” Wakaamba kuti: ‘Ilakomena.’ Kukomena kwaco takulesyegwi. (3) Kukomena kwacisamu kupa kuti beenzu baboole munsi lyaco akujana mwakukkala. “Bayuni bauluka mujulu balajana aakukkala mucimvwule cayo.” Mbuti twaambo ootu totatwe mbotujatikizya mulimo wakutebula wakumuuya wamazuba aano?

12. Ino cikozyanyo canseke yamusitada cikozyenye buti amulimo wabutebuzi uucitwa mazuba aano? (Alimwi amubone ccaati yakuti “ Kuyungizyika Kwamweelwe Waziiyo zya Bbaibbele.”)

¹² Kukomena: Cikozyanyo canseke yamusitada citondezya kukomena kwamulumbe wa Bwami alimwi ambungano ya Bunakristo. Kuzwa mu 1919, basikutebula basungu baletwa mumbungano ya Bunakristo yakabukulusyigwa. Aciindi eeco, mweelwe wababelesi wakali musyoonto, pele wakakomena cakufwambaana. Mubwini, kukomena kwayo kuzwa kumatalikilo aamyaka yamuma 1900 kusikila mazuba aano kulagambya. (Is. 60:22) (2) Kusinizyigwa: Kukomena kwambungano ya Bunakristo tiikwali kukonzya kulesyegwa. Nokuba kuti basinkondo bakasoleka kulundika mabwe atala anseke eeyi, yakazumanana kukomena—kutapaula buyumuyumu buli boonse. (Is. 54:17) (3) Aakukkala: “Bayuni bakujulu” ibaboola kukkala mucisamu baiminina mamiliyoni aabantu ibajisi luyandisisyo ibazwa mumasi aainda ku 240, balo ibautambula mulumbe wa Bwami kwiinda mukuba cibeela cambungano ya Bunakristo. (Ezk. 17:23) Ooku balajana cakulya cakumuuya, kukatalusyigwa, alimwi alukwabililo.—Is. 32:1, 2; 54:13.

13. Ntwaambo nzi itujatikizya kukomena itwaambidwe mucikozyanyo cabumena?

¹³ Cikozyanyo cabumena. Ciindi mukaintu naamana kubikka bumena kufulaulu, bumena bwapa kuti fulaulu woonse ufwufwumuke. (Amubale Matayo 13:33.) Ntwaambo nzi itujatikizya kukomena itwaambidwe mucikozyanyo eeci? Atulange-lange twaambo tobilo. (1) Kukomena kupa kucinca. Bumena bwakayandilila “kusikila fulaulu woonse wakafwufwumuka.” (2) Kukomena kulayandilila. Bumena bwafwufwumuna fulaulu uuli “muzisuwo zyotatwe zipati”—fulaulu woonse. Mbuti twaambo ootu tobilo mbotujatikizya mulimo wakutebula wakumuuya wamazuba aano?

14. Ino cikozyanyo cabumena ceendelana buti abutebuzi bucitwa mazuba aano?

¹⁴ (1) Kucinca: Bumena bwiiminina mulumbe wa Bwami, mpoonya fulaulu wiiminina bantu. Mbubwenya fulaulu mboucinca  wasanganizyigwa abumena, awalo mulumbe wa Bwami upa kuti bantu bacince mumoyo bautambula mulumbe. (Lom. 12:2) (2) Kuyandilila: Kuyandilila kwabumena kwiiminina kuyandilila kwamulumbe wa Bwami. Bumena bulatalika kubeleka asyoonto-syoonto kusikila mane fulaulu woonse wakkwana. Mbubwenya buyo, mulumbe wa Bwami wayandilila “kusikila kumagolelo aanyika.” (Mil. 1:8) Cibeela eeci cacikozyanyo alimwi citondezya kuti nomuba mumasi mulimo wesu moukasyidwe, mulumbe wa Bwami uyakusika, nokuba kuti mulimo wesu wakukambauka mumasena aali boobo inga tiiwalibonya caantangalala.

