Musyule lyabwiinga ku Kana, Jesu waunka ku Kapernauma. Banyina Jesu alimwi abanabokwabo bamwi​—Jakobo, Josefa, Simoni alimwi a Juda—baunka anguwe.

Pele ino Jesu waunkila nzi ku Kapernauma? Munzi ooyu ukkede abusena buli kabotu kwiinda munzi wa Nazareta naa wa Kana alimwi kulibonya kuti mupati kwiinda njiyo. Alimwi basikwiiya ba Jesu bapya banji bakkala mumunzi wa Kapernauma naa munsi-munsi anguwo. Aboobo Jesu ulakonzya kubayiisya mulimo kabali kwabo.

Ciindi ncakkede ku Kapernauma, Jesu alimwi wacita milimo mibotu. Aboobo bantu banji bamumunzi ooyu alimwi amumasena aazingulukide bamvwa kujatikizya zintu Jesu nzyacita mumunzi ooyu. Pele Jesu alimwi abeenzinyina, balo bali mba Juda ibalyaabide, ino-ino bayandika kuunka ku Jerusalemu kuti bakajanike ku Pobwe Lyakwiindilila lyamu 30 C.E.

Kabacili kutempele ku Jerusalemu, basikwiiya ba Jesu babona cintu cigambya kapati ncobatanabwene kujatikizya Jesu.

Kweelana a Mulawo wa Leza, bana Israyeli beelede kupa zipaizyo zyabanyama kutempele, alimwi bantu ibaboola kupobwe bayandika zyakulya ciindi nobali kooko. Aboobo Mulawo ulabazumizya aabo ibaboola ku Jerusalemu kuzwa kumasena aakulamfwu kuti baletelezye mali aakubelesya kuula “ŋombe, mbelele, mpongo,” alimwi azintu zimbi zyakubelesya ciindi nobali mumunzi ooyu. (Deuteronomo 14:24-26) Aboobo, basimakwebo mu Jerusalemu balasambala banyama naa bayuni mulubuwa lwini lupati lwatempele. Alimwi basimakwebo bamwi babbida bantu kwiinda mukudulisya nzyobasambala.

Kanyemede, Jesu watila makkobili aabasikucinca mali, watingamuna matebulu aabo, akubatandila anze. Mpoonya Jesu waamba kuti: “Amuzigusye omuno zintu eezyi! Amuleke kucita ŋanda ya Taata kuba ŋanda yamakwebo!”—Johane 2:16.

Basikwiiya ba Jesu nobabona zintu eezyi, bayeeya businsimi bujatikizya Mwana wa Leza bwakuti: “Busungu bwakuŋanda yako buyoondilya cakumaninina.” Pele ba Juda babuzya kuti: “Ncitondezyo nzi ncotiitupe citondezya kuti ulijisi nguzu zyakucita zintu eezyi?” Jesu waingula kuti: “Amulimwaye tempele eeli, eelyo mumazuba otatwe ndiyooliimika.”—Johane 2:17-19; Intembauzyo 69:9.

Ba Juda babona mbuli kuti Jesu waamba tempele lini buya ilili mu Jerusalemu, aboobo babuzya kuti: “Tempele eeli lyakatola myaka iili 46 kuyakwa, ino yebo inga waliimika buti mumazuba otatwe?” (Johane 2:20) Pele, tempele ndyaamba Jesu mubili wakwe. Nokwakainda myaka yotatwe, basikwiiya bakwe bakaayeeya majwi aaya ciindi naakabusyigwa kubafwu.