1, 2. Ino mbaani bamwi ibakali balongwe ba Jehova?

INO muntu uuli buti ngomunga mwayanda kuti abe mulongwe wanu? Muntu ngomukkomanina, ngomumvwana alimwi ngomweendelana. Muntu uujisi bube bubotu alimwi amoyo ngomuyanda.

² Jehova Leza ulabasala bamwi bantu kuba balongwe bakwe. Mucikozyanyo, Abrahamu wakali umwi wabalongwe ba Jehova. (Isaya 41:8; Jakobo 2:23) Jehova wakali kumukkomanina awalo Davida. Wakaamba kuti Davida wakali ‘mwaalumi weendelana amoyo wakwe.’ (Milimo 13:22) Kuyungizya waawo, musinsimi Daniele wakali “muntu uuyandwa kapati” a Jehova.—Daniele 9:23.

3. Nkaambo nzi Abrahamu, Davida a Daniele ncobakali balongwe ba Jehova?

³ Ino mbuti Abrahamu, Davida, a Daniele mbobakaba balongwe ba Jehova? Jehova wakaambila Abrahamu kuti: “Waswiilila jwi lyangu.” (Matalikilo 22:18) Jehova uba mulongwe wabaabo ibalicesya akumumvwida. Bantu boonse mucisi balakonzya kuba balongwe bakwe. Jehova wakapanduluda cisi cabana Israyeli kuti: “Amuswiilile jwi lyangu, eelyo mebo ndiyooba Leza wanu, alimwi nywebo muyooba bantu bangu.” (Jeremiya 7:23) Aboobo andinywe mweelede kumumvwida Jehova ikuti naa ncobeni muyanda kuba mulongwe wakwe.

4, 5. Ino mbuti Jehova mbwabakwabilila balongwe bakwe?

⁴ Bbaibbele lyaamba kuti Jehova uyandaula nzila ‘zyakutondezya nguzu zyakwe ikugwasya baabo bamusyoma camoyo woonse.’ (2 Makani 16:9) Ku Intembauzyo 32:8, Jehova  usyomezya balongwe bakwe kuti: “Ndiyookupa kuba amaano akukuyiisya nzila njoyelede kutobela. Ndiyookulaya kandikulangide.”

⁵ Sinkondoma umwi singuzu uyanda kutupa kuti tutabi balongwe ba Leza. Pele Jehova uyanda kutukwabilila. (Amubale Intembauzyo 55:22.) Mbotuli balongwe ba Jehova, tulamubelekela camoyo woonse. Tulasyomeka kulinguwe nomuba mubukkale bukatazya. Alimwi tulijisi lusyomo ndomunya ndwaakajisi sintembauzyo. Kujatikizya Jehova wakalemba kuti: “Akaambo kakuti uli kujanza lyangu lyalulyo, tandikazungaanizyigwi pe.” (Intembauzyo 16:8; 63:8) Ino mbuti Saatani mbwasola kutupa kuti tutabi balongwe ba Leza?

6. Ino Saatani wakaamba nzi kujatikizya bantu?

⁶ Mu Cibalo 11, twakaiya kuti Saatani wakakazya Jehova akumubejekezya kuti mubeji alimwi akuti tali kabotu akaambo kakuti tanaakabazumizya ba Adamu a Eva kulisalila cintu ciluzi acitaluzi. Bbuku lyamu Bbaibbele lya Jobu lituyiisya kuti Saatani ulababejekezya abalo bantu ibayanda kuba balongwe ba Leza. Saatani waamba kuti babelekela Leza akaambo buyo kazintu nzyobakonzya kujana kulinguwe, ikutali akaambo kakuti balamuyanda. Kunze lyaboobo, Saatani waamba kuti ulakonzya kuzandula muntu uuli woonse kuzwa kuli Leza. Atubone ncotukonzya kwiiya kuli Jobu alimwi ambwaakamukwabilila Jehova.

7, 8. (a) Ino Jehova wakali kumubona buti Jobu? (b) Ino ncinzi ncaakaamba Saatani kujatikizya Jobu?