15. Ino majwi aalembedwe mulugwalo lwa Isaya 60:5, 22 azuzikizyigwa buti? (Amubone akabbokesi kakuti “ Jehova Wakapa Kuti Cikonzyeke,” peeji  93, alimwi akakuti “ Bantu Bace Mbobaba Mukowa Mupati” mapeeji 96-97.)

¹⁵ Kakucili myaka iili 800 Jesu katanaamba zikozyanyo eezyo, Jehova, kwiinda muli Isaya, wakacisalazya kwaamba kutondezya bupati bwamulimo wakutebula wakumuuya wamazuba aano alimwi alukkomano ilwakali kuyakuboola. Jehova wakapandulula bantu bazwa “kumagolelo aanyika” mbobaboola mumbunga yakwe. Kaambila mukaintu, iwiiminina bananike baceede anyika, wakaamba kuti: “Wabona buyo, meso aako ayoomunika, amoyo wako uyookankama cakukondwa, nkaambo imbono  yalwizi ziyooba zyako, abuvubi bwamasi bayooboola kulinduwe.” * (Is. 60:1, 4, 5, 9) Eelo kaka ngamasimpe majwi aaya! Mazuba aano, babelesi ba Jehova ibamubelekela kwaciindi cilamfwu balakkomana kapati nobabona mbowavwula mweelwe wabasikumwaya ba Bwami mumasena mobakkala kuzwa kubantu basyoonto buyo kusikila kuzyuulu-zyuulu zinji zyabasikumwaya.

16, 17. Nkaambo nzi kamwi ikapa kuti “sikuminza asikutebula bakakkomanine antoomwe”? (Amubone akabbokesi kakuti “ Tumatulakiti Tobilo Mbotwakabasika Amoyo Bantu Bobilo Baku Amazon.”)

¹⁶ Mutalubi kuti Jesu wakaambila basikwiiya bakwe kuti: “Sikutebula . . . uyobolola micelo yakubuumi butamani, kutegwa sikuminza asikutebula bakakkomanine antoomwe.” (Joh. 4:36) Mbuti ‘mbotukkomanina antoomwe’ mumulimo wakutebula wanyika yoonse? Tulacita oobo munzila zili mbozibede. Atulange-lange nzila zyotatwe.

¹⁷ Nzila yakusaanguna, tulikkomene kubona Jehova katola lubazu mumulimo. Ciindi notukambauka mulumbe wa Bwami, tusyanga mbuto. (Mt. 13:18, 19) Ciindi notugwasya muntu umwi kuba sikwiiya wa Kristo, nkokuti tutebula cisyango eeco. Alimwi toonse buyo tulakkomana kapati notubona Jehova mbwapa kuti mbuto zya Bwami ‘zikomene.’ (Mk. 4:27, 28) Mbuto zimwi nzyotusyanga zilamuka kumena alimwi zitebulwa aabambi. Ambweni andinywe cakamucitikila kale cakacitikila ba Joan, mucizyi Munakristo waku Britain iwakabbapatizyigwa myaka iili 60 yainda. Wakaamba kuti: “Ndilaswaanganya bantu ibandaambila kuti ndime ndakasyanga mbuto mumyoyo yabo ciindi nondakabakambaukila mumyaka yamusyule. Mebo kanditazyi, Bakamboni bamwi bakazyikwiiya Bbaibbele ambabo akubagwasya kuba babelesi ba Jehova. Ndilakkomana kubona kuti mbuto nzyondakasyanga zyakakomena akutebulwa.”—Amubale 1 Bakolinto 3:6, 7.

18. Nkaambo nzi ikapa kukkomana ikaambidwe mulugwalo lwa 1 Bakolinto 3:8?

¹⁸ Nzila yabili, tulazumanana kuba babelesi bakkomene notuyeeya ncaakaamba Paulo naakati: “Muntu aumwi uyootambula bulumbu bwakwe kweelana amulimo wakwe.” (1 Ko. 3:8) Bulumbu bulapegwa kweelana amulimo iwacitwa, kutali kweelana azintu zizwa kumulimo ooyo. Eelo kaka majwi aaya alabakulwaizya kapati aabo ibabelekela mumasena oomo bantu mobatavwuli kuutambula mulumbe wa Bwami! Mumeso aa Leza, Kamboni uuli woonse uutola lubazu camoyo woonse mumulimo wakusyanga ‘ulazyala micelo minji,’ aboobo weelede kukkomana.—Joh. 15:8; Mt. 13:23.

