Jesu ulamulemeka kapati Johane Mubbapatizi, pele ino banabunji bamubona buti Johane? Jesu wati: “Zyalani eeli . . . lili mbuli bana baniini bakkede mumisika ibaita mbobasobana limwi kuti: ‘Twakamulizyila muntolilo pele tiimwakazyana; twakoomoka pele tiimwakalyuuma acamba kutondezya kuusa.’”—Matayo 11:16, 17.

Ino Jesu upandulula nzi? Wakasalazya kaambo kuti: “Johane wakaboola katalyi nokuba kunywa, pele bantu baamba kuti, ‘Ulaadaimona.’ Mwanaamuntu wakaboola kalya akunywa, pele bantu baamba kuti ‘Amubone! Imuntu mulyato alimwi uuyandisya kunywa waini, mweenzinyina wabasimutelo abasizibi.’” (Matayo 11:18, 19) Johane upona buumi bwakuliimya mbwali mu Naziri, mane buya ulaliimya kunywa waini, pele zyalani eeli lyaamba kuti ulaadaimona. (Myeelwe 6:2, 3; Luka 1:15) Pele walo Jesu upona mbubonya mbobapona bantu bambi. Ulalya akunywa cansaizi, pele bamutamikizya kuti ulaciindizya. Eelo cilakatazya kaka kukkomanisya bantu!

Jesu wakozyanisya zyalani eeli ‘kubana baniini ibali mumisika’ ibakaka kuzyana ciindi beenzinyina nobabalizyila muntolilo naa ibatausi ciindi beenzinyina noboomoka kulila. Nokuba boobo, Jesu waamba kuti: “Busongo bulabonwa kuti buliluleme kwiinda mumilimo yambubo.” (Matayo 11:16, 19) Inzya, “milimo,” nkokuti bumboni mbwaapa Johane alimwi a Jesu, bulakasalazya kaambo kakuti nzyobabaamba nzyakubeja.

Jesu naamana kwaamba zyalani eeli kuti talisyomi, wakalalila minzi ya Korazini, Betesaida alimwi a Kapernauma, oomo mwaacitila milimo minji iigambya. Jesu waamba kuti, ikuti naakacita milimo eeyo muminzi yaku Fonike ya Turo a Sidoni, eeyi minzi noyakeempwa. Alimwi waukalalila awalo munzi wa Kapernauma mwalo mwaali kukkala kwaciindi cili mbocibede. Nomuba mumunzi ooyu, bantu banji tiibakasyoma pe. Kujatikizya munzi ooyu, Jesu waamba kuti: “Mu Buzuba bwa Lubeta, cisubulo canu cinooli cipati kwiinda cisubulo ca Sodoma.”—Matayo 11:24.

Mpoonya Jesu watembaula Bausyi, aabo ibasisa makani aakumuuya aakasimpe alimwi aayandika kapati “kubasongo abacenjede” pele ibayubununa makani aaya kubantu-bantu buyo, ibali mbuli bana basyoonto. (Matayo 11:25) Kumane watamba bantu bali boobu amajwi mabotu aakuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.”—Matayo 11:28-30.

Ino Jesu ukatalusya buti? Basololi babukombi babaminya bantu atunsiyansiya ooto tubapa kuba bazike, mbuli milawo iikatazya kapati kujatikizya kubamba Sabata. Pele Jesu ulabakatalusya bantu kwiinda mukubayiisya kasimpe ka Leza, kakunyina kubikkilizya tunsiyansiya tuli boobo. Alimwi utondezya mbobakonzya kulemununwa bantu aabo baminidwe akaambo kakudyaamininwa abeendelezi batwaambo twacisi alimwi abaabo balemenwa acibi. Inzya, Jesu wabatondezya mbobakonzya kulekelelwa zibi zyabo alimwi akumvwana a Leza.

Boonse aabo ibazumina kulikulika joko eeli lya Jesu libotu balakonzya kulyaaba kuli Leza akubelekela Taateesu wakujulu silubomba alimwi siluse. Kucita boobo tuuli mukuli uuminya, nkaambo milawo ya Leza tiiminyi pe.—1 Johane 5:3.