Mubwini Bbaibbele lyoonse mbolibede tulakonzya kulibona kuti mulumbe uuzwa kuli Leza. Taateesu wakujulu watupa Bbaibbele kutegwa tuyiisyigwe. Pele amulange-lange milumbe yobilo iilibedelede iyakaambwa myaka yiinda ku 2,000 musyule oomu. Milumbe eeyo yakaambwa amungelo wazina lyakuti Gabriyeli, “ooyo wiima kubusyu bwa Leza.” (Luka 1:19) Ino bukkale bwakali buti eelyo mungelo ooyu naakaamba milumbe eeyo iiyandika kapati?

Kulangilwa kuti muumwaka wa 3 B.C.E. Ino nkuukuli Gabriyeli nkwaatola mulumbe wakusaanguna? Mucooko catulundulundu ca Judaya, ambweni munsi-munsi amunzi wa Jerusalemu, kuli mupaizi wa Jehova uujisi zina lyakuti Zekariya. Walo alimwi amukaintu wakwe, Elizabeta, balicembeede alimwi tabajisi bana pe. Lino mbulizyi bwa Zekariya kuti abeleke milimo yakwe yabupaizi kutempele lya Leza ku Jerusalemu. Zekariya kali kutempele, Gabriyeli walibonya cakutayeeyelwa munsi-munsi aacipaililo catununkilizyo.

Cakutadooneka, eeci camuyoosya Zekariya. Pele mungelo wamukkazika moyo Zekariya, ulaamba: “Utayoowi Zekariya, nkaambo kulomba kwako kwamvwugwa, aboobo mukaintu wako, Elizabeta, uyookuzyalila mwana musankwa, eelyo ukamuulike zina lyakuti Johane.” Gabriyeli wayungizya kuti Johane “unooli mupati mumeso aa Jehova” alimwi ‘uyoobambila Jehova bantu balibambilide.’—Luka 1:13-17.

Kuli Zekariya eeci cilibonya mbuli kuti tacikonzyeki pe. Nkaambo nzi? Nkaambo walo alimwi a Elizabeta balicembeede. Aboobo Gabriyeli wamwaambila kuti: “Ulaba syaataambi alimwi tokoocikonzya kwaambaula kusikila buzuba zintu eezyi noziyoocitika nkaambo tonoosyoma majwi aangu.”—Luka 1:20.

Aciindi eeci bantu ibali aanze batalika kulibilika akaambo kakuti Zekariya watola ciindi cilamfwu kali mukati. Mpoonya wazwa anze, pele takonzyi kwaambaula pe. Lino Zekariya ukonzya buyo kutambaika maanza. Cilisalede kuti wabona cintu cigambya naali mutempele.

Zekariya naamanizya mulimo wakwe kutempele, wapiluka kuŋanda yakwe. Kwiinde buyo ciindi cisyoonto, Elizabeta wamita! Kwamyezi yosanwe Elizabeta ukkede aŋanda katasangani abantu, ciindi nalindila kuzyalwa kwamwanaakwe.

Mpoonya Gabriyeli walibonya ciindi cabili. Ino walibonya kuli ni? Kumusimbi uutakwetwe wazina lyakuti Mariya, ooyo uukkala kulubazu lwakunyika kucooko citegwa Galilaya, mumunzi wa Nazareta. Ino mungelo wamwaambila nzi? Waamba kuti: “Leza wakukkomanina.” Gabriyeli wazumanana kwaambila Mariya kuti: “Bona! Uyoomita akuzyala mwana musankwa, ngoyakuulika zina lyakuti Jesu.” Mpoonya Gabriyeli wayungizya kuti: “Ooyu unooli mupati alimwi uyootegwa Mwana wa Mupatikampatila, . . . eelyo unooli Mwami uuyoolela muŋanda ya Jakobo kukabe kutamani, alimwi Bwami bwakwe tabukamani.”—Luka 1:30-33.

Masimpe mulakonzya kuyeeyela mbwalimvwide kuba acoolwe Gabriyeli ikwaamba milumbe eeyi yobilo. Notuzumanana kubala ziyungizyidwe kujatikizya Johane alimwi a Jesu, tulabona kaambo milumbe eeyi iizwa kujulu ncoiyandika kapati.