1, 2. (a) Mumwaanda wamyaka wakusaanguna, ncinzi cakagwasya kumwaya makani mabotu mu Bulelo boonse bwabana Roma? (b) Mbumboni nzi mbotujisi ibusinizya kuti tugwasyigwa a Jehova mazuba aano? (Amubone kabbokesi kakuti: “ Makani Mabotu Mumyaambo Iinda ku 670.”)

BANTU ibakaswayide ku Jerusalemu cakabayumina kusyoma nzyobakali kumvwa. Bana Galilaya bakali kwaambaula kabotu myaambo myeenzu, alimwi mulumbe ngobakali kwaamba wakabanjila mumyoyo baswiilizi babo. Zintu eezyi zyakacitika lya Pentekoste yamu 33 C.E., aciindi eeci basikwiiya bakatambwide cipego cakwaambaula myaambo iisiyene-siyene munzila yamaleele—kusinizya kuti bakali kugwasyigwa aa Leza. (Amubale Milimo 2:1-8, 12, 15-17.) Makani mabotu ngobakakambauka buzuba oobo akabasikila bantu baindene-indene alimwi kuzwa waawo akamwaika mu Bulelo bwa Roma boonse.—Kol. 1:23.

² Mazuba aano, bantu ba Leza tabaambauli myaambo iindene-indene camaleele. Nokuba kuti cili boobo, balabelesya myaambo minji kwiinda yakabelesyegwa mumwaanda wamyaka wakusaanguna, balasandulula mulumbe wa Bwami mumyaambo iinda ku 670. (Mil. 2:9-11) Bantu ba Leza basimba mabbuku manji kapati alimwi mumyaambo minji calo icapa kuti mulumbe wa Bwami ubasikile bantu banji munyika yoonse. * Eeci acalo ncitondezyo cisinizya kuti Jehova ubelesya Mwami Jesu Kristo kusololela mulimo wesu wakukambauka. (Mt. 28:19, 20) Notulanga-langa zibelesyo zimwi nzyotwali kubelesya kutegwa tubeleke mulimo ooyu mumyaka iili 100 yainda, amubone Mwami mbwaali kutuyiisya asyoonto-syoonto kutegwa katubikkila maano kumuntu umwi aumwi alimwi ambwaali kutuyumyayumya kuba bamayi ba Jwi lya Leza.—2 Ti. 2:2.

3. Nkaambo nzi ncotubelesya zibelesyo ziindene-indene mumulimo wesu wakukambauka?

³ Jesu wakakozyanisya “majwi aa Bwami” kumbuto alimwi moyo wamuntu wakaukozyanisya kubulongo. (Mt. 13:18, 19) Mbubwenya buyo mbuli mulimi mbwakonzya kubelesya zibelesyo zisiyene-siyene kutegwa alime-lime mpayanda kusyanga, bantu ba Jehova balikubelesya zibelesyo ziindene-indene zyalo izyabagwasya kubamba myoyo yamamiliyoni aabantu kutegwa batambule mulumbe wa Bwami. Zimwi zyazibelesyo eezyo zyakabelesyegwa buyo kwaciindi cisyoonto. Zibelesyo zimwi, mbuli mabbuku amamagazini, zyazumanana kubeleka mulimo uuyandika kapati. Kwiindana anzila zyakubelesya miteende, mafilimu, amawailesi izyaambidwe mucibalo cainda,  zibelesyo zyoonse zyaambidwe mucibalo cino zyabagwasya basikumwaya ba Bwami kubandika abantu cacigaminina.—Mil. 5:42; 17:2, 3.

4, 5. Mbuti malekkoodi mbwaakali kubelesyegwa, pele ino ncinzi ncaatakali kukonzya kucita?

