Mucikombelo ku Kapernauma, Jesu uyiisya kuti walo ncecinkwa cini-cini cizwa kujulu. Calibonya kuti makani ngaamba ngakuyungizya kumakani ngaakaambila bantu ibakapiluka kuzwa kujwe lya Lwizi lwa Galilaya, aabo ibakalya zinkwa answi nzibakapegwa ookuya.

Jesu wazumanana amubandi wakwe ategwa: “Bamauso bakalya mana munkanda pele bakafwa.” Mukwiimpana aceeci, wapandulula kuti: “Mebo ndendime cinkwa cipona cakazwa kujulu. Ikuti muntu uuli woonse wacilya cinkwa eeci, unoopona kukabe kutamani; alimwi mubwini, icinkwa ncendiyoopa mubili wangu kutegwa nyika ibe abuumi.”—Johane 6:48-51.

Mucilimo camu 30 C.E., Jesu wakaambila Nikodemo kuti Leza wakaiyanda kapati nyika cakuti wakapa Mwanaakwe kuti abe Mufwutuli. Aboobo, Jesu lino ukankaizya mbociyandika kulya mubili wakwe kwiinda mukusyoma mucituuzyo ncayakupa. Eeyi njenzila yakujana buumi butamani.

Pele bantu abacima majwi aa Jesu. Babuzya kuti: “Mbuti muntu ooyu mbwanga watupa mubili wakwe kuti tulye?” (Johane 6:52) Jesu uyanda kuti bamvwisye kuti taambi kulya mubili wakwe wini buya pe, pele munzila yacikozyanyo. Majwi ngaayungizya kwaamba atondezya kuti eeci ncencico ncapandulula.

Waamba kuti: “Ccita kuti mwalya mubili wa Mwanaamuntu akunywa bulowa bwakwe, munyina buumi mulindinywe. Kufwumbwa ooyo uulya mubili wangu akunywa bulowa bwangu ulaabuumi butamani, . . . nkaambo mubili wangu ncakulya cini-cini, alimwi bulowa bwangu ncakunywa cini-cini. Kufwumbwa ooyo uulya mubili wangu akunywa bulowa bwangu ulikamantene andime lyoonse.”—Johane 6:53-56.

Amuyeeye buyo mbocabakopa eeci baswiilizi ba Juda! Ambweni bayeeya kuti Jesu ukulwaizya bantu kuti kabalya bantunyina naa kuti batyole mulawo wa Leza ooyo uukasya kulya bulowa. (Matalikilo 9:4; Levitiko 17:10, 11) Pele Jesu aawa taambi kulya mubili naa kunywa bulowa bwini pe. Ncatondezya ncakuti boonse ibayanda kuba abuumi butamani beelede kusyoma cipaizyo ncayoopaizya ciindi aakwaaba mubili wakwe uulondokede wanyama akutila bulowa bwakwe ibupa buumi. Pele nobaba basikwiiya bakwe banji tiibaimvwisya njiisyo eeyi. Aboobo bamwi batongooka ategwa: “Makani aaya ayumya mate; nguni uunga waaswiilila?”—Johane 6:60.

Akaambo kakuti Jesu wazyiba kuti bamwi akati kabasikwiiya bakwe balatongooka, wabuzya kuti: “Sena makani aaya amutyompya? Aboobo ino cilaba buti, ikuti mwabona Mwanaamuntu katanta kuya kooko nkwaakabede kusaanguna? . . . Imajwi ngendamwaambila muuya alimwi mbuumi. Pele nkobali bamwi akati kanu ibatasyomi.” Akaambo kaceeci, basikwiiya bakwe banji baunka alimwi baleka kumutobela.—Johane 6:61-64.

Aboobo Jesu wabuzya baapostolo bakwe bali 12 kuti: “Sena andinywe muyanda kuunka?” Petro wavwiila ategwa: “Mwami, ino inga twaunka kuli ni? Yebo ujisi majwi aapa buumi butamani. Twasyoma alimwi twazyiba kuti yebo ndonduwe Musalali wa Leza.” (Johane 6:67-69) Eelo kaka majwi aaya atondezya kusyomeka, nokuba kuti aciindi aawa Petro abaapostolonyina bamwi tabanacimvwisya cakumaninina ncayiisya Jesu kujatikizya makani aaya!

Nokuba kuti wakukkomanina kwiingula kwa Petro, Jesu waamba kuti: “Sena tiindakamusala kamuli kkumi ababili? Pele umwi akati kanu ngusikubejelezya.” (Johane 6:70) Jesu aawa waamba Judasi Isikariote. Kulangilwa kuti aciindi aawa Jesu wabona kuti Judasi watalika kuleya akutobela mizeezo yakwe mibi.

Nokuba boobo, kulangilwa kuti camukkomanisya Jesu kuzyiba kuti Petro abasikwiiya bambi tiibaleka pe kumutobela alimwi tiibaleka kutola lubazu mumulimo wakufwutula bantu ngwacita walo.