1. Nguni weelede kutwaambila nzila iiluzi yakukomba Leza?

ZIKOMBELO zinji zyaamba kuti ziyiisya kasimpe kujatikizya Leza. Pele eeco tacikonzyeki, nkaambo zikombelo ziyiisya zintu ziindene kapati kujatikizya Leza alimwi ambotweelede kumukomba. Ino mbuti mbotukonzya kuzyiba nzila iiluzi yakukomba Leza? Jehova alikke nguukonzya kutwaambila mbotweelede kumukomba.

2. Ino mbuti mbomukonzya kuzyiba nzila iiluzi yakukomba Leza?

² Jehova watupa Bbaibbele kutegwa tuzyibe nzila iiluzi yakumukomba. Aboobo, amwiiye Bbaibbele, eelyo Jehova uyoomugwasya kuti mugwasyigwe anjiisyo zyakwe nkaambo ulamubikkila maano kapati.—Isaya 48:17.

3. Ino ncinzi Leza ncayanda kuti tucite?

³ Bantu bamwi baamba kuti Leza ulazikkomanina zikombelo zyoonse, pele oobu tabusyi Jesu mbwaakatuyiisya. Wakaamba kuti: “Tabali boonse bandiita kuti ‘Mwami, Mwami,’ ibayoonjila mu Bwami bwakujulu, pele buyo ooyo uucita kuyanda kwa Taata.” Aboobo, cilayandika kapati kuti twiiye ncayanda Leza alimwi akucicita. Makani aaya mapati, nkaambo Jesu wakakozyanisya bantu ibatamumvwidi Leza kuzigwebenga naa kuli “basimucita zibi.”—Matayo 7:21-23.

4. Ino Jesu wakaamba nzi kujatikizya kucita ncayanda Leza?

⁴ Jesu wakatucenjezya kuti ciindi notuyanda kucita ncayanda Leza, tunoojana buyumuyumu. Wakaamba kuti: “Amunjile mumulyango uusyanikide, nkaambo mulyango uukwazeme alimwi anzila mpati itola kulunyonyooko, kumane  mbanji banjila mulinjiyo; pele ulisyanikide mulyango alimwi ninsyoonto nzila iitola kubuumi, kumane mbasyoonto baijana.” (Matayo 7:13, 14) Nzila nsyoonto, nkokuti nzila iiluzi yakukomba Leza, itola kubuumi butamani. Nzila mpati, nkokuti nzila iitaluzi yakukomba Leza, itola kulufwu. Pele Jehova tayandi kuti muntu naba omwe akafwe. Bantu boonse ubapa coolwe cakwiiya kujatikizya nguwe.—2 Petro 3:9.

5. Ino mbuti mbomukonzya kubazyiba aabo ibakomba Leza munzila iiluzi?

⁵ Jesu wakaamba kuti tulakonzya kubazyiba aabo ibakomba Leza munzila iiluzi. Tulakonzya kucita oobu kwiinda mukulanga-langa nzyobasyoma alimwi anzyobacita. Wakaamba kuti: “Kwiinda mumicelo yabo muyoobazyiba.” Alimwi wakayungizya kuti: “Cisamu cibotu cili coonse cilazyala micelo mibotu.” (Matayo 7:16, 17) Eeci tacaambi kuti aabo ibakomba Leza balilondokede. Pele babelesi ba Leza balasola ciindi coonse kucita zintu zibotu. Lino tulabona icikonzya kutugwasya kuzyiba baabo ibakomba Leza munzila iiluzi.

6, 7. Ino nkaambo nzi bukombi bwakasimpe ncobuyeeme aa Bbaibbele? Ino cikozyanyo ca Jesu cituyiisya nzi?

⁶ Bukombi bwesu bweelede kuzwa mu Bbaibbele. Bbaibbele lyaamba kuti: “Magwalo oonse akasololelwa a Leza alimwi alagwasya mukuyiisya, mukusinsa, mukululamika zintu, mukulaya cabululami, kutegwa muntu wa Leza ayelele ncobeni, kalibambilide cakumaninina kubeleka mulimo mubotu uuli woonse.” (2 Timoteyo 3:16, 17) Mwaapostolo Paulo wakalembela Banakristo kuti: “Nomwakatambula majwi aa Leza ngomwakamvwa kulindiswe, mwakaazumina ikutali mbuli majwi aabantu, pele mbubonya mbwaabede ncobeni, kaali majwi aa Leza.”  (1 Batesalonika 2:13) Bukombi bwakasimpe buyeeme buyo aa Jwi lya Leza, Bbaibbele. Tabuyeeme aamizeezo yabantu, tunsiyansiya, naa aazintu zimbi zili boobo.

⁷ Zintu zyoonse Jesu nzyaakali kuyiisya zyakayeeme aa Jwi lya Leza. (Amubale Johane 17:17.) Kanji-kanji wakali kuzubulula Magwalo. (Matayo 4:4, 7, 10) Babelesi ba Leza bakasimpe batobela cikozyanyo ca Jesu alimwi zintu zyoonse nzyobayiisya ziyeeme aa Bbaibbele.