⁴ Makani aakalekkoodwa. Muma 1930 kuzikusika muma 1940, basikumwaya bakali kubelesya makani aa Bbaibbele aakalekkoodwa aakali kulizyigwa kubelesya mincini njobakali kweenda anjiyo. Makani aayo akali kutola maminiti aatasiki kuli osanwe. Malekkoodi aayo zimwi ziindi akajisi mitwe yamakani iilembedwe mubufwaafwi mbuli “Butatu,” “Puligatoliyo,” alimwi a “Bwami.” Ino malekkoodi aamakani aayo akali kubelesyegwa buti? Mukwesu Clayton Woodworth, Jr., iwakabbapatizyigwa mu 1930 mu United States, wakaamba kuti: “Ndakali kunyamuna kancini kasyoonto kakulizizya malekkoodi, ikabeleka kwiinda mukukwela sipiliŋi, akabulo kamwi nkondakali kubikka kumbali aalekkoodi kutegwa ilile kabotu. Ndasika amulyango, ndakali kujula kabbokesi, kubikka kabulo mpokeelede kukkala, mpoonya ndakali kukonkomona. Ikuti mwini ŋanda wajula mulyango, ndakali kwaamba kuti, ‘Ndilijisi mulumbe uuyandika kapati ngondiyanda kuti muswiilile.’” Ino bantu bakali kuutambula buti mulumbe? Mukwesu Woodworth wakaamba kuti: “Ziindi zinji, bantu bakali kuutambula mulumbe. Ziindi zimwi bantu bakali kujala buyo mulyango. Zimwi ziindi bantu bakali kuyeeya kuti ndakali kusambala mincini yakulizizya malekkoodi.”

⁵ Kuzikusika mu 1940, kwakali makani aakalekkoodwa aaindene-indene aakali kwiinda ku 90 alimwi malekkoodi aakapangwa akali kwiinda ku 1 miliyoni. Ba John E. Barr, ibakali kucita bupainiya ku Britain aciindi eeco alimwi ibakazyikuba umwi wamu Kabunga Keendelezya, bakaamba kuti: “Mumyaka yamuma 1936 kuzikusika mu 1945, lyoonse ndakali kweenda amuncini wakulizizya malekkoodi. Mumazuba aayo ndakali kulendelelwa ikuti kanditajisi muncini wakulizizya malekkoodi. Kumvwa buyo jwi lya Mukwesu  Rutherford kandili amulyango, cakali kundikulwaizya kapati; ndakali kulimvwa mbuli kuti tuli limwi buya. Nokuba boobo mulimo wakubelesya malekkoodi tiiwakali kugwasya mumbazu yakuyiisya, malekkoodi taakwe naakali kubasika amoyo bantu.”

6, 7. (a) Mbubotu nzi ibwakaboola akaambo kakubelesya makkaadi aajisi mulumbe uupa bumboni, pele muunzila nzi mwaakali kulezya? (b) Muunzila nzi Jehova mwaatubikka majwi mukanwa?

⁶ Makkaadi aakalembedwe mulumbe uupa bumboni. Kutalikila mu 1933, basikumwaya bakakulwaizyigwa kubelesya makkaadi aakalembedwe mulumbe uupa bumboni mumulimo wabo wakuŋanda aŋanda. Kkaadi iilembedwe mulumbe uupa bumboni yakali kulampa masentimita aali 7.6 mubwaamba amasentimita aali 12.7 mubulamfwu. Yakalijisi mulumbe mufwaafwi wamu Bbaibbele alimwi yakajisi bupanduluzi bwamabbuku aamba zya Bbaibbele ngobakali kukonzya kulomba bamukamwini ŋanda. Basikumwaya bakali kumupa kkaadi mwini ŋanda akumulomba kuti abale. Ba Lilian Kammerud, ibakazikubeleka mulimo wabumisyinali mu Puerto Rico amu Argentina bakaamba kuti: “Nzila yakubelesya makkaadi aalembedwe mulumbe uupa bumboni ndakaikkomanina kapati.” Nkaambo nzi ncocakali boobo? Bakaamba kuti: “Tatuli toonse notwakali kucikonzya kubandika kabotu abantu. Aboobo, nzila eeyi yakandigwasya kuzyibila kusikila bantu.”