⁷ Ino Jobu wakali ni? Wakali mwaalumi mubotu iwakapona myaka iili 3,600 yainda. Jehova wakaamba kuti aciindi eeci kunyina muntu iwakali mbuli Jobu anyika. Jobu wakali kumulemeka kapati Leza, alimwi zintu zibi wakali kuzisulaika. (Jobu 1:8) Inzya, Jobu wakali mulongwe mwini-mwini wa Jehova.

 ⁸ Saatani wakaamba kuti Jobu wakali kubelekela Leza akaambo kabubotu mbwaakali kujana. Saatani wakaambila Jehova kuti: “Sena yebo tonoomuyakila lukwakwa lwakumukwabilila ilumuzingulukide walo abamuŋanda yakwe kubikkilizya azintu zyoonse nzyajisi? Yebo waileleka milimo yamaanza aakwe, alimwi zivwubwa zyakwe zilimwaikide munyika. Pele lino, kotandabika janza lyako unyonyoone zintu zyoonse nzyajisi, ulabona ulakutukila kolangilila.”—Jobu 1:10, 11.

9. Ino ncinzi Jehova ncaakazumizya Saatani kucita?

⁹ Saatani wakabejekezya Jobu kuti wakali kubelekela Jehova akaambo buyo kazintu nzyaakali kujana kulinguwe. Saatani alimwi wakaamba kuti wakali kukonzya kumulesya Jobu kubelekela Jehova. Nokuba kuti Jehova tanaakazizuminizya nzyaakaamba Saatani, wakamuzumizya Saatani kuti amusunke Jobu akubona naa wakali mulongwe wa Jehova akaambo kakuti wakali kumuyanda.

10. Mbuti Saatani mbwaakamulwana Jobu, alimwi ino Jobu wakacita buti?

¹⁰ Cakusaanguna, Saatani wakabba naa kunyonyoona banyama ba Jobu boonse. Mpoonya Saatani wakajaya babelesi ba Jobu banji. Jobu wakasweekelwa zintu zyoonse nzyaakajisi. Kumamanino, Saatani wakajaya bana ba Jobu ibali kkumi amvwula mpati yaguwo. Pele Jobu wakazumanana kusyomeka kuli Jehova. “Muzintu zyoonse eezyi zyakamucitikila, Jobu tanaakabisya naa kupa Leza mulandu uuli woonse.”—Jobu 1:12-19, 22.

11. (a) Ino ncinzi cimbi Saatani ncaakacita kuli Jobu? (b) Ino Jobu wakacita buti?

¹¹ Saatani tanaakaleka pe. Wakakazya Leza kwiinda mukwaamba kuti: “Kotandabika janza lyako ujate zifwuwa anyama yamubili wakwe, ulabona ulakutukila kolangilila.” Aboobo Saatani wakapa kuti Jobu aciswe bulwazi bucisa kapati. (Jobu 2:5, 7) Nokuba aciindi eeci, Jobu wakasyomeka  kuli Jehova. Wakaamba kuti: “Kusikila ndikafwe, tandikaleki kusyomeka pe!”—Jobu 27:5.

12. Ino mbuti Jobu mbwaakatondezya kuti Saatani mubeji?

¹² Jobu kunyina naakazyi cintu cili coonse kujatikizya kubejekezya kwa Saatani naa ncaakali kupengela. Wakali kuyeeya kuti Jehova nguwakapa kuti apenge. (Jobu 6:4; 16:11-14) Nokuba boobo, Jobu wakazumanana kusyomeka kuli Jehova. Lino kaambo kakasalala. Jobu tanaakali muntu wakali kubelekela Leza akaambo kazintu nzyaakali kujana. Wakali mulongwe wa Leza akaambo kakuti wakali kumuyanda. Twaambo ntwaakaamba Saatani toonse twakali twakubeja!

13. Ino ncinzi cakacitika akaambo kakusyomeka kwa Jobu?

¹³ Nokuba kuti Jobu tanaakazyi cakali kucitika kujulu, wakasyomeka kuli Leza alimwi wakatondezya kuti Saatani wakali mubi. Jehova wakamupa bulumbu Jobu akaambo kakuti wakali mulongwe wakwe uusyomeka.—Jobu 42:12-17.

14, 15. Ino Saatani ubabejekezya nzi bantu boonse?