8. Ino Jesu wakatuyiisya nzi kujatikizya kukomba Jehova?

⁸ Tweelede kukomba buyo Jehova alikke. Lugwalo lwa Intembauzyo 83:18 lwaamba kuti: “Yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.” Jesu wakali kuyanda kuti bantu bamuzyibe ncobeni Leza wakasimpe, alimwi wakayiisya bantu izina lya Leza. (Amubale Johane 17:6.) Jesu wakaamba kuti: “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.” (Matayo 4:10) Aboobo, mbotuli babelesi ba Leza, tutobela cikozyanyo ca Jesu. Tukomba buyo Jehova alikke, tubelesya zina lyakwe, alimwi tuyiisya bambi izina lya Leza azintu nzyayootucitila.

9, 10. Ino mbuti mbotutondezya luyando kuli umwi amweenzinyina?

⁹ Tweelede kubayanda ncobeni bantu. Jesu wakayiisya basikwiiya bakwe kuti kabayandana. (Amubale Johane 13:35.) Tulacita oobo tacikwe makani ankotuzwa, zilengwa zyesu, kuti naa tulivwubide naa tuli bacete. Luyando ndotujisi akati kesu lweelede kutukamantanya abakwesu alimwi abacizyi. (Bakolose 3:14) Aboobo tatulwani munkondo alimwi akujaya bantu. Bbaibbele lyaamba kuti: “Bana ba Leza abana ba Diabolosi balazyibwa munzila eeyi: Kufwumbwa muntu uutazumanani kucita bululami tazwi kuli Leza pe, ncimwi buyo ayooyo uutayandi munyina.” Liyungizya  kuti: “Tweelede kuyandana; ikutali kuba mbuli Kaini iwakazwa kuli yooyo mubi alimwi iwakajaya munyina.”—1 Johane 3:10-12; 4:20, 21.

¹⁰ Tubelesya ciindi cesu, nguzu, alimwi alubono lwesu kugwasyanya alimwi akukulwaizyanya umwi amweenzinyina. (Bahebrayo 10:24, 25) ‘Tucitila bantu boonse milimo mibotu.’—Bagalatiya 6:10.

11. Ino nkaambo nzi ncotumuzumina Jesu kuti nenzila iitola kuli Leza?

¹¹ Tweelede kumumvwida Jesu nkaambo ngonguwe nzila iitola kuli Leza. Bbaibbele lyaamba kuti: “Kunyina lufwutuko mumuntu umbi uuli woonse, nkaambo kunyina zina limbi munyika ilyapegwa kubantu ndyotweelede kufwutulwa andilyo.” (Milimo 4:12) Mu Cibalo 5 cabbuku eeli, twakaiya kuti Jehova wakatuma Jesu kuzyikwaaba buumi bwakwe kuti cibe cinunuzyo cakununuzya bantu ibamvwida. (Matayo 20:28) Jehova wakasala Jesu kuti ayendelezye nyika kali Mwami. Nkakaambo kaako Bbaibbele litwaambila kuti tweelede kumumvwida Jesu ikuti naa katuyanda kupona mane kukabe kutamani.—Amubale Johane 3:36.

12. Nkaambo nzi tatutoli lubazu mutwaambo twacisi?

¹² Tatweelede kutola lubazu mutwaambo twacisi. Jesu tanaakali kutola lubazu mutwaambo twacisi. Ciindi naakali kubetekwa, wakaambila mweendelezi muna Roma Pilato kuti: “Bwami bwangu tabuli bwanyika eeyi.” (Amubale Johane 18:36.) Mbubonya mbuli Jesu, tulasyomeka ku Bwami bwa Leza bwakujulu, aboobo kufwumbwa nkotukkala, tatutoli lubazu mutwaambo twacisi. Nokuba boobo, Bbaibbele litulailila kumvwida “beendelezi,” nkokuti mfwulumende. (Baroma 13:1) Tulaitobela milawo yamucisi motukkala. Masimpe, ciindi mulawo umwi noukazyanya amilawo ya Leza, tutobela cikozyanyo cabaapostolo  ibakaamba kuti: “Tweelede kumvwida Leza mbwali mweendelezi kutali bantu.”—Milimo 5:29; Marko 12:17.

13. Ncinzi ncotukambauka kujatikizya Bwami bwa Leza?

¹³ Tusyoma kuti Bwami bwa Leza bulikke mbobuyakumana mapenzi aali munyika. Jesu wakaamba kuti “makani mabotu aa Bwami” ayookambaukwa munyika yoonse mboizulwa. (Amubale Matayo 24:14.) Taaku mfwulumende yabantu iikonzya kucita ncobuyootucitila Bwami bwa Leza. (Intembauzyo 146:3) Jesu wakatuyiisya kupailila Bwami bwa Leza naakaamba kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:10) Bbaibbele litwaambila kuti Bwami bwa Leza buyoonyonyoona mfwulumende zyoonse zyabantu akuti “bwalo bulikke buyakwiima nji mane kukabe kutamani.”—Daniele 2:44.

