Kweelede kuti Jesu ulikatede naamana kubucesya kapaila mpoonya akusala basikwiiya bali 12 kuba baapostolo. Lino bwaca, pele ucijisi nguzu alimwi uliyandide kugwasya bantu. Wacita boobo aacilundu cimwi camu Galilaya, ambweni icilaafwaafwi amunzi wa Kapernauma, ooko nkwaali kucitila milimo yakwe minji.

Makamu-makamu aabantu aboola kulinguwe kuzwa kumasena aakulamfwu. Bamwi baboola kuzwa kumusanza, nkokuti, kuzwa ku Jerusalemu akumasena aamwi aamu Judaya. Bambi bazwa kuminzi ya Turo a Sidoni eeyo iili kunkomwe yalwizi kunyika lwaambo. Ino balonda nzi kuli Jesu? ‘Baboola kumuswiilila alimwi akuponesyegwa malwazi aabajisi.’ Alimwi eeco ncicacitika—Jesu ‘wabaponya boonse.’ Amuciyeeyele buyo! Boonse baciswa baponesyegwa. Kuyungizya waawo, Jesu wabagwasya abalo aabo ‘bapenzyegwa amyuuya iisofweede,’ nkokuti bantu bapenzyegwa abangelo babyaabi ba Saatani.—Luka 6:17-19.

Mpoonya, Jesu wajana busena buyalene atala aacilundu kumane makamu aabantu abungana mumbali lyakwe. Basikwiiya bakwe, kwaambisya baapostolo bali 12, beelede kuti mbabali afwaafwi kapati anguwe. Boonse baliyandide kumuswiila mwiiyi ooyu uukonzya kucita milimo iili boobu iigambya. Jesu waamba mulumbe ooyo iwabagwasya ncobeni aabo ibamuswiilila. Kuzwa ciindi eeci, bantu abambi banji kapati bagwasyigwa anguwo. Andiswe tulakonzya kugwasyigwa anguwo akaambo kakuti ujisi twaambo tubotu kapati tujatikizya makani aakumuuya itwakaambwa munzila nguba-uba alimwi iisalede. Jesu waamba zintu zibacitikila bantu boonse alimwi nzyobazyi. Eeci cipa kuti makani aakwe kabaamvwisya boonse aabo bayanda kupona buumi bubotu mumeso aa Leza. Ino ntwaambo nzi tupati-pati twamumulumbe wa Jesu itupa kuti kauyandika kapati?

Toonse tulayanda kukkomana. Akaambo kakuzyiba makani aaya, Jesu watalika mulumbe wakwe kwiinda mukupandulula baabo bakkomene ncobeni. Amuyeeye buyo eeci mbocapa kuti baswiilizi bakwe babikkile maano. Pele kweelede kuti kuli zintu zimwi izyabagambya.

Waamba kuti: “Balikkomene aabo bazyi kuti bayandika kusololelwa a Leza, nkaambo Bwami bwakujulu mbubwabo. Balikkomene aabo balila, nkaambo bayakuumbulizyigwa. . . . Balikkomene aabo bafwa nzala anyota yabululami, nkaambo bayookkuta. . . . Balikkomene aabo bapenzyegwa akaambo kabululami, nkaambo Bwami bwakujulu mbubwabo. Mulikkomene nywebo ciindi bantu nobamusampaula akumupenzya . . . akaambo kandime. Amukondwe akusekelela.”—Matayo 5:3-12.

Ino Jesu upandulula nzi naamba kuti “balikkomene”? Taambi lumwemwe naa kwiile kuseka-seka buyo mbuli leelyo muntu nalikondelezya. Lukkomano lwini-lwini lulainda aawo. Lujatikizya kukkutila ncobeni, kubotelwa alimwi akulimvwa kabotu akaambo kazintu nzyotucita mubuumi.

Jesu waamba kuti bantu ibazyi kuti bayandika kusololelwa aa Leza, ibausa akaambo kakuti mbaasizibi, alimwi ibamuzyi akumubelekela Leza mbabantu bakkomene ncobeni. Nokuba kuti balasulaikwa naa kupenzyegwa akaambo kakucita kuyanda kwa Leza, balikkomene nkaambo balizyi kuti bakkomanisya Leza akuti walo uyoobalumbula kwiinda mukubapa buumi butamani.

