1. Ncinzi ncomukonzya kulibuzya mwamana kwiiya bbuku eeli cakusitikila?

NOMWALI kwiiya Bbaibbele kubelesya bbuku eeli, mwaiya makani manji aakasimpe mbuli makani aajatikizya cisyomezyo cabuumi butamani, cicitika muntu afwa, alimwi abulangizi bwabubuke. (Mukambausi 9:5; Luka 23:43; Johane 5:28, 29; Ciyubunuzyo 21:3, 4) Ambweni mwakatalika kujanika kumiswaangano ya Bakamboni ba Jehova eelyo mwalibonena ameso kuti mbabakombi bakasimpe. (Johane 13:35) Kuyungizya waawo, ambweni lino mwatalika kuba acilongwe ciyumu a Jehova, alimwi ambweni mwasala kuti  mumubelekele. Aboobo, ndiza mulibuzya kuti, ‘Ino ncinzi ncondeelede kucita lino kutegwa ndibelekele Leza?’

2. Ncinzi cakapa kuti mwaalumi umwi muna Etiopiya ayande kubbapatizyigwa?

² Eeco ncaakacita mwaalumi umwi muna Etiopiya iwakapona aciindi Jesu naakali waano anyika. Nokwakainda ciindi cili mbocibede kuzwa leelyo Jesu naakabusyigwa, sikwiiya wa Jesu wazina lya Filipo wakakambaukila mwaalumi ooyo. Filipo wakamusalazyila kuti Jesu wakali Mesiya. Makani ngaakaiya mwaalumi ooyo muna Etiopiya akamunjila kapati mumoyo cakunga cakutasowa ciindi wakaamba kuti: “Bona! Ngaaya maanzi; ino ncinzi cindilesya kubbapatizyigwa?”—Milimo 8:26-36.

3. (a) Ino Jesu wakabalailila kucita nzi basikumutobela? (b) Ino muntu weelede kubbapatizyigwa buti?

³ Cakusalazya Bbaibbele lituyiisya kuti, ikuti naa muyanda kubelekela Jehova, mweelede kubbapatizyigwa. Jesu wakaambila basikumutobela kuti: “Kamuya mukayiisye bantu bazisi zyoonse kuti babe basikwiiya, akubabbapatizya.” (Matayo 28:19) Alimwi Jesu lwakwe mwini wakatusiila cikozyanyo kwiinda mukubbapatizyigwa. Wakabbizyigwa cakumaninina mumeenda, tanaakasansailwa buyo meenda atala amutwe pe. (Matayo 3:16) Mazuba aano, ciindi Munakristo nabbapatizyigwa, awalo weelede kubbizyigwa cakumaninina mumeenda.

4. Ino kubbapatizyigwa kwanu kubatondezya nzi bamwi?

⁴ Ciindi nomwabbapatizyigwa, mutondezya bamwi kuti masimpe muyanda kuba mulongwe wa Leza alimwi akumubelekela. (Intembauzyo 40:7, 8) Aboobo, ambweni mulibuzya kuti, ‘Ncinzi ncondeelede kucita kutegwa ndibbapatizyigwe?’

5. (a) Ncinzi ncomweelede kusaanguna kucita kamutanabbapatizyigwa? (b) Nkaambo nzi miswaangano ya Bunakristo ncoiyandika?

⁵ Kamutanabbapatizyigwa, mweelede kumuzyiba Jehova  alimwi a Jesu. Mwakatalika kale kucita oobo kwiinda mukwiiya Bbaibbele. (Amubale Johane 17:3.) Nokuba boobo, kuli azimbi ziyandika. Bbaibbele lyaamba kuti mweelede ‘kuzuzyigwa luzyibo lwini-lwini’ lwamakanze aa Jehova. (Bakolose 1:9) Miswaangano ya Bakamboni ba Jehova iyoomugwasya kuba acilongwe ciyumu kapati a Jehova. Aaka nkakaambo kamwi kayandika kapati ncomweelede kujanika kumiswaangano eeyi lyoonse.—Bahebrayo 10:24, 25.

6. Ino mweelede kuzyiba zintu zinji buti zyamu Bbaibbele kamutanabbapatizyigwa?

⁶ Masimpe, Jehova talangili kuti mweelede kuzizyiba zyoonse izili mu Bbaibbele kamutanabbapatizyigwa. Kunyina naakalangila kuti mwaalumi uulya muna Etiopiya azizyibe zyoonse katanabbapatizyigwa. (Milimo 8:30, 31) Mubwini, tunakwiiya kujatikizya Leza lyoonse mane kukabe kutamani. (Mukambausi 3:11) Nokuba boobo, kutegwa mubbapatizyigwe, mweelede kuzizyiba alimwi akuzizumina njiisyo zyantalisyo zyamu Bbaibbele.—Bahebrayo 5:12.