¹⁴ Mulakonzya kwiiya ziiyo ziyandika kapati kuzintu eezyo izyakamucitikila Jobu. Mazuba aano, Saatani ulatubejekezya kuti tubelekela Jehova akaambo kazintu nzyotukonzya kujana kulinguwe. Kuli Jobu 2:4, Saatani wakaamba kuti: “Muntu uyoopa zintu zyoonse nzyajisi kutegwa avwune buumi bwakwe.” Aboobo Saatani ubejekezya bantu boonse ikutali buyo Jobu alikke kuti babelekela Leza akaambo buyo kazintu nzyobakonzya kujana kulinguwe. Kakwiindide myaanda-myaanda yamyaka Jobu kafwide kale, Saatani wakacili kutukila Jehova alimwi akubejekezya babelesi bakwe. Mucikozyanyo, ku Tusimpi 27:11, tubala kuti: “Kosongwaala mwanaangu, ukkomanisye moyo wangu, kutegwa ndikonzye kumuvwiila ooyo uundisampaula [naa, uunditukila].”

 ¹⁵ Mulakonzya kusala kumumvwida Jehova akuba mulongwe wakwe uusyomeka ikutondezya kuti Saatani mubeji. Nokuba kuti inga mwayandika kucinca kapati mubuumi bwanu kutegwa mube balongwe ba Leza, ikusala kucita boobo ncecintu ciinda kubota ncomukonzya kucita! Kusala kucita boobu makani mapati. Saatani waamba kuti nywebo tamukonzyi kusyomeka kuli Leza ciindi nomujisi mapenzi. Usoleka kutucenga kutegwa tutasyomeki kuli Leza. Munzila nzi?

16. (a) Ino ninzila nzi Saatani nzyabelesya kusola kulesya bantu kubelekela Jehova? (b) Mbuti Diabolosi mbwakonzya kusola kumulesya kubelekela Jehova nywebo kumugama?

¹⁶ Saatani ubelesya nzila ziindene-indene zinji kusola kutulesya kuba balongwe ba Leza. Ulatulwana “mbuli syuumbwa wabutambo uuvwuluma, uyandaula muntu ngwatiimene buumbulu.” (1 Petro 5:8) Tamweelede kugambwa eelyo beenzinyoko, banamukwasyi, naa bantu bambi buyo nobasola kumukasya kwiiya Bbaibbele akucita zintu ziluzi. Mulakonzya kulimvwa mbuli kuti mulwanwa buya. * (Johane 15:19, 20) Alimwi Saatani ulalicengeezya “kuba mbuli mungelo wamumuni.” Aboobo ulakonzya kusola kutucenga kuti tutamumvwidi Jehova. (2 Bakorinto 11:14) Nzila aimbi Saatani njabelesya mukusola kutulesya kubelekela Jehova njakutupa kulimvwa kuti tuli babi kapati cakuti tatweeleli kumubelekela Leza.—Tusimpi 24:10.

17. Ino nkaambo nzi ncotumumvwida Jehova?

¹⁷ Ciindi notumumvwida Jehova, tutondezya kuti Saatani mubeji. Ino ncinzi cikonzya kutugwasya kumvwida Leza? Bbaibbele lyaamba kuti: “Mweelede kuyanda Jehova  Leza wanu amoyo wanu woonse, abuumi bwanu boonse alimwi anguzu zyanu zyoonse.” (Deuteronomo 6:5) Tulamumvwida Jehova nkaambo tulamuyanda. Eelyo cilongwe cesu a Jehova nociyuma akaambo kakuti tulamuyanda, tulacita kufwumbwa ncatwaambila kucita. Mwaapostolo Johane wakalemba kuti: “Kuyanda Leza caamba kuti katubamba milawo yakwe; alimwi buya milawo yakwe tiiminyi.”—1 Johane 5:3.

18, 19. (a) Ino nzintu nzi zimwi Jehova nzyaamba kuti nzibi? (b) Ino tuzyi buti kuti Jehova tatwaambili kucita cintu ncotutakonzyi kucita?