Nokuba boobo, bantu banji bayeeya kuti kuvwuba alimwi akulikondelezya nzyezipa muntu  kukkomana. Walo Jesu waamba kuti tacili boobo pe. Mukwiimpana, Jesu waamba makani aalangilwa kuti abapa kuyeeya baswiilizi bakwe, wati: “Maawe kulindinywe nobavwubi, nkaambo mubutambwida limwi bulumbu bwanu bukkwene. Maawe kulindinywe nomukkutide lino, nkaambo muyoofwa nzala. Maawe, nywebo nomusekelela lino, nkaambo muyoolila akoomoka. Maawe kufwumbwa leelyo bantu boonse nobamulumbaizya, nkaambo oobu mbombubo mbobakacita bamausyi kubasinsimi bakubeja.”—Luka 6:24-26.

Ino nkaambo nzi Jesu ncaamba kuti maawe kubavwubi, kuli baabo basekelela alimwi akuli baabo balumbaizyigwa? Nkaambo ikuti muntu kajisi zintu eezyi alimwi kaziyandisya, ulakonzya kuleka kukubikkila maano kubelekela Leza, eelyo eeco inga camupa kutakkomana ncobeni. Jesu taambi kuti muntu ulakonzya kukkomana akaambo buyo kakuti mucete naa kuti ufwide nzala. Nokuba boobo, kanji-kanji muntu uupengede nguutambula mulumbe ngwayiisya Jesu alimwi nguujana lukkomano lwini-lwini.

Mpoonya kaambila basikwiiya bakwe, Jesu wati: “Muli munyo wanyika.” (Matayo 5:13) Mubwini tabali munyo wini buya pe. Pele, munyo upa kuti cintu citaboli. Munyo munji ulayobolwa munsi-munsi aacipaililo kutempele lya Leza alimwi ubelesyegwa kulunga zituuzyo. Alimwi wiiminina kutasofwaala naa kutabola. (Levitiko 2:13; Ezekieli 43:23, 24) Basikwiiya ba Jesu “munyo wanyika” mukuti bagwasya bantu kuti batasofwaali kumuuya alimwi amukulilemeka. Masimpe, mulumbe ngobajisi ulakonzya kupa kuti aabo bautambula bazumanane kupona.

Alimwi Jesu waambila basikwiiya bakwe kuti: “Muli mumuni wanyika.” Lambe talivwumbwi cisuwo pe, pele libikkwa acibikkilo candilyo aawo mpolikonzya kumunikila. Aboobo Jesu wakulwaizya kuti: “Aumunike mumuni wanu kubantu kutegwa babone milimo yanu mibotu akupa bulemu kuli Uso uuli kujulu.”—Matayo 5:14-16.

Basololi babukombi bwaba Juda babona Jesu kuti muntu uutyola Mulawo wa Leza alimwi caino-ino bakamvwana kuti bamujaye. Aboobo caantangalala Jesu waamba kuti: “Mutayeeyi kuti ndakaboolela kujaya Mulawo naa eezyo izyakalembwa a Basinsimi. Tiindakaboolela kujaya pe, pele kuzuzikizya.”—Matayo 5:17.

Masimpe, Jesu ulaulemeka kapati Mulawo wa Leza alimwi ukulwaizya bamwi kucita mbubonya oobo. Mane  waamba kuti: “Aboobo kufwumbwa uutyola nouba omwe wamilawo miniini eeyi akuyiisya bambi kucita oobo, takeeleli pe mu Bwami bwakujulu.” Upandulula kuti muntu uuli boobo takanjili mu Bwami pe. Wazumanana ulaamba: “Pele kufwumbwa uutobela akuyiisya milawo eeyi, uyakweelela mu Bwami bwakujulu.”—Matayo 5:19.

Jesu alimwi wakasya mizeezo mibi iipa kuti muntu atyole Mulawo wa Leza. Naamana kutondezya kuti Mulawo waamba kuti, “Utajayi,” Jesu wayungizya kuti: “Kufwumbwa uuzumanana kukalala akaambo kamunyina uyoopegwa mulandu kunkuta.” (Matayo 5:21, 22) Kuzumanana kukalala akaambo kamuntu umwi makani mapati, nkaambo kulakonzya kusololela kukujaya muntu. Aboobo, Jesu wapandulula kusolekesya nkwayelede kucita muntu kutegwa kube luumuno, wati: “Lino ikuti uleta cipego cako kucipaililo kumane noli kooko wayeeya kuti munyoko ulaakaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.”—Matayo 5:23, 24.