7. Ino ikwiiya Bbaibbele kwamugwasya buti?

⁷ Bbaibbele lyaamba kuti: “Ikuti kakunyina lusyomo tacikonzyeki pe kumukkomanisya Leza.” (Bahebrayo 11:6) Aboobo, mweelede kuba alusyomo kamutanabbapatizyigwa. Bbaibbele litwaambila kuti ciindi bantu bamwi bamumunzi wa Korinto wakaindi nobakaamvwa makani ngobakali kuyiisya basikutobela Jesu, “bakatalika kusyoma akubbapatizyigwa.” (Milimo 18:8) Mbubonya buyo, ikwiiya Bbaibbele kwamugwasya kuzisyoma zisyomezyo zya Leza alimwi akuba alusyomo mucipaizyo ca Jesu eeco icikonzya kutufwutula kucibi alufwu.—Joshua 23:14; Milimo 4:12; 2 Timoteyo 3:16, 17.

8. Ncinzi ciyoomukulwaizya kwaambila bamwi zintu nzyomwiiya?

⁸ Nomuzumanana kwiiya zinji mu Bbaibbele alimwi akubona mbolimugwasya mubuumi bwanu, lusyomo lwanu  alwalo lunooyaabuyuma. Eeci ciyoopa kuti moyo wanu upye akuyanda kwaambila bamwi zintu nzyomwiiya. (Jeremiya 20:9; 2 Bakorinto 4:13) Pele ino mbaani mbomweelede kwaambila?

9, 10. (a) Ino mbaani mbomukonzya kutalika kwaambila zintu nzyomwiiya? (b) Ncinzi ncomweelede kucita ikuti naa muyanda kutalika kukambauka antoomwe ambungano?

⁹ Mulakonzya kwaambila bamumukwasyi wanu, beenzinyoko, basimukobonyoko, naa mbomubeleka limwi kujatikizya zintu nzyomwiiya. Cili kabotu kucita boobo, pele lyoonse mweelede kucita oobo amoyo mubombe alimwi caluyando. Mukuya kwaciindi, muyakweelela kutalika kukambauka antoomwe ambungano. Mwaakulimvwa kuti mulakonzya kucita oobo, amukamuzyibye Kamboni ooyo uumuyiisya Bbaibbele akumwaambila kuti muyanda kutola lubazu mumulimo wakukambauka antoomwe ambungano. Ikuti Kamboni ooyo wabona kuti mulakonzya kucita oobo alimwi ikuti buumi bwanu kabweendelana azyeelelo zyamu Bbaibbele, nkokuti moonse mobilo muyakuswaangana abaalu bobilo bambungano.

¹⁰ Ino ncinzi ciyakucitika mwaakuswaangana abaalu? Baalu bayakubandika andinywe kutegwa babone naa mulazimvwisya alimwi akuzizumina njiisyo zyantalisyo zyamu Bbaibbele, ikuti naa mulazitobela mubuumi bwanu nzyolyaamba Bbaibbele, alimwi akuti naa ncobeni muyanda kuba umwi wa Bakamboni ba Jehova. Kamuyeeyede kuti baalu balababikkila maano basimbungano boonse, kubikkilizya andinywe, aboobo amwaanguluke kubandika ambabo, mutabayoowi pe. (Milimo 20:28; 1 Petro 5:2, 3) Baakumana kubandika andinywe, baalu bayakumwaambila naa inga mwatalika kukambauka antoomwe ambungano.

11. Nkaambo nzi ncociyandika kapati kucinca kamutanatalika kukambauka antoomwe ambungano?

¹¹ Kweelana ambobabona, baalu zimwi ziindi balakonzya kwaambila muntu umwi kuti kuli nzyaciyandika kucinca mubuumi bwakwe katanatalika kukambauka antoomwe  ambungano. Nkaambo nzi ncociyandika kapati kucinca? Nkaambo ciindi notwaambila bamwi makani aajatikizya Leza, twiiminina Jehova, aboobo buumi mbotupona bweelede kupa kuti alemekwe.—1 Bakorinto 6:9, 10; Bagalatiya 5:19-21.

