Muciindi cakujokela ku Nazareta, Josefa a Mariya bakkala nkukonya ku Betelehemu. Jesu naakkwanya mazuba aali lusele, bamutola kuyakupalulwa mbubonya mbowaamba Mulawo wa Leza ngwaakapa bana Israyeli. (Levitiko 12:2, 3) Alimwi ncilengwa buya kumuulika zina mwana musankwa mubuzuba oobo. Aboobo baulika mwanaabo kuti ngu Jesu, mbubonya mbwaakabalailide mungelo Gabriyeli.

Lino kwainda mazuba aainda kumwezi omwe, alimwi Jesu wakkwanya mazuba aali 40 aakuzyalwa. Ino bazyali bakwe bamutola kuli lino? Bamutola kutempele ku Jerusalemu, ikulampa buyo makkilomita masyoonto kuzwa nkobakkala. Kweelana a Mulawo wa Musa, kwainda mazuba aali 40 aakuzyalwa kwamwana musankwa, banyina beelede kupa cituuzyo cakulisalazya kutempele.​—Levitiko 12:4-7.

Oobo mbwaacita Mariya. Waleta tuyuni tobilo itucili tuniini twakutuula. Eeci citupa kuzyiba bukkale bwa Josefa a Mariya caboola kumakani aabuvwubi. Kweelana a Mulawo wa Musa, mwanaambelele mugutu alimwi akayuni nzizyeelede kutuulwa. Pele kuti banyina kabatakonzyi kutuula mugutu, inziba zyobilo naa nkwilimba zyobilo zilakonzya kubelesyegwa. Oobu mbobukkale bwa Mariya, aboobo eezyi nzyenzizyo nzyaakonzya kutuula.

Mutempele, munene umwi waboola kuli Josefa a Mariya. Izina lyakwe ngu Simeoni. Leza wakamuyubunuda kuti katanafwa uyakumubona Kristo naa Mesiya iwakasyomezyegwa a Jehova. Buzuba oobu muuya uusalala wasololela Simeoni kutempele, ooko nkwaajana Josefa a Mariya kabali amwanaabo muvwanda. Mpoonya Simeoni wamubweza mwana mumaanza.

Simeoni kamujisi Jesu mumaanza, walumba Leza ategwa: “O Mwami Singuzuzyoonse, komuleka lino muzike wako afwe muluumuno kweelana amajwi aako, nkaambo meso aangu alibonena nzila yako yalufwutuko njookabamba kale iiboneka kubantu boonse, mumuni uumunika mumudima uuvwumbide bamasi alimwi uumunikila bantu bako ba Israyeli.”—Luka 2:29-32.

Josefa a Mariya bagambwa kumvwa makani aaya. Mpoonya Simeoni wabalongezya akwaambila Mariya kuti mwanaakwe “usalidwe kupa kuti bantu banji mu Israyeli bakawe akubuka” alimwi akuti uyakuba mubuumba, mbuli kuti wayaswa panga libosya.​—Luka 2:34.

Kuli muntu aumbi uuliko ibuzuba oobu. Ooyu ngu Ana, imusinsimi mukaintu uulaamyaka yakuzyalwa iili 84. Mubwini, talovwi kutempele. Aciindi nciconya eeco waboola kuli Josefa, Mariya alimwi a Jesu uucili muvwanda. Mpoonya Ana watalika kulumba Leza akwaamba kujatikizya Jesu kuli boonse bamvwide.

Amuyeeye buyo Josefa a Mariya mbobakkomana akaambo kazintu eezyi izyacitika kutempele! Masimpe, zyoonse eezyi zibatondezya kuti mwana ooyu ngonguwe Uusyomezyedwe a Leza.