Mulawo aumbi uuli mu Mulawo wa Musa ukasya kucita bumambe. Jesu waamba kuti: “Mwakamvwa kuti kwakaambwa kuti: ‘Utaciti bumambe.’ Pele ndimwaambila kuti kufwumbwa muntu uulangisisya mukaintu cakumunyomenena, wacita kale bumambe anguwe mumoyo wakwe.” (Matayo 5:27, 28) Aawa Jesu taambi kuba buyo amuzeezo uutali kabotu; pele ukankaizya mbwaali makani mapati ciindi muntu nazumanana ‘kulangisisya.’ Ikuzumanana kulangisisya naa kucenka kanji-kanji kubusya muzeezo wakoonana. Mpoonya ikuti muntu walijana mubukkale mbwabona kuti bwamupa coolwe, ulakonzya kucita bumambe. Ino muntu inga wacita buti kuti eeci citacitiki? Weelede kubweza ntaamu cakutalyeengelela. Jesu waamba kuti: “Lino ikuti liso lyako lyalulyo kalikulebya, kolinonkola akulisowa. . . . Ikuti janza lyako lyalulyo kalikulebya, kolikosola akulisowa.”—Matayo 5:29, 30.

Kutegwa batafwi, bantu bamwi balazumina kukosolwa janza naa kuulu ikulaabulwazi. Aboobo, Jesu waamba kuti cilainda kubota ‘kusowa’ cintu cili coonse, nociba ceeco ciyandika kapati mbuli liso naa janza, kutegwa muntu aleke kuba amizeezo mibi alimwi amicito iiboola akaambo kamizeezo eeyo. Jesu wapandulula kuti “inga cainda kubota kulinduwe kuti wasweekelwa cizo comwe kwiinda kuti mubili wako woonse ukasowelwe mu Gehena,” (mucimbotela ciyaka mulilo kunze aabwaanda bwamunzi wa Jerusalemu), nkokuti ikunyonyoonwa mane kukabe kutamani.

Alimwi Jesu wapa lulayo kujatikizya mbobeelede kucitwa bantu ibayandisya nkondo alimwi ibasoka beenzinyina. Waamba kuti: “Utamulwani muntu mubi, pele kufwumbwa ooyo uukuuma lubayi kusaya lyalulyo, komupa asaya limbi.” (Matayo 5:39) Eeci tacaambi kuti muntu tayelede kulikwabilila mukamwini naa kukwabilila mukwasyi wakwe ikuti  walwanwa. Jesu waamba kujatikizya lubayi oolo lutabelesyegwi kujaya muntu naa kumucisa kapati; pele ilwakuti asampuke. Aboobo ncaamba Jesu ncakuti ikuti muntu umwi kayanda kutalisya nkondo naa mazwanga andinywe, kufwumbwa naa nkwiinda mukumuuma lubayi lwini naa kumutukila, mutamujoli pe.

Lulayo oolu luleendelana amulawo wa Leza wakuyanda simukoboma. Aboobo Jesu ulailila baswiilizi bakwe kuti: “Amuzumanane kuyanda basinkondonyoko akubapailila aabo bamupenzya.” Wapa kaambo kabotu kakucitila boobu, ategwa: “Kutegwa musinizye kuti muli bana ba Uso uuli kujulu, nkaambo ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.”—Matayo 5:44, 45.

Jesu wamanizya cibeela eeci camulumbe wakwe amajwi aakuti: “Aboobo mweelede kulondoka mbuli Uso wakujulu mbwalondokede.” (Matayo 5:48) Masimpe, Jesu aawa taambi kuti bantu balakonzya kulondoka cakumaninina. Nokuba boobo, kwiinda mukwiiya Leza, tulakonzya kukomezya luyando lwesu kuti tubayande abalo basinkondoma. Mumajwi aamwi waamba kuti: “Amube aluse lyoonse mbubonya Uso mbwali aluse.”—Luka 6:36.