⁷ Mukwesu David Reusch, iwakabbapatizyigwa mu 1918, wakaamba kuti: “Makkaadi aakalembedwe mulumbe uupa bumboni akabagwasya bakwesu, nkaambo mbasyoonto ibakali kulimvwa kuti inga bacikonzya kwaamba majwi aayelede.” Nokuba boobo, tazili zyoonse nzyocakali kukonzya kucita cibelesyo eeci. Mukwesu Reusch, wakaamba kuti: “Zimwi ziindi, twakali kuswaanganya bantu ibakali kuyeeya kuti tuli basyaataambi. Munzila imwi, bunji bwesu tiitwakali kucikonzya kwaambaula. Pele Jehova wakali kutugwasya kulibambila kusikila bantu kubuleya katuli bakambausi bakwe. Muciindi, wakali kuyakutubikka majwi mukanwa kwiinda mukutuyiisya kubelesya Magwalo notubandika abantu aŋanda. Eeci cakacitwa kwiinda mu Cikolo Camulimo Weendelezyegwa a Leza icakatalika muma 1940.”—Amubale Jeremiya 1:6-9.

8. Mbuti mbomukonzya kulekela Kristo kuti amuyiisye?

⁸ Mabbuku. Kuzwa mu 1914, bantu ba Jehova bamwaya mabbuku aasiyene-siyene aainda ku 100 aajisi makani aamu Bbaibbele. Akati kamabbuku aayo, amwi akabambilidwe kuyiisya basikumwaya kuba bamayi bacibwene. Ba Anna Larsen, ibakkala ku Denmark, ibali kubeleka kabali basikumwaya kwamyaka iibalilwa ku 70 bakati: “Jehova wakatugwasya kuba basikumwaya bacibwene kwiinda mu Cikolo Camulimo Weendelezyegwa a Leza alimwi akwiinda mumabbuku amwi aagwasya kuba bakambausi bacibwene. Ndililiyeeyede bbuku lyakusaanguna akati kamabbuku aayo, lyakali bbuku lya Theocratic Aid to Kingdom Publishers, ilyakamwaigwa mu 1945. Mpoonya ilyakaccilila lyakali bbuku lyakuti “Equipped for Every Good Work,” ilyakamwaigwa mu 1946. Lino tujisi bbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, ilyakamwaigwa mu 2001.” Cakutadooneka, Cikolo Camulimo Weendelezyegwa a Leza alimwi amabbuku aali mbuli bwayaaya atugwasya kapati ciindi Jehova naali kutupa kuti “tweelele ncobeni kuba babelesi.” (2 Ko. 3:5, 6) Sena mwakalilembya mu Cikolo Camulimo Weendelezyegwa a Leza? Sena nomuunka kumiswaangano nsondo  ansondo mulalitolelezya bbuku lya Cikolo Camulimo akutobelezya ciindi mulangizi wacikolo nazubulula twaambo tumwi? Ikuti kamucita oobo, nkokuti muzumizya Kristo kumuyiisya kuti mube mwiiyi mubotu.—2 Ko. 9:6; 2 Ti. 2:15.

9, 10. Ino kubelesya mabbuku kwagwasya buti mukusyanga alimwi amukutilaila mbuto zyakasimpe?

