Naazyiba kuti ba Farisi abacipani cabasikutobela Heroda bakanza kumujaya, Jesu abasikwiiya bakwe bazwa akuunka ku Lwizi lwa Galilaya. Makamu-makamu aabantu ibazwa mumasena oonse baboola kulinguwe, nkokuti bantu bazwa ku Galilaya, minzi ya Turo alimwi a Sidoni iili kunkomwe, abaabo bazwa kucooko cakujwe kwa Mulonga wa Jordano, ku Jerusalemu, alimwi a Idumiya kumusanza kwini. Jesu wabaponya bantu banji. Aboobo, bantu banji ibajisi malwazi mapati batalika kutonkana. Muciindi cakulindila kuti walo abajate, batalika kupupanina kuti bamujate mbabo.—Marko 3:9, 10.

Makamu aabantu mapati kapati cakunga Jesu waambila basikwiiya bakwe kuti balete bwato busyoonto kutegwa asosoloke kunkomwe akulesya makamu aabantu kumusyanikizya. Alimwi ulakonzya kubayiisya kali mubwato naa kuunka kubusena bumbi kuccililizya nkomwe kuti agwasye bantu banji abambi.

Sikwiiya Matayo waamba kuti mulimo wa Jesu wazuzikizya “majwi aakaambwa kwiinda mumusinsimi Isaya.” (Matayo 12:17) Ino mbusinsimi nzi mbwaazuzikizya Jesu aawa?

Mboobu bwakuti: “Amubone! Mubelesi wangu ngondakasala, ngondiyanda, ooyo ngondikkomanina! Ndiyoobikka muuya wangu alinguwe, eelyo uyoobapa kuzyiba bululami bantu bamasi. Takakazyanyi nokuba koongolola, alimwi taakwe uuyoomvwa jwi lyakwe mumigwagwa mipati. Takatyoli tete lipwayikide, alimwi takakazimi katambo kalambe kasuka busi kusikila akazwidilile kuleta bululami. Masimpe, masi ayoolangila muzina lyakwe.”—Matayo 12:18-21; Isaya 42:1-4.

Inzya, Jesu ngomubelesi ooyo uuyandwa ngwakkomanina Leza. Jesu wazyibya bantu bululami bwini-bwini, oobo ibusisidwe akaambo kazilengwa zyabukombi bwakubeja. Kababelesya Mulawo wa Leza munzila iitaluleme, ba Farisi tabasoli nokuba kugwasya muntu uuciswa mubuzuba bwa Sabata! Kutegwa atondezye bululami bwa Leza akuti muuya wa Leza ulaalinguwe, Jesu walemununa bantu kutunsiyansiya tuminya alimwi tutaluleme. Akaambo kakucita boobo, basololi babukombi bayanda kumujaya. Lino ooku nkokubija ncobeni moyo!

Ino caamba nzi kuti “takakazyanyi nokuba koongolola, alimwi taakwe uuyoomvwa jwi lyakwe mumigwagwa mipati”? Jesu naponya bantu, tabazumizyi bantu aabo naaba madaimona ‘kumuzyibya kubantu.’ (Marko 3:12) Tayandi bantu kuti bamuzyibe kwiinda mukwaambilizyigwa mumigwagwa naa kwiinda mumakani aasangene atwaambo twakulipangila bantu ngobaamba cakunozya buyo mubandi.

Alimwi Jesu watola mulumbe wakwe iwuumbulizya  kubantu aabo munzila yacikozyanyo ibali mbuli tete lipwaikide, liwide alimwi akulyataulwa. Bali mbuli katambo kalambe kasuka busi, ikajisi mumuni wamamanino uuyanda kuzima. Jesu tatyoli tete lipwaikide naa kuzima katambo kalambe kasuka busi. Muciindi caboobo, caluzyalo aluyando ulabayumya-yumya cabusongo babombe myoyo. Masimpe, Jesu ngonguwe masi ngwaakonzya kulangila!