14. Ino musyoma kuti mbaani bakomba Leza munzila iiluzi?

¹⁴ Nomwamana kwiiya twaambo ootu, amulibuzye kuti: ‘Ino mbaani bayiisya kweelana ancolyaamba Bbaibbele? Ino mbaani baambila bambi zina lya Leza? Ino mbaani batondezya luyando lwini-lwini akati kabo alimwi ibasyoma kuti Leza wakatuma Jesu kuzootufwutula? Ino mbaani batatoli lubazu mutwaambo twacisi? Ino mbaani bakambauka kuti Bwami bwa Leza bulikke mbobukonzya kumana mapenzi eesu?’ Taaku bambi, Bakamboni ba Jehova balikke buyo mbabacita boobo.—Isaya 43:10-12.

15. Ncinzi ncotweelede kucita kutegwa Leza abukkomanine bukombi bwesu?

¹⁵ Tacizulide pe kusyoma buyo kuti Leza nkwali. Naaba madaimona alasyoma kuti Leza nkwali, pele taamumvwidi pe. (Jakobo 2:19) Ikuti katuyanda kuti Leza abukkomanine bukombi bwesu, tatweelede kusyoma buyo kuti nkwali pe, pele alimwi tweelede kucita nzyaamba.

16. Nkaambo nzi ncotweelede kuzwa mucikombelo cakubeja?

 ¹⁶ Kutegwa Leza abukkomanine bukombi bwesu, tweelede kuzwa mucikombelo cakubeja. Musinsimi Isaya wakalemba kuti: “Amuzwe mulinguwe, kamusalala lyoonse.” (Isaya 52:11; 2 Bakorinto 6:17) Nkakaambo kaako, tweelede kukaka cintu cili coonse cijatikizya bukombi bwakubeja.

17, 18. Ino “Babuloni Mupati” nguni, alimwi nkaambo nzi ncociyandika kuzwa mulinguwe cakufwambaana?

¹⁷ Ino bukombi bwakubeja ninzi? Ncikombelo cili coonse icituyiisya kukomba Leza munzila iiteendelani a Jwi lyakwe. Bbaibbele lyaamba bukombi bwakubeja boonse kuti ngu “Babuloni Mupati.” (Ciyubunuzyo 17:5) Nkaambo nzi? Nolyakainda Zambangulwe lyakumazuba aa Nowa, njiisyo zinji zyazikombelo zyakubeja zyakatalikila mumunzi wa Babuloni. Njiisyo eezyo zyakubeja zyakamwaika munyika yoonse mboizulwa. Mucikozyanyo, bantu ibakali kukkala mu Babuloni bakali kukomba leza wabutatu. Aalo mazuba aano, zikombelo zinji ziyiisya kuti Leza Mbutatu, pele cakusalazya Bbaibbele liyiisya kuti kuli buyo Leza wakasimpe omwe, Jehova, alimwi akuti Jesu Mwanaakwe. (Johane 17:3) Bantu ibakali kukkala mu Babuloni alimwi bakali kusyoma kuti kuli cibeela cimwi camuntu icizumanana kupona wafwa mubili akuti cibeela eeco cilasubulwa mumulilo wahelo. Aayo taali masimpe pe.—Amubone Bupanduluzi Buyungizyidwe 14, 17, a 18.

¹⁸ Leza wakaambila limwi kuti lino-lino zikombelo zyoonse zyakubeja ziyakunyonyoonwa. (Ciyubunuzyo 18:8) Sena mwakamvwisya kaambo ncociyandika kuzwa cakufwambaana mucikombelo cakubeja? Jehova Leza uyanda kuti mucite oobo nocitanamana ciindi.—Ciyubunuzyo 18:4.

19. Ikuti mwasala kubelekela Jehova, ino walo unoomulanganya buti?

¹⁹ Mwaakusala kuzwa mucikombelo cakubeja akutalika  kubelekela Jehova, beenzinyoko bamwi naa banamukwasyi bamwi tabakonzyi kukumvwisya kusala kwanu alimwi inga batalika kumupenzya. Pele Jehova takamulekelezyi pe. Muyooba cibeela camukwasyi wanyika yoonse wabantu banji kapati ibayandana ncobeni, alimwi muyooba abulangizi bwakupona munyika mpya ya Leza mane kukabe kutamani. (Marko 10:28-30) Ambweni kumbele beenzinyoko bamwi alimwi abanamukwasyi aabo ibamukazya akaambo kakuti mwasala kubelekela Jehova bayoosala kwiiya Bbaibbele abalo.

20. Nkaambo nzi ncociyandika kapati kukomba Leza munzila iiluzi?

²⁰ Lino-lino, Leza uyoobanyonyoona babi boonse alimwi Bwami bwakwe buyakweendelezya nyika yoonse. (2 Petro 3:9, 13) Eelo kaka eeco ciyooba ciindi cibotu! Bantu boonse bayookomba Jehova munzila njayanda kuti katumukomba. Aboobo cilayandika kapati kuti nywebo mubweze ntaamu lino akukomba Leza munzila iiluzi.