19. (a) Ino businsimi bwa Jesu ibuli mulugwalo lwa Matayo 24:14 bulujatikizya buti lukkomano lwesu? (b) Ncinzi ncotweelede kuyeeya lyoonse nokuba kuti tiitwazwidilila kugwasya muntu kuba sikwiiya?

¹⁹ Nzila yatatu, tulakkomana nkaambo mulimo wesu uzuzikizya businsimi. Amubone bwiinguzi bwa Jesu kubaapostolo bakwe ciindi nobakabuzya kuti: “Ncinzi ciyooba citondezyo cakubako kwako acamamanino aabweende bwazyintu?” Wakabaambila kuti cibeela cimwi cacitondezyo eeco ciyakuba mulimo wakukambauka munyika yoonse. Sena wakali kwaamba mulimo wakupanga basikwiiya? Peepe. Wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni.” (Mt. 24:3, 14) Aboobo, kukambauka Bwami—kusyanga mbuto—ncibeela cacitondezyo. Aboobo, notukambauka makani mabotu aa Bwami,  tweelede kuyeeya kuti naa taakwe notwazwidilila kugwasya bantu kuba basikwiiya, twazwidilila mukupa “bumboni.” * Inzya, kufwumbwa mbobautambula mulumbe bantu, tulatola lubazu mukuzuzikizya businsimi bwa Jesu alimwi tulijisi coolwe cakubeleka katuli “basimilimonyina a Leza.” (1 Ko. 3:9) Eelo kaka aaka nkaambo kabotu ikeelede kutupa kukkomana!

20, 21. (a) Ino majwi aalembedwe mulugwalo lwa Malaki 1:11 ali mukuzuzikizyigwa buti? (b) Kujatikizya mulimo wakutebula, ino ncinzi ncomukanzide kucita, alimwi nkaambo nzi?

²⁰ Mumwaanda wamyaka wakusaanguna, Jesu wakabagwasya baapostolo bakwe kubona kuti mulimo wakutebula wakali kuyandika kubelekwa cakubinda. Kuzwa buyo mu 1919, Jesu wabagwasya basikwiiya bakwe bamazuba aano kumvwisya kaambo aaka nkakonya kakuti mulimo ooyu weelede kubelekwa cakubinda. Kweelana amalailile aayo, bantu ba Leza babikkila kapati maano kuubeleka canguzu mulimo wabo wakukambauka. Alimwi buya, mulimo wakutebula walibonya kuti taukonzyi kulesyegwa pe. Kweelana ambwaakasinsima musinsimi Malaki, mulimo wakukambauka ulacitwa mazuba aano “kuzwa kumazwido aazuba akusika kumabbililo aalyo.” (Malk. 1:11) Inzya, kuzwa kumazwido akusikila kumabbililo aazuba—kuzwa kujwe mane kumbo, kufwumbwa nkobabede ano anyika—basikuminza abasikutebula balabeleka alimwi akukkomanina antoomwe. Alimwi kuzwa kumazwido mane kumabbililo aazuba—kuzwa mafwumofwumo mane kumazuba, naa buzuba boonse—tulabeleka katuzyi kuti mulimo ooyu weelede kubelekwa cakubinda.

²¹ Notulanga musyule myaka iili 100 yainda akubona kabunga kasyoonto kababelesi ba Leza mbokakomena akuba “mukowa mupati,” myoyo yesu ‘ilakkomana cakukondwa.’ (Is. 60:5, 22) Atulekele lukkomano oolo aluyando ndotujisi kuli Jehova, “Simalelo wabutebuzi,” kutukulwaizya kuzumanana kucita zyoonse nzyotukonzya mukumanizya mulimo mupati kapati wakutebula uutanacitidwe kuzwa kaindi!—Lk. 10:2.