Naamana kukkala mazuba obilo mu Samariya, Jesu wazumanana alweendo lwakwe lwakuunka kucooko cokwabo. Wajisi bubi kubeleka mulimo wakukambauka mu Judaya, pele tajokeli ku Galilaya kuti akalyookezye. Muciindi caboobo, wayungizya buya mulimo wakwe wakukambauka mucisi mwaakakomenena. Kweelede kuti Jesu talangili kutambulwa kabotu ooko, nkaambo mbubonya mbwaakaambide mwini, “mucisi cokwabo musinsimi talemekwi.” (Johane 4:44) Muciindi cakuti bazumanane kukkala anguwe, basikwiiya bakwe bapiluka kwabo kumikwasyi yabo alimwi akumilimo njobakali kucita kaindi.

Ino mulumbe nzi Jesu ngwaatalika kukambauka? Ngwakuti: “Bwami bwa Leza bwaswena. Amweempwe alimwi amube alusyomo mumakani mabotu.” (Marko 1:15) Ino bantu bautambula buti? Bana Galilaya banji bamutambula kabotu Jesu, bamulemeka. Tiibacita boobu akaambo buyo kamulumbe wakwe. Bamwi akati kabana Galilaya aaba bakaliko ku Pobwe Lyakwiindilila ku Jerusalemu myezi misyoonto yainda, alimwi bakabona zitondezyo zigambya nzyaakacita Jesu.​—Johane 2:23.

Ino Jesu wautalikila kuli mulimo wakwe mupati waku Galilaya? Kulibonya kuti nkuu Kana, ooko cimwi ciindi nkwaakasandula maanzi kuba waini kupobwe lyabwiinga. Kali kooko aciindi eeci cabili, Jesu wamvwa kuti mwana musankwa umwi ulicisidwe kapati, ufwumba bulamfwu. Ooyu mwana wamuntu umwi walupati-pati uubelekela Heroda Antipa, imwami ooyo kumbele iwakakosola mutwe wa Johane Mubbapatizi. Muntu ooyu walupati-pati wamvwa kuti Jesu wazwa ku Judaya akuboola ku Kana. Aboobo weenda kuzwa kumunzi wakwe ku Kapernauma kuzyooyandaula Jesu ku Kana. Kapengede kapati mumoyo ooyu mwaalumi walomba kuti: “O Mwami, atweende natanafwa mwanaangu.”​—Johane 4:49.

Jesu wamwiingula amajwi aalangilwa kuti amugambya mwaalumi ooyu aakuti: “Koya buyo; mwanaako wapona kale.” (Johane 4:50) Ooyu mubelesi wa Heroda wasyoma ncaamwaambila Jesu, eelyo walunyona lweendo kupiluka kumunzi wakwe. Munzila wayaanya bazike bakwe, balo ibaboola cakufwambaana kuti bamwaambile makani mabotu. Makani mabotu ngakuti mwanaakwe wapona! Kasola kuswaanganya twaambo, wabuzya kuti, ‘Ndilili naakapona?’

Baingula kuti: “Ijilo awoola lyaciloba mubili wakwe wakaleka kupya.”​—Johane 4:52.

Mpoonya walupati-pati wayeeya kuti eeci nceciindi Jesu naakaamba kuti, “Mwanaako wapona kale.” Kuzwa waawo, mwaalumi ooyu, uuvwubide kapati cakuti ulijisi abazike, alimwi abamuŋanda yakwe boonse baba basikwiiya ba Kristo.

Aboobo munzi wa Kana waba busena ooko Jesu nkwaacitila maleele ziindi zyobilo, aakusaanguna wasandula maanzi kuba waini mpoonya kumbele waponya mwana musankwa kali kulamfwu ikulampa makkilomita aasika ku 26. Masimpe kuti aaya taali ngamaleele alikke ngaakacita. Pele maleele aakuponya aaya alilibedelede nkaambo acitika aciindi naapiluka ku Galilaya. Cilisalede kuti Jesu musinsimi ngwakkomanina Leza, pele ino ‘mucisi cokwabo musinsimi ooyu ulalemekwa’ kusikila aali?

Eeci ciyoolibonya Jesu aunka kumunzi okwabo ku Nazareta. Ino ncinzi ncayoojana ooko?