12. Nkaambo nzi bantu boonse ncobayandika kweempwa?

¹² Kuli acimbi ncomweelede kucita kamutanabbapatizyigwa. Mwaapostolo Petro wakaamba kuti: “Aboobo, amweempwe akusanduka kutegwa zibi zyanu zimwaigwe.” (Milimo 3:19) Ino kweempwa caamba nzi? Caamba kuusa kapati akaambo kacibi cili coonse ncotwacita. Mucikozyanyo, ikuti naa tiimwakali kulilemeka mumakani aakoonana, nkokuti muyandika kweempwa. Alimwi nokuba kuti mubuumi bwanu boonse mwali kusoleka canguzu kucita zintu zili kabotu, anywebo muyandika kweempwa, nkaambo toonse buyo tulabisya alimwi tuyandika kulomba kulekelelwa kuli Leza.—Baroma 3:23; 5:1.

13. Ino “kusanduka” caamba nzi?

¹³ Sena kuusa akaambo kacibi ncitwakacita ncecintu cilikke ncotweelede kucita? Peepe. Petro wakaamba kuti alimwi mweelede “kusanduka.” Eeci caamba kuti mweelede kuzileka zintu zili zyoonse zibi nzyomwakali kucita kaindi akutalika kucita zintu zili kabotu. Mucikozyanyo, amweezyeezye kuti muunka kubusena bumwi mbomutanaswaide. Nomuyaabweenda munzila, mwabona kuti ooko nkomutozya takuli nkuko pe. Ino inga mwacita buti? Cakutadooneka, mulakonzya kwiima akulunyona mpoonya akutalika kutozya kulubazu luluzi ikuli busena nkomuya. Mbubonya buyo, nomwiiya Bbaibbele mulakonzya kubona kuti kuli ziyanza naa micito imwi njomucita eeyo njomweelede kuleka. Mutawayiwayi pe, ‘amusanduke’—nkokuti, amucince—akutalika kucita zintu zili kabotu.

14. Ino inga mwalyaaba buti kuli Leza?

¹⁴ Ntaamu aimbi iiyandika kapati njomweelede kubweza kamutanabbapatizyigwa nkulyaaba nobeni kuli Jehova. Ciindi nomulyaaba kuli Jehova, mulapaila kulinguwe ikumusyomezya kuti munookomba buyo nguwe alikke alimwi akuti ikucita kuyanda kwakwe ncecinooli cintu cakusaanguna mubuumi bwanu.—Deuteronomo 6:15.

15, 16. Ino ncinzi cipa kuti muntu alyaabe kuli Leza?

¹⁵ Ikusyomezya kuti munoobelekela buyo Jehova alikke cili mbuli kusyomezya kuti mubuumi bwanu boonse munookkala amuntu ngomuyandisya. Mucikozyanyo, amweezyeezye kuti musankwa amusimbi baleebana. Musankwa ooyo nayaabumuzyiba kabotu musimbi, luyando ndwajisi kulinguwe lulakomena, eelyo inga wayanda kuti bakwatane. Nokuba kuti ikusala kukwata makani mapati, musankwa ooyo ulilisungwide kunyamuna mukuli ooyu akaambo kakuti ulamuyanda kapati musimbi wakwe.

¹⁶ Ciindi nomwiiya kujatikizya Jehova, mulatalika kumuyanda, eelyo eeci cimupa kuyanda kuti mumubelekele camoyo woonse. Aboobo moyo wanu ulamusungula kupaila kulinguwe ikumusyomezya kuti munoomubelekela lyoonse. Bbaibbele lyaamba kuti kufwumbwa muntu uuyanda kutobela Jesu weelede ‘kuliimya.’ (Marko 8:34) Ino eeci caamba nzi? Caamba kuti ikumvwida Jehova ncecinooli cintu cakusaanguna mubuumi bwanu. Ncayanda Jehova ncecinooli cintu ciyandika kapati kulindinywe ikwiinda nzyomuyanda nywebo naa makanze aanu.—Amubale 1 Petro 4:2.

17. Nkaambo nzi bantu bamwi ncobatalyaabi kuli Jehova?

¹⁷ Bantu bamwi tabalyaabi kuli Jehova akaambo kakuti bayoowa kuti inga baalilwa kuzumanana kumubelekela mbuli mbobakamusyomezya. Tabayandi kumutyompya Jehova,  naa bayeeya kuti ikuti tiibalyaaba kulinguwe, nkokuti Jehova takabapi mulandu muzintu nzyobacita.

18. Ino ncinzi iciyakumugwasya kuleka kuyoowa kuti inga mwamutyompya Jehova?

¹⁸ Ikuyanda Jehova kuyoomugwasya kuleka kuyoowa kuti inga mwamutyompya. Akaambo kakuti mulamuyanda, munoosoleka canguzu kuzuzikizya cisyomezyo canu kulinguwe. (Mukambausi 5:4; Bakolose 1:10) Kunyina nomuyakulimvwa kuti nciyumu kapati kucita ncayanda Jehova. Mwaapostolo Johane wakalemba kuti: “Kuyanda Leza caamba kuti katubamba milawo yakwe; alimwi buya milawo yakwe tiiminyi.”—1 Johane 5:3.

