Nokuba kuti Jesu uunka ku Jerusalemu, kuboneka kuti ucili kuŋanda ya Zakeyo abasikwiiya bakwe. Basikwiiya bayeeya kuti “Bwami bwa Leza” lino-lino bulatalika kulela kabuli mumaanza aa Mwami Jesu. (Luka 19:11) Makani aaya tiibaamvwisya mbubonya mbobatamvwisyi kuti Jesu weelede kufwa. Aboobo, wabaambila cikozyanyo kutegwa abagwasye kubona kuti Bwami oobu bucili kulamfwu.

Waamba kuti: “Umwi muntu wamumukwasyi wamwami wakaunka kucisi cili kulamfwu kuti akapegwe bwami mpoonya akupiluka.” (Luka 19:12) Lweendo oolu lutola ciindi. Cakutadooneka Jesu ‘ngomuntu wamumukwasyi wamwami’ ooyo wuunka “kucisi cili kulamfwu,” nkokuti kujulu, ooko Bausyi nkobayakumupa nguzu zyakweendelezya kali Mwami.

Mucikozyanyo eeci, katanaunka ooyo “muntu wamumukwasyi wamwami,” waita bazike bali kkumi akupa umwi aumwi wabo maina yomwe yansiliva, kumane wabaambila kuti: “Amucite makwebo kusikila ndikaboole.” (Luka 19:13) Mubwini mamaina aansiliva mali manji kapati. Maina yomwe ileelene amali ngavwola mubelesi uubelekela mulimi kwamyezi yotatwe.

Kweelede kuti basikwiiya babona kuti balo bali mbuli bazike bali kkumi baambwa mucikozyanyo, nkaambo musyule oomu Jesu wakabakozyanisya kuli basikutebula. (Matayo 9:35-38) Masimpe kuti Jesu tanaabatuma kuyootebula maila eni pe. Pele butebuzi bujatikizya basikwiiya bambi ibakonzya kuba mu Bwami bwa Leza. Basikwiiya babelesya lubono luli loonse ndobajisi kugwasya bantu banji kuba basikukona Bwami.

Ino ncinzi acimbi Jesu ncaayubununa mucikozyanyo eeci? Waamba kuti bantu bamucisi “tiibakali kumuyanda [muntu wamumukwasyi wamwami], eelyo bakatuma baiminizi kumutobela kuyakwaamba kuti, ‘Tatumuyandi muntu ooyu kuti abe mwami wesu.’” (Luka 19:14) Basikwiiya balizyi kuti ba Juda tabamuyandi Jesu—bamwi mane bayanda kumujaya. Ciindi Jesu naafwa akuunka kujulu, ibunji bwaba Juda batondezya mbobamubona kwiinda mukupenzya basikwiiya bakwe. Basikukazya aaba bacitondezya antangalala kuti tabayandi kuti Jesu abe Mwami.—Johane 19:15, 16; Milimo 4:13-18; 5:40.

Pele ino mbuti kujatikizya bazike aabo bali kkumi, ino baabelesya buti mamaina aabo kusikila kuciindi eeco “muntu wamumukwasyi wamwami” naapegwa “bwami” mpoonya akupiluka? Jesu waamba kuti: “Naakapiluka kapedwe nguzu zyakweendelezya, wakaita bazike bakwe aabo mbaakapede mali, kutegwa azyibe mpindu njobakajana mumakwebo aabo. Aboobo wakusaanguna wakaboola akwaamba kuti, ‘Mwami, imaina yako yakazyala mamaina aali kkumi.’ Wakamwaambila kuti, ‘Wakacita kabotu, omuzike mubotu! Akaambo kakuti wasyomeka mumakani maniini, ulaba mweendelezi waminzi iili kkumi.’ Lino wabili wakaboola akwaamba kuti, ‘Imaina yako O Mwami, yakazyala mamaina osanwe.’ Ooyu awalo wakamwaambila kuti, ‘Ayebo koba mweendelezi waminzi yosanwe.’”—Luka 19:15-19.

Basikwiiya balakonzya kuba alusyomo lwakuti ikuti baba mbuli bazike bali fwuka ibakabelesya lubono lwabo camoyo woonse mukuyiisya bantu banji kuba basikwiiya, Jesu uyoobakkomanina. Alimwi balakonzya kusyoma kuti uyoobapa bulumbu akaambo kabunkutwe bwabo. Masimpe kuti basikwiiya ba Jesu boonse tabeelene caboola kubukkale, zyoolwe naa luzyibo ndobajisi. Nokuba boobo balakonzya kubona kuti Jesu, ooyo uupegwa “nguzu zyakweendelezya,” uyakubalumba akubaleleka akaambo kakusyomeka kwabo mumulimo wakuyiisya bantu kuba basikwiiya.—Matayo 28:19, 20.

Pele amubone kwiindana ooku ciindi Jesu namanizya cikozyanyo cakwe: “Pele umbi [muzike] wakaboola akwaamba kuti, ‘O Mwami, njeeyi imaina yako njindakasisa kiivwungaidwe mukasani. Ulizyi, ndakakuyoowa nkaambo uli muntu mukali; ulabweza ncootakabikka alimwi ulatebula ncootakasyanga.’ Wakamwaambila kuti, ‘Kumajwi aako ndilakupa  mulandu, omuzike mubi. Tee kayi wakalizyi kuti ndili muntu mukali, uubweza ncondatakabikka akutebula ncondatakasyanga? Aboobo ino nkaambo nzi ncootakaayobozya mali aangu kuli basikuyobola? Mpoonya akupiluka, nindaabweza ampindu.’ Mpoonya wakaambila baabo bakaimvwi munsi-munsi kuti, ‘Amumunyange imaina akwiipa ooyo uujisi mamaina aali kkumi.’”—Luka 19:20-24.

Akaambo kakutabelekela kuti avwuzye lubono lwabwami bwasimalelaakwe, muzike ooyu wasweekelwa. Baapostolo balangila Jesu kuti atalike kulela mu Bwami bwa Leza. Aboobo ciindi nobamvwa ncaamba Jesu kujatikizya muzike ooyu, kulangilwa kuti babona kuti ikuti tiibabeleka canguzu, tabakabi mu Bwami oobo.

Majwi ngaamba Jesu ayelede kubakulwaizya basikwiiya ibasyomeka kubeleka canguzu. Wamanizya ulaamba: “Ndimwaambila kuti, umwi aumwi uujisi uyoopegwa azimwi, pele ooyo uutajisi, uyoonyangwa noziba zyeezyo nzyajisi.” Wayungizya kwaamba kuti basinkondonyina aabo batayandi kuti ‘abe mwami wabo’ bayoojaigwa. Mpoonya Jesu wazumanana alweendo lwakwe lwakuya ku Jerusalemu.—Luka 19:26-28.