Jesu mbwayaabuzumanana amulumbe wakwe, wakulwaizya baswiilizi bakwe kuti: “Amucenjele kuti mutaciti bululami bwanu kumbele lyabantu kutegwa bamubone.” Jesu wabasinsa basikuupaupa ameso ibalicengeezya kuti babelekela Leza, kwiinda mukuyungizya kuti: “Ciindi nomupa zipego zyaluse, mutanoolizyi mweembo kumbele lyanu mbubonya basikuupaupa ameso mbobacita.” (Matayo 6:1, 2) Cilainda kubota kupa zipego zyaluse kumbali, cakutabonwa abantu bambi.

Mpoonya Jesu waamba kuti: “Ciindi nomupaila, mutanoociti mbuli basikuupaupa ameso, nkaambo balayanda kupaila kabaimvwi muzikombelo ampoiswaanganina migwagwa mipati kutegwa babonwe abantu.” Pele wati: “Ciindi nomupaila, amunjile muŋanda yanu, alimwi mwajala mulyango, amupaile kuli Uso uutalibonyi.” (Matayo 6:5, 6) Jesu takasyi kupaila abuleya, nkaambo walo mwini wakali kupaila abuleya. Ncakasya aawa nkupaila mipailo yamambonwa iigeme kukkomanisya bantu baswiilide alimwi akuyanda kulumbaizyigwa.

Walailila nkamu yabantu kuti: “Ciindi nomupaila, mutanikwaambi majwi ngoonya cakwiinduluka-induluka mbuli bantu bamasi mbobacita.” (Matayo 6:7) Aawa Jesu taambi kuti kupailila makani amwi cakwiinduluka-induluka ncibi. Waamba kuti tacili kabotu kubelesya majwi aakupeta naa aakuswatila “cakwiinduluka-induluka,” nkokuti kupaila mipailo yakupeta naa yakuswatila. Kuzwa waawo, waamba mupailo wacikozyanyo walo uubikkilizya kulomba kuli ciloba. Kulomba kotatwe kwakusaanguna nkwakuzuminizya kuti Leza nguweelela kweendelezya alimwi akuti makanze aakwe azwidilile, nkokuti kuti zina lyakwe lisalazyigwe, kuti Bwami bwakwe buboole, akuti kuyanda kwakwe kucitwe. Lilikke buyo nitwamana kupailila makani  aaya notweelede kulomba zintu zitugeme mbuli cakulya cabuzuba abuzuba, kulekelelwa zibi, kuti tutanjili mumasunko ngotutakonzyi kuzunda alimwi akuti tuvwunwe kumubi.

Ino lubono lwesu tweelede kulubikka mubusena nzi? Jesu walailila nkamu yabantu kuti: “Amuleke kuliyobweda lubono anyika, aawo mpoluligwa zyuuka ankalaya alimwi ababbi mpobanjila akubba.” Eelo kaka lulayo oolu ndubotu! Lubono lwaanyika lulakonzya kumana alimwi buya lulamana, alimwi cilongwe cesu a Leza taciyeeme akuba andulo. Aboobo Jesu wazumanana kwaamba kuti: “Amuliyobwede lubono kujulu.” Tulakonzya kucita oobo kwiinda mukubikka mulimo wa Leza mubusena bwakusaanguna mubuumi bwesu. Taaku uukonzya kutunyanga coolwe ncotujisi cakukkomaninwa aa Leza naa bulumbu bwakuba abuumi butamani akaambo kancico. Ncobeni, ngamasimpe majwi aa Jesu aakuti: “Ooko kuli lubono lwako, awalo moyo wako nkuuyooba.”—Matayo 6:19-21.

Kakankaizya kaambo aaka, Jesu wapa cikozyanyo cakuti: “Liso ndelambe lyamubili. Ikuti liso lyako kalilangide buyo acintu comwe, mubili wako woonse ulaba mumumuni. Pele ikuti liso lyako kalilaamunyono, mubili wako woonse ulaba mumudima.” (Matayo 6:22, 23) Ikuti liso lyesu kalibeleka kabotu, lili mbuli lambe liyaka ilimunika mubili wesu. Pele kutegwa libe boobo, liso lyesu lyeelede kuti kalilangide buyo acintu comwe; buyo-buyo, tulakonzya kutalika kubona buumi bwesu munzila iitaluzi. Kubikkila maano kapati kuzintu zyakumubili muciindi cakubelekela Leza kulakonzya kupa kuti ‘mubili woonse ube mumudima,’ ambweni kutupa kucita zintu zitasalali naa kuba bampelenge.