⁹ Jehova alimwi watugwasya kwiinda mukupa kuti mbunga yakwe icikonzye kumwaya mabbuku aagwasya basikumwaya kupandulula njiisyo zya Bbaibbele zyantalisyo. Bbuku lyakuti The Truth That Leads to Eternal Life lyakagwasya ncobeni. Lyakamwaigwa ciindi cakusaanguna mu 1968 alimwi lyakabagwasya bantu banji mbolyakazwida buyo. Mulimo wa Bwami wamu Chingisi wamu November 1968, wakaamba kuti: “Kuli bantu banji ibayanda bbuku lya Truth, cakuti mu September kwakayungizyigwa akabunga kambi kababelesi kutegwa kakabeleka masiku kufakitoli ya Sosaiti yaku Brooklyn.” Cibalo cakazumanana kwaamba kuti: “Ciindi cimwi mu August, mweelwe wamabbuku aa Truth aakali kuyandika wakaindilila amweelwe wamabbuku aakatumwa a 1.5 miliyoni!” Kuzikusika mu 1982, kwakasimbidwe mabbuku aa Truth aainda ku 100 miliyoni mumyaambo iili 116. Mumyaka iili 14 kuzwa mu 1968 kuzikusika mu 1982, bbuku lya Truth lyakagwasya bantu bainda ku 1 miliyoni kuba basikumwaya ba Bwami. *

¹⁰ Mu 2005, kwakamwaigwa bbuku limbi ligwasya mukwiiya Bbaibbele lyakuti Ino Ncinzi Cini Bbaibbele Ncoliyiisya? Makkopi aabbuku eeli aabalilwa ku 200 miliyoni akasimbwa kale mumyaambo iili 256! Ino yagwasya buti? Mumyaka buyo iili ciloba, kuzwa mu 2005 kuzikusika mu 2012, bantu babalilwa ku 1.2 miliyoni baba basikumwaya bamakani mabotu. Mumyaka eeyi njimunya, mweelwe wabantu ibakali kwiiya Bbaibbele andiswe wakatanta, kuzwa ku 6 miliyoni kusika kubantu ibainda ku 8.7 miliyoni. Cakutadooneka, Jehova ulaulongezya mulimo wesu wakusyanga akutilaila mbuto zyakasimpe ka Bwami.—Amubale 1 Bakolinto 3:6, 7.

11, 12. Kweelana amagwalo aatazubulwidwe, ino mamagazini eesu akabambilwa kugwasya mbunga zyabantu zili buti?

¹¹ Mamagazini. Kumatalikilo, bantu ibakali kulembelwa magazini ya Ngazi Yamulindizi bakali ‘bakatanga kaniini,’ aabo ibatola lubazu “mubwiite bwakujulu.” (Lk. 12:32; Heb. 3:1) Mu  October 1, 1919, mbunga ya Jehova yakatalika kumwaya magazini imbi, yalo iyakabambilidwe nkamu imbi yabantu, banamaleya. Magazini eeyi bakali kwiikkomanina kapati Basikwiiya Bbaibbele alimwi abanamaleya cakuti kwamyaka minji njiyakali kumwaigwa kapati kwiinda Ngazi Yamulindizi. Magazini eeyi kusaanguna yakali kwiitwa kuti The Golden Age. Mu 1937, zina lyakacincwa, yakatalika kwiitwa kuti Consolation. Mpoonya mu 1946, yakatalika kwiitwa kuti Sinsimuka!

¹² Mumyaka minji yainda, mamagazini aa Ngazi Yamulindizi alimwi a Sinsimuka! acincwa-cincwa mbwaaboneka, nokuba boobo makanze aamamagazini aaya taakwe naacinca pe—ikwaambilizya Bwami bwa Leza akugwasya bantu kuba aalusyomo mu Bbaibbele. Mazuba aano, Ngazi Yamulindizi ilamwaigwa mumisyobo yobilo, magazini yakwiiya alimwi ayakubuleya. Magazini yakwiiya ibambilidwe “babelesi bamuŋanda”—nkokuti, “katanga kaniini” alimwi ‘abambelele zimbi.’ * (Mt. 24:45; Joh. 10:16) Magazini yakubuleya ibambilidwe kapati aabo batanazyiba kasimpe pele ibasyoma mu Bbaibbele amuli Leza. (Mil. 13:16) Magazini ya Sinsimuka! ibambilidwe  kugwasya baabo ibajisi luzyibo lusyoonto lwamu Bbaibbele alimwi a Leza wakasimpe, Jehova.—Mil. 17:22, 23.

