Pobwe Lyakwiindilila lyamu 32 C.E. nolyaswena afwaafwi, Jesu ujisi bubi kuyiisya mu Galilaya. Mpoonya ulangilwa kuti waunka ku Jerusalemu ku Pobwe Lyakwiindilila, kweelana ancowaamba Mulawo wa Leza. Nokuba boobo Jesu wacita boobo kapakamene kapati nkaambo ba Juda bayanda kumujaya. (Johane 7:1) Kumane wapilukila ku Galilaya.

Ambweni Jesu uli mu Kapernauma ciindi ba Farisi abalembi nobaboola kulinguwe kuzwa ku Jerusalemu. Ino balonda nzi? Bayanda kumujanina kaambo Jesu kutegwa bamupe mulandu wakutyola mulawo wabukombi. Babuzya kuti: “Ino nkaambo nzi basikwiiya bako ncobasotoka tunsiyansiya twabasikale? Mucikozyanyo, tabasambi kumaanza ciindi nobayanda kulya cakulya.” (Matayo 15:2) Leza kunyina naakaambila bantu bakwe kuti kabatobela cilengwa eeci ‘cakusamba kumaanza kusikila kutukokola.’ (Marko 7:3) Pele ba Farisi babona kutacita cilengwa eeci kuti mulandu mupati.

Muciindi cakubavwiila cacigaminina, Jesu waamba mbobatyola Mulawo wa Leza acaali balo. Wababuzya kuti: “Ino nkaambo nzi ncomusotoka mulawo wa Leza akaambo katunsiyansiya twanu? Mucikozyanyo, Leza wakaamba kuti ‘Lemeka bauso abanyoko,’ alimwi akuti, ‘Ooyo uusampaula bausyi naa banyina ajaigwe.’ Pele nywebo mwaamba kuti, ‘Kufwumbwa waambila bausyi naa banyina kuti: “Kufwumbwa ncendijisi icikonzya kumugwasya ncipego caabidwe kuli Leza,” teelede kulemeka bausyi naaceya.’”—Matayo 15:3-6; Kulonga 20:12; 21:17.

Ba Farisi baamba kuti mali, lubono naa cintu cili coonse caabidwe kuti ncipego kuli Leza ncakutempele, aboobo tacikonzyi kubelesyegwa mulimo umbi pe. Pele mubwini cipego eeco caabidwe cilakonzya kacicili mumaanza aamuntu ooyo wacaaba. Mucikozyanyo, imwana ulakonzya kwaamba kuti mali aakwe naa lubono ngu “kkobbani,” nkokuti cipego caabwa kuli Leza naa kutempele, mbuli kuti cipego eeco cili muzina lyatempele. Mali aayo naa lubono zicili zyamwana ooyo, nokuba boobo waamba kuti takonzyi kuzibelesya kugwasya bazyali bakwe bacembeede alimwi bapengede. Aboobo uleya mukuli ngwajisi kulimbabo.—Marko 7:11.

Cilalimvwisya kuti Jesu wanyema akaambo kakuti bapilinganya Mulawo wa Leza, eelyo waamba kuti: “Mwapa kuti jwi lya Leza libe lyabuyo akaambo katunsiyansiya twanu. Nobasikuupaupa ameso, Isaya wakaliluzi naakasinsima kwaamba ndinywe kuti: ‘Aaba bantu balandilemeka amilomo yabo, pele myoyo yabo ili kule andime. Kundikomba kwabo nkwabuyo, nkaambo bayiisya milawo yabantu kuba njiisyo zya Leza.’” Ba Farisi babula cakwaamba naabasinsa Jesu. Aboobo waita nkamu yabantu kuti baboole afwaafwi. Wabaambila kuti: “Amuswiilile akumvwisya caambwa: Tacili cintu cinjila mukanwa lyamuntu cimusofwaazya pe, pele nceeco cizwa mukanwa lyakwe icimusofwaazya.”—Matayo 15:6-11; Isaya 29:13.

Mpoonya nobanjila muŋanda, basikwiiya babuzya Jesu kuti: “Sena ulizyi kuti ba Farisi bacimwa nobamvwa nzyowaamba?” Jesu waingula kuti: “Cisyango cili coonse ncaatakasyanga Taata wakujulu ciyoozyulwa. Amubaleke buyo. Mbasololi boofwu. Ikuti moofwu keenzya moofwunyina, boonse bobilo bayoowida mumulindi.”—Matayo 15:12-14.

Jesu waboneka kuti wagambwa ciindi Petro, mukwiiminina basikwiiya bamwi naalomba kusalazyilwa makani aajatikizya icisofwaazya muntu. Jesu waingula kuti: “Sena tamuzyi kuti kufwumbwa cintu cinjila mukanwa cilainda mwida camana cilazwa anze? Pele kufwumbwa zintu zizwa mukanwa zizwa mumoyo, eelyo zintu eezyo zilamusofwaazya muntu. Mucikozyanyo, mumoyo mulazwa mizeezo mibi, bujayi, bumambe, bwaamu, bubbi, bumboni bwakubeja  akusampaula. Eezyi nzyezintu zisofwaazya muntu; pele kulya cakulya kakunyina kusamba kumaanza takusofwaazyi muntu pe.”—Matayo 15:17-20.

Aawa Jesu takasyi bulondo pe, alimwi taambi kuti muntu tayelede kusamba kumaanza katanatalika kubamba cakulya naa nayanda kulya cakulya. Pele usinsa basololi babukombi basikuupaupa ameso aabo ibasola kweenguluka milawo ya Leza iiluleme kwiinda mukutobela tunsiyansiya twabantu. Masimpe ngakuti, micito mibi iizwa mumoyo njiisofwaazya muntu.