Mpoonya Jesu waamba makani mapati mucikozyanyo cakuti: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.”—Matayo 6:24.

Bamwi ibamuswiilila Jesu beelede kuti balilibilikide kujatikizya mbobeelede kuzibona zintu  zyakumubili nzyobayandika. Aboobo wabakkazika moyo kuti tabeelede kulibilika kufwumbwa buyo kuti kababikka mulimo wa Leza mubusena bwakusaanguna. Wati: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala, nokuba boobo Uso wakujulu ulabasanina.”—Matayo 6:26.

Ino mbuti kujatikizya maluba-luba aamusyokwe aali aacilundu aawo? Jesu wati “naba Solomoni mubulemu bwakwe boonse kunyina naakasamide mbuli limwi lyayaaya.” Ino eeci caamba nzi? “Ikuti naa Leza mbwazisamika oobu zimena musyokwe iziliko sunu pele juunza zyayuma akusowelwa mumulilo, sena takaindi kumusamika nywebo?” (Matayo 6:29, 30) Aboobo, cabusongo Jesu wakulwaizya kuti: “Mutanoolibiliki akwaamba kuti, ‘Ino tuyoolya nzi?’ naa, ‘Ino tuyoonywa nzi?’ naa, ‘Ino tuyoosama nzi?’ . . . Uso wakujulu ulizyi kuti muyandika zintu eezyi zyoonse. Aboobo, amuzumanane kusaanguna kuyandaula Bwami abululami bwakwe, eelyo zintu zimbi zyoonse eezyi ziyooyungizyigwa kulindinywe.”—Matayo 6:31-33.

Baapostolo alimwi abantu bambi buyo babombe myoyo bayanda kupona munzila iikkomanisya Leza, pele eeci tacili cuuba-uba akaambo kabukkale mobabede. Mucikozyanyo, ba Farisi banji bajisi cilengwa cakujanina bamwi milandu alimwi akubabeteka munzila mbyaabi. Aboobo Jesu walailila baswiilizi bakwe kuti: “Amuleke kubeteka kutegwa mutabetekwi; nkaambo lubeta ndomubetesya, ndomuyoobetesyegwa andinywe.”—Matayo 7:1, 2.

Ncilijazyo kutobela ba Farisi ibajisi cilengwa cakujanina bamwi milandu, mbubonya Jesu mbwaapa cikozyanyo kuti: “Sena moofwu ulakonzya kusololela moofwunyina? Sena boonse bobilo tabakoowida mumulindi?” Aboobo, ino baswiilizi ba Jesu beelede kubabona buti bamwi? Tabeelede kuba aciyanza cakubajanina milandu, nkaambo eeco inga caba cibi cipati. Jesu wabuzya kuti: “Ino mbuti mbonga waambila munyoko kuti, ‘Mukwesu, atubone ndikugusye kakwa kali muliso lyako,’ kakuli yebo omwini tolibwene tanda lili muliso lyako? Osikuupaupa ameso! Kosaanguna kugusya tanda muliso lyako, mpoonya ulabona kabotu mbonga wagusya kakwa kali muliso lyamunyoko.”—Luka 6:39-42.

Eeci tacaambi kuti basikwiiya ba Jesu tabeelede pe kubeteka makani aali woonse. Jesu wabalailila kuti: “Mutapi babwa zintu zisalala, nokuba kufwusila ngulube ngale zyanu.” (Matayo 7:6) Makani aakasimpe aazwa mu Jwi lya Leza alaampindu kapati, mbuli ngale zyamucikozyanyo eeci. Ikuti bamwi bantu kabacita mbuli banyama, kabatalumbi nobakambaukilwa kasimpe aaka ikataliboteli, basikwiiya ba Jesu beelede kubasiya bantu aabo akuyandaula baabo bayanda kuswiilila.