13. Ncinzi cimukkomanisya kapati kujatikizya mamagazini eesu? (Amubandike ccaati yakuti: “ Myeelwe Yamabbuku Aamwaigwa Munyika Yoonse.”)

¹³ Kuzikusika kumatalikilo aamwaka wa 2014, mwezi amwezi mamagazini aa Sinsimuka! aainda ku 44 miliyoni, alimwi amamagazini aabalilwa ku 46 miliyoni aa Ngazi Yamulindizi akali kusimbwa. Magazini ya Sinsimuka! yakali kusandululwa mumyaambo ibalilwa ku 100, mpoonya Ngazi Yamulindizi, yakali kusandululwa mumyaambo iinda ku 200, calo icakapa kuti abe ngamagazini aainda kusandululwa alimwi aainda kumwaigwa munyika yoonse! Nokuba kuti kuzwidilila ooku kulakkomanisya, takweelede kutugambya pe. Mamagazini aaya ajisi mulumbe Jesu ngwakaamba kuti uyakukambaukwa munyika yoonse.—Mt. 24:14.

14. Ncinzi ncotwabikkila kapati maano kusumpula, alimwi nkaambo nzi?

¹⁴ Bbaibbele. Mu 1896, Mukwesu Russell abeenzinyina bakacinca zina lyambunga njobakali kubelesya kusimba mabbuku kutegwa kubikkilizyigwe bbala lyakuti Bible; aboobo, mbunga eeyo yakatalika kwiitwa kuti Watch Tower Bible and Tract Society. Kucinca ooku kwakali kweelela nkaambo Bbaibbele lyali cibelesyo ciyandika lyoonse mukumwaya makani mabotu aa Bwami. (Lk. 24:27) Kweelana azina lyambunga lizumizyidwe amulawo, babelesi ba Leza cabusungu bazumanana kusumpula mulimo wakumwaya alimwi akukulwaizya bantu kubala Bbaibbele. Mucikozyanyo, mu 1926, twakabelesya mincini yesu kusimba Bbaibbele lya The Emphatic Diaglott, busanduluzi bwa Magwalo aa Banakristo aa Chigiriki ibwakalembwa aba Benjamin Wilson. Kutalikila mu 1942, twakasimba akumwaya makkopi aabalilwa ku 700,000 aa Bbaibbele lyoonse lya King James Version. Nokwakainda buyo myaka yobilo, twakatalika kusimba Bbaibbele lya American Standard Version, mwalo imujanika zina lya Jehova ziindi zili 6,823. Kuzikusika mu 1950, twakalimwaide kale ma Bbaibbele aainda ku 250,000.

15, 16. (a) Ncinzi cimukkomanisya kujatikizya Bbaibbele lya Busanduluzi bwa Nyika Mpya? (Amubandike kabbokesi kakuti: “ Kutolaambele Mulimo Wakusandulula Bbaibbele.”) (b) Mbuti mbomukonzya kulekela Jehova kumusika amoyo?

¹⁵ Mumwaka wa 1950, kwakamwaigwa Bbaibbele lyamu Chingisi lya Busanduluzi bwa Nyika Mpya bwa Magwalo aa Banakristo aa Chigiliki. Bbaibbele likkwene lya Busanduluzi bwa Nyika Mpya bwa Magwalo Aasalala lyakamwaigwa lyoonse kalili bbuku lyomwe ciindi cakusaanguna mu 1961. Bbaibbele eeli lilamulemeka Jehova kwiinda mukupilusya zina lyakwe mumasena molyakabede mumalembe aakusaanguna aa Chihebrayo. Izina lya Leza alimwi lilajanika ziindi izili 237 mu Magwalo aa Banakristo aa Chigiriki. Kutegwa katusinizyide kuti lililuzi alimwi kalitakatazyi kubala, Bbaibbele lya Busanduluzi bwa Nyika Mpya bwa Magwalo Aasalala lyamu Chingisi lyakalembululwa ziindi zili mbozibede, kulembululwa kwaino-ino kwakacitwa mu 2013. Kuzikusika mu 2013, ma Bbaibbele aa Busanduluzi bwa Nyika Mpya aainda ku 201 miliyoni akamwaigwa mucibeela naa lyoonse mbolizulwa mumyaambo iili 121.

