Naamana kusanduka alimwi akuponya mulombe wakanjidwe daimona mucooko ca Kaisareya Filipi, Jesu wagama ku Kapernauma. Waunka cakusisikizya, abasikwiiya bakwe buyo, kutegwa makamu aabantu ‘atazyibi.’ (Marko 9:30) Eeci camupa ciindi acimbi cakuti agwasye basikwiiya bakwe kulibambila zyalufwu lwakwe alimwi amulimo ngobayakucita kuzwa waawo. Wapandulula kuti: “Mwanaamuntu uyakwaabwa mumaanza aabantu, eelyo bayoomujaya, mpoonya mubuzuba bwatatu, uyoobusyigwa.”—Matayo 17:22, 23.

Makani aaya taali meenzu pe kuli basikwiiya bakwe. Musyule oomu Jesu wakalaambide kuti uyakujaigwa, nokuba kuti Petro tanaakasyoma kuti eeci ciyoocitika ncobeni. (Matayo 16:21, 22) Alimwi baapostolo botatwe bakabona cilengaano cakusanduka alimwi bakaumvwa mubandi wakali kujatikizya “zyakuzwa” kwa Jesu anyika. (Luka 9:31) Basikumutobela lino ‘bausa kapati’ kumvwa ncaamba Jesu, nokuba kuti tiibacimvwisya cini ncaamba majwi aakwe. (Matayo 17:23) Nokuba boobo, bayoowa kumubuzya zimbi kujatikizya makani aaya.

Mpoonya basika ku Kapernauma, imunzi ooko Jesu nkwacitila milimo minji alimwi ikuzwa baapostolo bakwe bali mbobabede. Ooko, ibaalumi batelesya mutelo watempele baboola kuli Petro. Ambweni kabasola kumujanina mulandu Jesu wakutatela mitelo, babuzya kuti: “Sena mwiiyi wanu tateli mali aatempele?”—Matayo 17:24.

Petro wavwiila kuti: “Ulatela.” Nobasika kuŋanda, Jesu ulicizyi kale cacitika. Aboobo muciindi cakulindila kuti Petro aambe makani aaya, Jesu wamubuzya kuti: “Simoni, uyeeya buti? Ino nkuuli bani bami baansi nkobabweza mali aabulumbu naa mutelo? Sena nkuzwa kubana babo naa nkuubeenzu?” Petro wavwiila kuti: “Nkuubeenzu.” Aboobo Jesu wati: “Ncobeni bana babo tabeelede kutela.”—Matayo 17:25, 26.

Bausyi Jesu ngo Mwami wakoonse-koonse alimwi mbambabo bakombwa kutempele. Aboobo kweelana amulawo, Mwana wa Leza tayandiki kutela mutelo watempele. Jesu waamba kuti: “Pele kutegwa tutabatyompyi, koya kulwizi, ukawaale kalobyo akubweza nswi itiisaangune kujatwa, mpoonya wayaasamuna ulajana kkobili lyansiliva [naa tetiradirakima]. Ulibweze akutela mutelo wako awangu.”—Matayo 17:27.

Muciindi cisyoonto basikwiiya baba antoomwe, eelyo Jesu bamubuzya kujatikizya mupati kwiinda boonse mu Bwami. Calino-lino aawa baalumi aaba bakayoowa kumubuzya Jesu kujatikizya lufwu lwakwe iluli kumbele, pele lino tabayoowede pe kumubuzya kujatikizya buumi bwabo bwakumbele. Jesu ulicizyi ncobayeeya. Bayeeya makani ngobali kukazyanya nobali kweenda musyule lyakwe mulweendo lwabo lwakujokela ku Kapernauma. Aboobo wababuzya kuti: “Ino ncinzi ncomwali kukazyanya munzila?” (Marko 9:33) Akaambo kakufwa nsoni, basikwiiya baumuna buyo, nkaambo balikukazyanya kuti naa nguni mupati kwiinda boonse akati kabo. Kumane baapostolo bamubuzya Jesu kujatikizya makani ngobali kukazyanya, bati: “Ino nguni mupati kwiinda boonse mu Bwami bwakujulu?”—Matayo 18:1.

Cilagambya kuti basikwiiya balakazyanya kujatikizya makani aaya mbwaanga kwamyaka iitandila kuli yotatwe balikubona akumvwa zintu nzyacita Jesu. Pele tabalondokede. Alimwi bakakomenena  akati kabasibukombi ibayandisya zyuuno zyaatala alimwi akupegwa bulemu. Kunze lyaboobo, calino-lino Petro wakamumvwa Jesu kamusyomezya kumupa “makkii” aa Bwami. Sena ambweni walimvwa kuti wasumpulwa kwiinda boonse? Ambweni Jakobo a Johane abalo balimvwa mbubonya oobo, akaambo kakuti bakalibonena ameso cilengaano cakusanduka kwa Jesu.

Kufwumbwa naa ncinzi capa kuti kabakazyanya, Jesu wabweza ntaamu yakululamika mizeezo yabo. Waita mwana musyoonto, wamwiimika akati kabo, akwaambila basikwiiya kuti: “Ccita kuti mwasanduka akuba mbuli bana basyoonto, tamukanjili pe mu Bwami bwakujulu. Aboobo kufwumbwa uulicesya mbuli mwana musyoonto ooyu, ngomupati kwiinda boonse mu Bwami bwakujulu; alimwi kufwumbwa uutambula mwana musyoonto mbuli yooyu muzina lyangu, wanditambula andime.”—Matayo 18:3-5.

Eelo kaka tiiliboteli nzila eeyi yakuyiisya! Jesu tanaabanyemena basikwiiya bakwe akubaamba kuti mbaasyaacivwulemwangu naa kuti bayandisya zyuuno. Muciindi caboobo, wabelesya cikozyanyo cigwasya. Bana basyoonto tabajisi mizeezo yakuba acuuno caatala naa mpuwo iili yoonse. Aboobo Jesu utondezya kuti ooyu ngomuuya basikwiiya bakwe ngobeelede kuba anguwo abalo. Mpoonya Jesu wamanizya ciiyo ncaali kuyiisya basikumutobela amajwi aakuti: “Ooyo uucita zintu mbuli muniini akati kanu nyoonse, ngomupati.”—Luka 9:48.