Jesu waita basikwiiya bone—Petro, Andreya, Jakobo a Johane—kuti babe bazubi babantu. Lino mu Sabata, boonse aaba baunka kucikombelo mu Kapernauma. Jesu watalika kuyiisya mucikombelo, eelyo alimwi bantu bakankamana akaambo kambwayiisya. Uyiisya mbuli muntu uujisi nguzu zizwa kuli Leza ikutali mbuli balembi.

Mubuzuba oobu bwa Sabata, muntu umwi uunjidwe daimona awalo nkwali. Mumonya oomu mucikombelo, muntu ooyo woongolola ajwi pati kuti: “Ino tujisi kaambo nzi anduwe Jesu omuna Nazareta? Sena walonda kutunyonyoona? Ndilikuzyi kabotu kuti uli Musalali wa Leza!” Kakalalila daimona eelyo ilyeendelezya muntu ooyo, Jesu waamba kuti: “Umuna, kozwa mumuntu ooyu!”—Marko 1:24, 25.

Mpoonya aawo muuya mubi wamusuntwida ansi muntu ooyo akoongoolola ajwi pati. Nokuba boobo, daimona lyazwa mumuntu ooyo “kakunyina kumucisa.” (Luka 4:35) Bantu ibamuzingulukide mucikombelo baile kwaankamana! Babuzya kuti: “Ino ncinzi eeci? . . . Ulijisi nguzu zyakulailila noiba myuuya iisofweede, alimwi ilamuswiilila.” (Marko 1:27) Tacigambyi kuti makani aajatikizya cintu eeci citanabwenwe amwaika mu Galilaya moonse.

Nobazwa mucikombelo, Jesu abasikwiiya bakwe baunka kuŋanda ya Simoni naa Petro. Okuya banyinazyala Petro balicisidwe kapati, mubili wabo ulapya kapati. Bantu bamulomba Jesu kuti abagwasye banyinazyala Petro. Aboobo Jesu waunka nkobalede, wabajata kujanza akubabusya. Mpoonya-mpoonya bapona akutalika kumukutaukila Jesu abasikwiiya mbali limwi, ambweni kwiinda mukubabambila cakulya.

Mpoonya cakumangolezya bantu ibazwa kumasena oonse baboola kuŋanda ya Petro kuleta balwazi babo. Mukaindi kaniini buyo kwaile kuba mbuli kuti munzi woonse walundana amulyango. Ino bantu aaba boonse bayanda nzi? Bayanda kuti balwazi babo baponesyegwe. Mubwini, ‘boonse aabo ibajisi bantu baciswa malwazi aaindene-indene baleta balwazi babo kulinguwe. Eelyo kwiinda mukubikka maanza aali umwi aumwi wabo wabaponya.’ (Luka 4:40) Ncobeni, kunyina makani amalwazi ngobajisi, Jesu wabagwasya, mbubonya mbokwakasinsimwa. (Isaya 53:4) Mane buya wabaangununa aabo banjidwe madaimona. Ciindi myuuya mibi noizwa, yoongolola kuti: “Uli Mwana wa Leza.” (Luka 4:41) Pele Jesu waikalalila alimwi taaizumizya kwaamba kabili pe. Ilizyi kuti Jesu ngo Kristo, eelyo walo tayandi kuti ilitondezye mbuli kuti ibelekela Leza mwini-mwini.