¹⁸ Pele ino nzintu nzi zimwi Jehova nzyatwaambila kuti tazili kabotu? Kuli zikozyanyo zyazintu eezyi zimwi mukabbokesi kakuti “ Amuzisulaike Zintu Nzyasulide Jehova.” Kumatalikilo inga mwayeeya kuti zintu eezyi zimwi zili buyo kabotu. Pele ciindi nomubala tupango twamu Bbaibbele tubikkidwe alimwi akukkala ansi kuyeeya ncotwaamba, muyoobona mbocigwasya kutobela milawo ya Jehova.  Kunze lyaboobo, mulakonzya kulimvwa kuti mweelede kucinca mumbazu zimwi. Nokuba kuti ziindi zimwi eeci cilakonzya kumukatazya, ikuti mwacinca mumbazu zyoonse momweelede kucinca, muyooba aluumuno alimwi alukkomano iluboola akaambo kakuba mulongwe wa Leza uusyomeka. (Isaya 48:17, 18) Ino tuzyi buti kuti cilakonzyeka kucinca munzila eezyi?

¹⁹ Jehova tatwaambili kucita cintu cili coonse ncotutakonzyi kucita. (Deuteronomo 30:11-14) Mbwali mulongwe mwini-mwini, ulituzyi kabotu kwiinda mbotulizyi tobeni. Ulibuzyi bubotu bwesu alimwi akulezya kwesu. (Intembauzyo 103:14) Mwaapostolo Paulo utukulwaizya kuti: “Leza ulasyomeka, aboobo takamulekeli kuti musunkwe kwiinda nguzu zyanu pe, pele mwanoosunkwa uyoomupa anzila yamatijilo kutegwa mukonzye kuliyumya musunko eelyo.” (1 Bakorinto 10:13) Tulijisi lusyomo lwakuti lyoonse Jehova unootupa nguzu zyakucita cintu ciluzi. Uyoomupa “nguzu zigambya iziinda zyabantu” kutegwa zimugwasye  kuliyumya mubukkale bukatazya. (2 Bakorinto 4:7) Naakamana kugwasyigwa a Jehova muziindi zili boobu, Paulo wakali kukonzya kwaamba kuti: “Muzintu zyoonse ndilijisi nguzu kwiinda muli yooyo uundipa nguzu.”—Bafilipi 4:13.

20. Ino mbube nzi mbomweelede kwiiya, alimwi nkaambo nzi?

²⁰ Ikuti katuyanda kuba balongwe ba Jehova, tatweelede kucileka buyo kucita zintu Jehova nzyaamba kuti nzibi. (Baroma 12:9) Balongwe ba Leza bayanda zintu nzyayanda walo. Balipanduludwe mbobabede ku Intembauzyo 15:1-5. (Amubale.) Balongwe ba Jehova baiya bube bwakwe akutondezya “luyando, lukkomano, luumuno, kukkazika moyo, luzyalo, bubotu, lusyomo, kubomba moyo, kulilesya.”—Bagalatiya 5:22, 23.

21. Mbuti mbomukonzya kwiiya kutondezya bube mbwayanda Leza?

²¹ Mbuti mbomukonzya kwiiya kutondezya bube oobu ibubotu kapati? Mweelede kwiiya nzyayanda Jehova kwiinda mukubala alimwi akwiiya Bbaibbele ciindi coonse. (Isaya 30:20, 21) Nomucita boobu, munooyumya cilongwe canu a Jehova, alimwi eeci ciyoomupa kuyandisya kumumvwida.

22. Ino ncinzi ciyoocitika akaambo kakuti mumvwida Jehova?

²² Ikucinca nkomunga mwayandika kucita mubuumi bwanu kulakonzya kukozyanisyigwa akusamununa zisani zyakaindi akusama zipya. Bbaibbele lyaamba kuti mweelede ‘kusamununa buntu bwanu bwakaindi’ akulisamika “buntu bupya.” (Bakolose 3:9, 10) Nokuba kuti tacili cuuba-uba, ciindi notucinca alimwi akumumvwida Jehova, walo utusyomezya kutupa “bulumbu bupati.” (Intembauzyo 19:11) Inzya, amusale kumvwida Jehova akutondezya kuti Saatani mubeji. Amubelekele Jehova, ikutali akaambo kabulumbu bumwi mbomulangila kumbele, pele akaambo kaluyando lwini-lwini. Mwacita boobu, munooli mulongwe mwini-mwini wa Leza!