Nokwainda mazuba aali 40 kali munkanda alimwi katanajokela ku Galilaya, Jesu wajokela kuli Johane iwakamubbapatizya. Jesu naasika afwaafwi, Johane wamutondeka akwaambila baabo baliko kuti: “Amubone, Mwanaambelele wa Leza ooyo uugusya cibi canyika! Ooyu ngonguwe ngundakaamba kuti: ‘Musyule lyangu kuboola muntu waunka kumbele lyangu, nkaambo wakaliko mebo kanditanaba.’” (Johane 1:29, 30) Nokuba kuti Johane mupati asyoonto kuli Jesu, ulizyi kuti Jesu wakaliko kale kujulu kali cilenge camuuya walo katanazyalwa.

Nsondo zisyoonto buyo zyainda, ciindi Jesu naakaboola kuti azyikubbapatizyigwe, kulibonya kuti Johane tanaakazyi kabotu kuti Jesu nguwakali kuyooba Mesiya. Johane wazumina ategwa: “Andime tiindakamuzyi pe, pele kaambo nkindakaboolela kandibbapatizya mumaanzi nkakuti ayubununwe kuba Israyeli.”​—Johane 1:31.

Johane wazumanana kupanduluda baswiilizi bakwe icakacitika naakali kubbapatizya Jesu ategwa: “Ndakabona muuya kuuseluka mbuli nziba kuzwa kujulu, alimwi wakakkala alinguwe. Andime tiindakamuzyi, pele ngoonya Ooyo iwakandituma kuti kandibbapatizya mumaanzi wakandaambila kuti: ‘Ooyo ngoyoobona kuti muuya waseluka akukkala alinguwe, ooyu ngonguwe uubbapatizya mumuuya uusalala.’ Alimwi ndakalibonena, eelyo ndakapa bumboni bwakuti ooyu Mwana wa Leza.”​—Johane 1:32-34.

Buzuba butobela Johane ulaantoomwe abasikwiiya bakwe bobilo eelyo Jesu naaboola kulimbabo alimwi. Johane wati: “Amubone, Mwanaambelele wa Leza!” (Johane 1:36) Nobamvwa boobo aaba basikwiiya bobilo ba Johane Mubbapatizi bamuccilila Jesu. Umwi wabaaba bobilo ngu Andreya. Kuboneka kuti ooyu umwi ngonguwe ngomunya wakalemba makani aaya, ooyo alimwi iwiitwa kuti Johane. Alimwi kuboneka kuti Johane ooyu munyina Jesu, mbwaanga mwana wa Salome. Kulibonya kuti Salome mwanookwabo Mariya, alimwi mulumaakwe ngu Zebedayo.

Naacebuka akubona Andreya a Johane kabamuccilila, Jesu wababuzya kuti: “Ino muyandaula nzi?”

Bamubuzya kuti: “Rabbi, . . . ino ukkala kuli?”

Jesu waingula kuti: “Kamuboola mubone.”​—Johane 1:37-39.

Lino ciindi citandila kuma 16:00, eelyo Andreya a Johane bakkala a Jesu buzuba boonse oobo. Andreya wakkomana kapati cakuti aciindi cimwi wajana mwanookwabo Simoni, ooyo alimwi iwiitwa kuti Petro, akumwaambila kuti: “Twamujana Mesiya.” (Johane 1:41) Mpoonya Andreya watola Petro kuli Jesu. Zintu izyacitika kumbele zitondezya kuti awalo Johane wajana mwanookwabo Jakobo akumuleta kuli Jesu; pele Johane tanaakaabikkilizya makani aaya aakuti mbwaakacita oobo naakalemba makani aajatikizya zintu eezyi.

Buzuba butobela, Jesu wajana Filipo waku Betesaida. Ooyu munzi uli munsi-munsi aankomwe iili kunyika kwa Lwizi  lwa Galilaya, alimwi nkokumunzi kuzwa Andreya a Petro. Jesu watamba Filipo ategwa: “Koba sikunditobela.”​—Johane 1:43.

Mpoonya Filipo wajana Natanayeli, ooyo alimwi uutegwa Bartolomayo akwaamba kuti: “Twamujana ooyo ngwaakalemba Musa mu Mulawo uulembedwe amu Basinsimi: Jesu waku Nazareta, mwana wa Josefa.” Natanayeli wadooneka, eelyo waambila Filipo kuti: “Sena kuli cibotu cinga cazwa mu Nazareta?”

Filipo wamukulwaizya kuti: “Koboola ubone.” Jesu, wamubona Natanayeli kaboola, eelyo waamba kuti: “Amubone, muna Israyeli ncobeni uunyina lweeno.”

Natanayeli wabuzya kuti: “Ino wakandizyibila kuli?”

Jesu waingula kuti: “Katanakwiita Filipo, nowacili munsi lyamukuyu, ndalikubwene.”

Amvwe boobo Natanayeli wagambwa kapati akwaamba kuti: “Rabbi, ncobeni uli Mwana wa Leza, uli Mwami wa Israyeli.”

Jesu wabuzya kuti: “Sena wasyoma nkaambo ndakwaambila kuti ndalikubwene munsi lyamukuyu?” Kumane wati: “Uyoobona zintu zipati kwiinda zyeezyi.” Mpoonya Jesu wasyomezya kuti: “Ncobeni nobaalumi nywebo ndimwaambila masimpe kuti, muyoobona julu kalijalukide alimwi abangelo ba Leza kabatanta kuya nkuko akuseluka kuboola ku Mwanaamuntu.”​—Johane 1:45-51.

Mbokwaindila buyo kaindi kasyoonto kuzwa waawa, Jesu antoomwe abasikwiiya bakwe ibapya, bazwa mu Kkuti lya Jordano akuunka ku Galilaya.