¹⁶ Ino bamwi bajatikizyigwa buti kwiinda mukubala Bbaibbele lya Busanduluzi bwa Nyika Mpya mumwaambo wabo? Mwaalumi umwi waku Nepal, wakaamba kuti: “Kubanabunji, busanduluzi bwa Bbaibbele lyaci Nepalese ndyotwajisi lyali kubakatazya kumvwa, nkaambo libelesya mabala aakaindi. Pele lino tulakonzya kulimvwisya Bbaibbele kabotu-kabotu, nkaambo libelesya mabala ngotubelesya lyoonse.” Ciindi mukaintu umwi wamucisi ca Central African  Republic naakatalika kubala Bbaibbele lyamuci Sango, wakatalika kulila akwaamba kuti: “Ooyu ngomwaambo wangu uundisika amoyo.” Mbubwenya mbuli mukaintu ooyu, toonse tulakonzya kulekela Jehova kuti atusike amoyo kwiinda mukubala Jwi lyakwe buzuba abuzuba.—Int. 1:2; Mt. 22:36, 37.

17. Mbuti mbomukonzya kutondezya kuti mulalumba akaambo kazibelesyo alimwi alwiiyo ndomutambula, alimwi ncinzi ciyakucitika akaambo kakucita oobo?

¹⁷ Sena mulatondezya kulumba akaambo kazibelesyo alimwi alwiiyo iluyaambele ndwatupa Mwami Jesu Kristo? Sena mulajana ciindi cakubala mabbuku aazwa kumbunga ya Leza, alimwi sena mulaabelesya kugwasya bamwi? Ikuti kamucita oobo, nkokuti andinywe mulakonzya kwaamba majwi aakaamba Mucizyi Opal Betler, iwakabbapatizyigwa mu October 4, 1914. Ba Opal bakaamba kuti: ‘Kwamyaka minji, mebo abalumi bangu ba Edward twakali kubelesya malekkoodi alimwi amakkaadi aalembedwe mulumbe uupa bumboni. Twakali kukambauka kuŋanda aŋanda kwiinda mukubelesya mabbuku, tubbuku, alimwi amamagazini. Twakali kukambauka katuli nkamu akumwaya mulumbe uusimbidwe. Mukuya kwaciindi, twakayiisyigwa kupanga nyendo zyakupilukila akusololela ziiyo zya Bbaibbele mumaanda aabaabo ibajisi luyandisisyo. Twali kupona buumi bujisi zyakucita zinji pele ibukkomanisya.’ Jesu wakasyomezya kuti balelwa bakwe banakujisi bubi mumulimo wakusyanga, kutebula, akukkomana caantoomwe. Mbubwenya mbuli ba Opal, mamiliyoni aabakwesu abacizyi balakonzya kuzuminizya mbocili camasimpe cisyomezyo eeco.—Amubale Johane 4:35, 36.

18. Ncoolwe nzi ncotujisi?

¹⁸ Bantu banji ibatanaba babelesi ba Mwami balakonzya kubona bantu ba Leza kuti mbantu ‘batayiide kapati alimwi mbantu buyo.’ (Mil. 4:13) Pele amuyeeye buyo! Mwami wabagwasya bantu bakwe ibabonwa kuba bantu buyo kuti babe mbunga iinda mbunga zyoonse caboola kukusimba, akumwaya mabbuku aainda mabbuku oonse aasandululwa akumwaigwa munyika yoonse! Ciinda waawo, watuyiisya akutugwasya kubelesya zibelesyo eezyi kumwaya makani mabotu kubantu bamumasi oonse. Eelo kaka tulijisi coolwe cakubelekela aantoomwe a Kristo mumulimo wakusyanga mbuto zyakasimpe akutebula basikwiiya!