Jesu naamana kuswaangana a Marta alimwi a Mariya munsi-munsi amunzi wa Betaniya, baunka kucuumbwe ca Lazaro. Cuumbwe eeci nimpangala iisinkidwe bbwe kumulyango. Jesu wabalailila kuti: “Amuligusye bbwe.” Marta uboneka kutaazuminizya makani aaya akaambo kakutazyiba ncayanda kucita Jesu. Waamba kuti: “O Mwami, lino weelede kuti ulanunka nkaambo kwainda mazuba one.” Pele Jesu wamwaambila kuti: “Sena tiindakwaambila kuti, ikuti naa wasyoma ulabona bulemu bwa Leza?”—Johane 11:39, 40.

Aboobo bbwe lyagusyigwa. Mpoonya Jesu walanga kujulu akupaila kuti: “Taata, ndakulumba nkaambo wandimvwa. Masimpe, ndalizyi kuti lyoonse ulandimvwa; pele akaambo kankamu eeyi iindizingulukide ndaamba boobu, ikutegwa basyome  kuti wakandituma.” Kwiinda mukupaila caantangalala, Jesu wapa kuti bantu balangilila bazyibe kuti ncayanda kucita ulacicita munguzu zya Leza. Kumane Jesu woompolola ajwi pati kuti: “Lazaro, kozwa oomo!” Mpoonya Lazaro wazwa, kazambailidwe zisani kumaulu akumaanza alimwi kumeso kavwumbidwe cisani. Jesu waamba kuti: “Amumuzambulule mumuleke ayende.”—Johane 11:41-44.

Ba Juda banji aabo ibaboola kuzyikuumbulizya Mariya a Marta baabona maleele aaya alimwi bamusyoma Jesu. Pele bamwi baunka kuyakwaambila ba Farisi ncaacita Jesu. Ba Farisi abasilutwe babapaizi baba amuswaangano wa Nkuta Mpati Yaba Juda. Nkuta eeyi ibikkilizya mupaizi mupati, Kayafa. Bamwi akati kabo balibilika, kabati: “Ino tulacita buti, nkaambo muntu ooyu ucita zitondezyo zinji? Ikuti tumuleke buyo, bantu boonse balamusyoma eelyo ba Roma balaboola akubweza busena bwesu acisi cesu.” (Johane 11:47, 48) Nokuba kuti balimvwida bumboni bwabantu ibalibonena ameso bwakuti Jesu “ucita zitondezyo zinji,” baalumi aaba tabakkomene pe azintu Leza nzyacita kwiinda mulinguwe. Cipati ncibayanda ncuuno alimwi anguzu nzyobajisi.

Makani aakuti Lazaro wabusyigwa kuzwa kubafwu abazula ba Saduki, aabo ibatasyomi mububuke. Lino Kayafa, umwi waba Saduki, waamba kuti: “Taaku ncomuzyi pe, alimwi tamubwene kuti ndinywe ngocigwasya ikuti muntu omwe afwide bantu muciindi cakuti cisi coonse cinyonyoonwe.”—Johane 11:49, 50; Milimo 5:17; 23:8.

Akaambo kacuuno cisetekene ncajisi Kayafa, Leza wamupa kwaamba boobu—tanaacita oobu “mukuyanda kwakwe mwini pe.” Kayafa upandulula kuti Jesu weelede kujaigwa kutegwa atazumanani kuubaula basololi babukombi bwaba Juda alimwi akumana nguzu nzyobajisi zyakweendelezya bantu. Nokuba boobo, businsimi bwa Kayafa butondezya kuti kwiinda mulufwu lwakwe, Jesu uyoopa cinunuzyo, ikutali buyo caba Juda, pele ‘cabana boonse ba Leza ibakamwaikide.’—Johane 11:51, 52.

Kayafa wazwidilila mukuyunga Nkuta Mpati Yaba Juda kuti italike kukanza kumujaya Jesu. Sena Nikodemo, umwi wabamu Nkuta Mpati Yaba Juda alimwi imweenzinyina Jesu ulamusyamwida makanze aaya? Kufwumbwa naa wamusyamwida naa pe, Jesu wazwa mubusena buli munsi-munsi a Jerusalemu, aboobo eeci capa kuti atajaigwi kacitanasika ciindi ncabikkide Leza.