Cikozyanyo camwana mutaka, eeco ncaazwa mukwaamba Jesu, ceelede kuyiisya baabo ibali kumuswiilila nkokuti basimutelo, balembi alimwi aba Farisi kuti Leza ulilibambilide kulekelela basizibi ibeempwa. (Luka 15:1-7, 11) Lino Jesu waambila basikwiiya bakwe. Waamba cikozyanyo cimbi, icikozyanyo camuvwubi umwi iwamvwa kuti sikulanganya ŋanda yakwe naa mubanzi wakwe tabeleki kabotu.

Jesu waamba kuti mubanzi ooyu waambwa kuti talulanganyi kabotu lubono lwasimalelaakwe. Aboobo simalelo ooyu waamba kuti mubanzi wakwe ulatandwa mulimo. Mubanzi watalika kuyeeya, ulaamba: “Ino ndilacita buti, mbwaanga simalelaangu uyanda kundigusya mulimo wabubanzi? Tandijisi nguzu zyakulima, alimwi ndilalisenda kulombelela.” Kutegwa alibambile zyakumbele, wayeeya kuti: “Ndilizyi mbondilaacite kutegwa bantu bakanditambule mumaanda aabo ndaakutandwa mulimo wabubanzi.” Cakutasowa ciindi waita baabo bajisi zikwelete akubabuzya kuti: ‘Ino ujisi cikwelete cipati buti kuli simalelaangu?’—Luka 16:3-5.

Wakusaanguna wavwiila kuti: “Zipimyo zipati zyamafwuta aamaolifa zili 100.” Eeco cileelene amalita aali 2,200 aamafwuta. Sicikwelete ooyu ambweni wakajisi muunda mupati kapati wamaolifa naa ambweni wali musambazi wamafwuta. Mubanzi wamwaambila kuti: “Bweza pepa lyacizuminano lilembedwe cikwelete ncojisi, kkala aawa ulembe cakufwambaana kuti 50 [nkokuti, malita aali 1,100].”—Luka 16:6.

Mubanzi wabuzya aumwi kuti: “Ino yebo ujisi cikwelete cawiiti munji buti?” Walo wavwiila kuti: “Zipimyo zipati zyawiiti zili 100.” Wiiti ooyu ukkwana mucipimyo cisika kumalita aali 22,000. Mubanzi waambila sicikwelete ooyu kuti: “Bweza pepa lyacizuminano lilembedwe cikwelete ncojisi, ulembe kuti 80.” Aboobo, wacesya cikwelete eeci amweelwe uusika kuti 20 pesenti.—Luka 16:7.

Mubanzi ooyu ucijisi nguzu zyakulanganya mali aasimalelaakwe, aboobo munzila imwi ujisi nguzu zyakucesya zikwelete nzyobajisi bantu kuli simalelaakwe. Kwiinda mukucesya zikwelete, mubanzi uli mukulijanina balongwe aabo ibakonzya kumuyeeya aakutandwa mulimo.

Mukuya kwaciindi simalelaakwe wazyiba ncaacita muzike ooyu. Nokuba kuti ncaacita mubanzi ooyu camupa kusweekelwa lubono, simalelo wabotelwa alimwi wamulumbaizya mubanzi wakwe nkaambo ‘nokuba kuti taluleme, wacita cabusongo.’ Jesu wayungizya kuti: “Bana bamubweende bwazintu oobu mbasongo munzila iigwasya kubantu bamuzyalani lyabo beni kwiinda bana bamumuni.”—Luka 16:8.

Aawa Jesu tazuminizyi nzila nzyaabelesya mubanzi ooyu, naa kukulwaizya kubelesya bumpelenge mumakwebo pe. Aboobo, ino upandulula nzi? Wakulwaizya basikwiiya kuti: “Amujane balongwe kwiinda mukubelesya lubono lutaluleme ikutegwa lwaakubula mpindu, bakamutambule mumasena aakukkala aatamani.” (Luka 16:9) Ncobeni, ciiyo ciliko aawa ncakubonena limwi zyakumbele akubelesya busongo bugwasya. Babelesi ba Leza, nkokuti  “bana bamumuni,” beelede kulubelesya cabusongo lubono lwabo, kababikkilide maano kukujana buumi butamani.

Jehova Leza alimwi a Mwanaakwe mbambabo balikke ibakonzya kumutambula muntu mu Bwami bwakujulu naa mu Paradaiso aanyika iyeendelezyegwa a Bwami oobo. Tweelede kusolekesya kuba acilongwe ambabo kwiinda mukubelesya kufwumbwa lubono ndotujisi ikugwasyilizya milimo ya Bwami. Kwiinda mukucita boobo, tulakonzya kuba masimpe kuti tuyooba abuumi butamani nokuba kuti ngolida, nsiliva alubono lumbi buyo lwakumubili zyabula mulimo naa zyanyonyooka.

Alimwi Jesu waamba kuti aabo ibasyomeka kulanganya alimwi akubelesya kufwumbwa lubono naa zintu zyakumubili nzyobajisi balasyomeka mukulanganya makani mapati kapati. Jesu wati: “Aboobo ikuti tiimwalitondezya kuti mulasyomeka kujatikizya lubono lutaluleme, ino nguni uuyakumusyoma kulubono lwini-lwini [mbuli zintu zya Bwami]?”—Luka 16:11.

Jesu utondezya basikwiiya bakwe kuti nzinji zilangilwa kulimbabo kutegwa bakatambulwe “mumasena aakukkala aatamani.” Muntu takonzyi kuba mubelesi mwini-mwini wa Leza akuba muzike walubono lutaluleme aciindi comwe pe. Jesu wamanizya kuti: “Taakwe mubelesi uukonzya kuba muzike wabasimalelo bobilo, nkaambo uyoosulaika umwi akuyanda umbi, naa uyoosyomeka kuli umwi akusampula umbi. Tamukonzyi kuba bazike ba Leza aba Lubono.”—Luka 16:9, 13.