Ikujokelela kumakani aamupailo, Jesu wakankaizya mbociyandika kuzumanana kupaila. Wati: “Amuzumanane kulomba, eelyo muyoopegwa.” Leza ulilibambilide kwiingula mipailo, mbubonya Jesu mbwaakankaizya naabuzya kuti: “Nguni akati kanu uukonzya kupa mwanaakwe bbwe ikuti walomba cinkwa? . . . Aboobo ikuti nywebo nokuba kuti muli babi, mulicizyi kubapa zipego zibotu bana banu, nkokuti Uso uuli kujulu uyakwiinda kupa zintu zibotu kulibaabo ibamulomba!”—Matayo 7:7-11.

Mpoonya Jesu waamba mulawo uudumide ngobeelede kutobela bantu muzintu zyoonse nzyobacita  wakuti: “Aboobo, zintu zyoonse nzyomuyanda kuti bantu bamucitile, anywebo nzyomweelede kubacitila.” Sena inga tiicabota kuti toonse twauzumina mulawo ooyu camoyo woonse akuutobela muzintu nzyotucitila bamwi? Pele kucita boobo tacili cuuba-uba, mbubonya mbwaatondezya Jesu mumalailile aakuti: “Amunjile mumulyango uusyanikide, nkaambo mulyango uukwazeme alimwi anzila mpati itola kulunyonyooko, kumane mbanji banjila mulinjiyo; pele ulisyanikide mulyango alimwi ninsyoonto nzila iitola kubuumi, kumane mbasyoonto baijana.”—Matayo 7:12-14.

Kuli bantu bamwi ibayakusola kugusya basikwiiya munzila iitola kubuumi, aboobo Jesu wacenjezya kuti: “Amubacenjelele basinsimi bakubeja ibaboola kulindinywe kabasamide zisani zyambelele, pele mukati mbaaumpe babutambo.” (Matayo 7:15) Jesu waamba kuti zisamu zibotu alimwi azisamu zibi zilakonzya kuzyibwa kwiinda mumicelo yanzizyo. Oobu mbocibede akubantu. Aboobo, basinsimi bakubeja tulakonzya kubazyiba kwiinda muzintu nzyobayiisya alimwi anzyobacita. Ncobeni, Jesu wapandulula kuti, tazili buyo zintu nzyaamba muntu izimupa kuba sikwiiya wakwe pele alimwi anzyacita. Bamwi bantu baamba kuti Jesu Mwami wabo, pele ino mbuti kuti kabataciti ncayanda Leza? Jesu wati: “Ndiyoobaambila kuti: ‘Tiindakamuzyi pe! Amuzwe kulindime, nywebo nobasimucita zibi!’”—Matayo 7:23.

Mpoonya Jesu wamanizya mulumbe wakwe amajwi aakuti: “Kufwumbwa muntu uuswiilila akucita eezyi nzyondaamba, unooli mbuli muntu uucenjede iwakayaka ŋanda yakwe amwala. Lino kwakawa mvwula mpati amaanzi akapaya, muwo wakaunga akubbubbula kuŋanda eeyo, pele tiiyakawa pe, nkaambo yakayakidwe amwala.” (Matayo 7:24, 25) Nkaambo nzi ncoyatakawida ŋanda eeyo? Nkaambo muntu ooyo “wakasya mulindi mulamfwu akuyaka ntalisyo amwala.” (Luka 6:48) Aboobo nzinji ziyandika kunze lyakumvwa buyo majwi aa Jesu. Tweelede kusoleka canguzu ‘kucita nzyaamba.’

Pele ino mbuti kujatikizya muntu ‘uuswiilila pele kataciti nzyaamba’ Jesu? Muntu ooyo uli mbuli “mufwubafwuba iwakayaka ŋanda yakwe amusenga.” (Matayo 7:26) Imvwula, kupaya kwameenda alimwi amuwo zilakonzya kupa kuti ŋanda eeyo iwe.

Makamu aabantu agambwa kumvwa mbwayiisya Jesu mumulumbe wakwe ooyu. Wacita boobo mbuli muntu uujisi nguzu zya Leza ikutali mbuli basololi babukombi. Ambweni ibunji bwabaabo ibali kumuswiilila baba basikwiiya bakwe.