19. Nkaambo nzi ncomuteelede kuyoowa kulyaaba kuli Jehova?

¹⁹ Tamuyandiki kuba muntu uulondokede buya kutegwa mulyaabe kuli Jehova. Walo kunyina nalangila kuti tucite zintu nzyotutakonzyi kucita. (Intembauzyo 103:14) Unoomugwasya kucita zintu zili kabotu. (Isaya 41:10) Amusyome Jehova camoyo woonse, eelyo ‘walo ulalulamika nzila zyanu.’—Tusimpi 3:5, 6.

20. Nintaamu nzi njomweelede kubweza mwamana kulyaaba kuli Leza?

²⁰ Sena mulimvwa kuti mulilibambilide kulyaaba kuli Jehova? Mwamana kulyaaba kuli Jehova, munoolibambilide kubweza ntaamu iitobela. Mweelede kubbapatizyigwa.

21, 22. Mbuti mbomukonzya ‘kwaambilizya lusyomo lwanu antangalala’?

²¹ Amukamuzyibye sicuuno wakabunga kabaalu kambungano yanu kuti mwakalyaaba kuli Jehova eelyo muyanda kubbapatizyigwa. Walo uyoobikka bubambe bwakuti baalu ibali mbobabede bakabandike andinywe njiisyo zyantalisyo zyamu Bbaibbele. Baakubona kuti muleelela ncobeni, bayoomwaambila kuti inga mwabbapatizyigwa lyamuswaangano uuboola wabbazu naa wacooko wa  Bakamboni ba Jehova. Kumuswaangano ooyo kuyoopegwa makani aapandulula ncolwaamba lubbapatizyo. Kumamanino aamakani, imwaambi ooyo uuyakupa makani uyakubuzya baabo ibayanda kubbapatizyigwa mibuzyo yobilo iitakatazyi kuvwiila. Kwiinda mukwiingula mibuzyo eeyo, ‘mwaambilizya lusyomo lwanu antangalala.’—Baroma 10:10.

 ²² Mpoonya muyakubbapatizyigwa. Muyakubbizyigwa cakumaninina mumeenda. Lubbapatizyo lwanu luyootondezya bantu boonse kuti mwakalyaaba kuli Jehova akuti lino muli umwi wa Bakamboni ba Jehova.

23. Ino caamba nzi kubbapatizyigwa “muzina lya Taata alya Mwana alya muuya uusalala”?

²³ Jesu wakaamba kuti basikwiiya bakwe bakali kuyoobbapatizyigwa “muzina lya Taata alya Mwana alya muuya uusalala.” (Amubale Matayo 28:19.) Ino eeci caamba nzi? Caamba kuti mulibuzyi alimwi mulabuzumina bweendelezi bwa Jehova amulimo ngwajisi Jesu mumakanze aa Leza, alimwi akuti mulizyi Leza mbwaubelesya muuya wakwe uusalala mukupa kuti kucitwe kuyanda kwakwe.—Intembauzyo 83:18; Matayo 28:18; Bagalatiya 5:22, 23; 2 Petro 1:21.

24, 25. (a) Ino lubbapatizyo lwiiminina nzi? (b) Ncinzi ncotuyakubandika mucibalo camamanino?

²⁴ Kuli cintu cimwi ciyandika kapati ncolwiiminina lubbapatizyo. Nomwabbizyigwa mumeenda, caamba kuti mwafwa, naa mwabuleka, ibuumi bwakaindi mbomwakali kupona. Mwaimpuka mumeenda, caamba kuti mwatalika kupona buumi bupya bwakucita kuyanda kwa Leza. Citondezya kuti kuzwa aciindi eeco kuyakumbele munoobelekela Jehova. Mutalubi kuti tamulyaabide kumuntu, kumbunga, naa kumulimo umwi pe. Mwaaba buumi bwanu kuli Jehova.

²⁵ Ikulyaaba kwanu kuyoomupa kuba acilongwe cini-cini a Leza. (Intembauzyo 25:14) Pele eeci tacaambi kuti muntu uyakufwutuka akaambo buyo kakuti ulibbapatizyidwe. Mwaapostolo Paulo wakalemba kuti: “Amuzumanane kubelekela lufwutuko lwanu cakuyoowa akukankama.” (Bafilipi 2:12) Lubbapatizyo matalikilo buyo. Aboobo, mbuti mbomukonzya kuzumanana kuba acilongwe ciyumu a Jehova? Cibalo camamanino cabbuku eeli cilawiingula mubuzyo ooyu.